Immoe est ufitziale: Volotea at a gestire sa continuidade territoriale in Sardigna.

Sa cumpangia a prètzios bàscios at a gestire sa continuidade territoriale aèrea dae is tres iscalos sardos, S’Alighera, Casteddu e Terranoa, pro is aeroportos de Roma-Fiumicino e Milano-Linate.

Is primos bolos sunt partidos su 15 de ladàmine e sa cunventzione at a lòmpere finas a su 14 de maju de su 2022 ebbia.

Is billetes s’ant a pòdere comporare dae su giassu ìnternet de sa sotziedade e cun s’aplicatzione de sa matessi cumpangia aèrea, opuru in is billeterias e in is agèntzias de bìagiu.

Ma andamus a bìdere cale sunt is prètzios pro bolare cun su vetore aèreu nou in regìmene de continuidade.

Is residentes in Sardigna ant a pagare 39 èuros pro lòmpere a Roma, imbetzes pro Milano ant a serbire 47 èuros.

In una nota Volotea a fatu ischire chi dae lunis 18 at a intrare a prenu regìmene sa gestione de sa continuidade territoriale, cun 266 bolos a sa chida pro sa regione sarda.

Ma sunt comintzende a essire a pìgiu is primos problemas in sa prataforma de prenotamentu de is billetes de sa sotziedade. In medas si sunt chesciados in is canales sotziales.

Volotea at fatu ischire chi est agiornende sa prataforma in lìnia e in is dies sighentes su sistema at a èssere efitziente.

Non sunt mancadas mancu is chèscias pro is prètzios aguales pro residentes e non residentes in s’Ìsula, e pro is costos agiuntivos pro is postos de seberare e pro su bagàgliu.

A nàrrere sa veridade, tocat a amìtere chi Volotea at fatu a fintzas a lestru meda, bitu chi is billetes si podiant comporare in lìnia giai a pagas dae su cuntratu, chi est istadu firmadu a is ùndigi de note de chenàbura.

Imbetzes pro sa chistione de is agiuntas a su prètziu de su billete, sa cumpangia aèrea at naradu chi is tarifas in continuidade ant a bàlere pro is bagàllios chi pensant 23 chilos ebbia.

Volotea est chirchende fintzas personale, pro si rotas dae e pro is iscalos sardos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’Itàlia at pérdidu contra s’Ispagna pro 1-2, in sa gara giogada in s’istàdiu Giuseppe Meazza de Milanu, in ocasione dae is finales de sa Lega de is Natziones.

Custa partida at a colare a s’istòria pro ite est sa prima derota pro s’allenadore Roberto Mancini, a pustis de 37 partidas de sighidu sena pérdidas.

Sa fine de sa sèrie de vitòrias sighidas est arribbada pro manu de is ispagnolos, chi giae in is ùrtimos Europeos sunt istados is aversàrios prus istragosos pro s’Itàlia. Difatis, is asulos fiant resèssidos a bìnchere sa semifinale e duncasa a lòmpere in finale contra s’Inghilterra, petzi a pustis de is rigores.

Tando, naramus chi s’Ispagna s’est vengada contea s’Itàlia pro ite forsis in is Europeos no at otentu su chi diat àere meritadu.

Ma torramus a allegare de s’isfida de sa Lega de is Natziones: in su primu tempus is ispagnolos ant marcadu duas retes cun su giogadore Ferran Torres, bravu e lestru a isfrutare is botzas serbidas dae is cumpàngios e collionare su portieri asulu Donnarumma.

Durante sa partida su giogadore de su Paris Saint German est istadu suliadu meda dae is tifosos de s’iscalinada de s’istadiu milanesu. Est galu friscu s’adiosu a su Milan – mancari is dirigentes apant propostu 8 miliardos de èuros pro rennoare su contratu in iscadèntzia – e is tifosos non dd’ant perdonadu de èssere andadu a giogari in s’iscuadra frantzesa a gratis.

Tocat a nàrrere chi semper in su primu tempus s’Itàlia est abbarrada in deghe òmines, pro more de s’essida de su defensore Bonucci, bogadu dae su campu a pustis de duos grogos pro duos fallos -.

S’Itàlia no at tentu mancu sorte bona, pro ite at corpidu duos palos, e sa rete de su romanista Pellegrini est lòmpidu casi a sa coa de sa partida, e in is pagos minutos de giogu chi abbarraiant non sunt bastados pro paregiare. Naramus però chi is fùrias rujas ant meritadu de colare in finale, in ue ant agatare o su Bèlgiu o sa Frantza. S’Itàlia at a giogare sa finale minore contra s’iscuadra chi diat a pérdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22