Una festa resèssida bene a beru.

Semus chistionende de “Atòngiu in Barbàgia” de sàbudu e domìnigu coladu in Orgòsolo. Sardos e istràngios ant prenu is carreras de sa bidda in provìntzia de Nùgoro.

Nos at prenadu su coro, su de torrare a bìdere totu cussas persones disigiosas de fàghere festa e de connòschere su connotu e su papare de is biddas de sa Barbàgia.

Una bella cosa a pustis de is limitatziones dèpidas a sa pesta de su Covid-19, chi in Sardigna ant corpidu mescamente custas manifestatzione, chi s’annu coladu sunt istadas cantzelladas e in calicunu ocannu puru.

Ph: Roberto Anedda

A s’intrada de sa bidda de Orgòsolo is organizadores ant cómpudadu sa tzertificatzione birde a totus. A bisu nostru una cosa giusta, sende chi est sa seguresa no est mai tropu e non tocat a si fàghere imbrolliare dae is nùmeros bàscios de is cundiduras.

Ph: Roberto Anedda

In mesu de is carreras cun is muros pintados, in medas ant impreadu sa fatzola mancari a s’abertu non siat prus obligatória. Diversu pro in is butegas e in is magasinos, abertos a su pùblicu pro s’ocasione -, acanta sena mascaredda non si podiat intrare.

Ph: Roberto Anedda

Sa gente lòmpida a custu atopu de “Atòngiu in Barbàgia” est andada prus che totu in chirca de cosa de su papare de su logu, comente sa “purputza”, chi est piaghìda a s’ammachiada. Su pròpiu su binu e is ispetzializades agro-pastorales.

Ph: Roberto Anedda

Ant interessadu meda is butegas de su pane e de is tapetes antigos, e in medas sunt intrados a bìdere comente si traballat e a connòschere s’istòria de su berme de seda.

Ph: Roberto Anedda

Bene meda is turronajos, is bendidores de castàngia, de peddes, de arresòrgias e de belludu, chi ant fatu bonu ispatzu. Difatis fatu de is carreras fiant medas is chi portaiant in conca su bonete comporadu pro s’ocasione.

Ph: Roberto Anedda

Però sa cosa prus bella, est istada a bìdere gióvanos e mannos ballare in mesu de sa ruga a sonu de launeddas e fisarmónica su ballu sardu finas a tardu mannu de note.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Su guvernu at aprovadu su decretu lege chi òbligat a su possessu de tzertificatzione birde in is logos de traballu.

Dae su 15 de mese de ladàmine finas a su 31 de mese de idas 2021, cando at a acabbare s’istadu de apretu, sa Tzertificatzione birde Covid-19, o comende est nomenada in inglesu “green pass”, at a èssere obligatòria pro totus is traballadores.

At a èssere obligatòriu in is logos de traballu pùblicos e privados. Custu est cussu chi narat su decretu lege aprovadu dae su Consìgiu de is ministros de su 16 de cabudanni.

Su decretu nou est una cosa importante meda pro su cuntenimentu pro su Covid. Sa crae de sa tzertificatzione birde est su vatzinu pro superare custa emergèntzia de sa pandemia.

Su decretu at postu s’oblìgu pro is potecarias de fàghere is proas antigènicas lestras a prètzios fissos decrarados de su protocollu de acòrdiu fatu de su Commissàriu istraordinàriu contra s’ispàinu de su coronavirus, de acordu cun su Ministru de sa Salude. Custa detzisione balet pro totu is potecarias chi tenent is recuisitos impostos dae sa lege.

In prus de s’àteru, comente narant is régulas noas, is chi sunt istados dispensados de fàghere is vatzinos pro maladia o àteros motivos graes pro cussu, no ant a dèpere pagare is tampones.

A nàrrere sa veridade, ddoe est calicunu chi est contra sa detzisione de s’òbligu de tzertificatzione birde in su logu de traballu, sende chi a bisu issoro est una trassa pro custrìngere sa gente a si vatzinare.

Medas grupos de tzitadinos, sunt prontos a protestare contra custu decretu, ma nois creimus chi pro superare custa pesta de su coronavirus s’àndala prus curtza e segura est pròpiu custa.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22