A s’Unipol Domus su Casteddu, contra sa Sampdoria, at torradu a bìnchere. Custa est sa prima vitòria de s’istajone chi est lòmpida a pustis sa de oto giorronada.

Su resurtadu finale est de 3-1 pro is meres de domo: pro is casteddajos is gol sunt istados marcados dae Joao Pedro a su de 4 minutu de su primu tempus, a su de 15 de su segundu tempus dae Caceres, e in su finale un’àtera rete de Joao Pedro at cungiadu sa partida, a pustis chi su dorianu Thorsby at torradu a abèrrere sa partida marchende su 2-1 .

Una vitòria de importu mannu pro ite immoe su Casteddu nd’est essidu dae s’ùrtimu postu de sa classìfica e si ponet a su de 17 postu, a 6 puntos de distàntzia pròpiu dae sa Sampdoria.

Is òmines de Mazzarri ant giogadu una partida bella a beru, cun is atacantes Keita Balde e Joao Pedro chi ant postu in dificultade manna sa defensa aversària.

Tzertu, sa rete de su brasilianu in su comintzu de sa partida, at postu sa gara in betada pro is sardos, ma is lìgures non sunt abarrados a castiare e una pariga de minutos a pustis, cun Candreva, ant pitzigadu su palu de is sardos, chi si dd’ant iscampada gràtzias a Cragno.

Su segundu tempus si alluet cun duas iscutas de pee de Keita Balde, in chirca de marcare sa segunda rete, chi callentat is manos de su portieri dorianu Audero.

Su gol pro is casteddajos lompet a pustis de una punitzione de Marin, rebàtida dae sa barriera aversària, cun Caceres lestru meda a torrare a iscùdere da botza bia sa porta, cun una iscantzada chi at corpidu Thorsby, chi at collionadu s’ùrtimu defensore blu-chilciadu.

Ma sa defensa de su Casteddu si dormit a su minutu 82, cun su matessi Thorsby chi cun unu corpu de conca marcat sa rete de su 2-1.

Sa Sampdoria si betat a in antis pro chircare su parègiu, e in un’atzione cuntestada meda – cun probàbile rigore a dannu de s’atacante Caputo – su Casteddu cùngiat sa partida gràtzias a una bella calada fatu de sa fàscia destra de s’argentinu Nandez, chi serbit sa botza de su 3-1 a Joao Pedro.

Est a pustis de custa atzione chi s’àrbitru che nche bogat dae su campu a s’allenadore D’Aversa pro more de is chèiscias meda.

In sa partida chi benit su Casteddu,at a giogare foras de domo, in s’istàdiu Artemio Franchi, contra sa Fiorentina.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Una festa resèssida bene a beru.

Semus chistionende de “Atòngiu in Barbàgia” de sàbudu e domìnigu coladu in Orgòsolo. Sardos e istràngios ant prenu is carreras de sa bidda in provìntzia de Nùgoro.

Nos at prenadu su coro, su de torrare a bìdere totu cussas persones disigiosas de fàghere festa e de connòschere su connotu e su papare de is biddas de sa Barbàgia.

Una bella cosa a pustis de is limitatziones dèpidas a sa pesta de su Covid-19, chi in Sardigna ant corpidu mescamente custas manifestatzione, chi s’annu coladu sunt istadas cantzelladas e in calicunu ocannu puru.

Ph: Roberto Anedda

A s’intrada de sa bidda de Orgòsolo is organizadores ant cómpudadu sa tzertificatzione birde a totus. A bisu nostru una cosa giusta, sende chi est sa seguresa no est mai tropu e non tocat a si fàghere imbrolliare dae is nùmeros bàscios de is cundiduras.

Ph: Roberto Anedda

In mesu de is carreras cun is muros pintados, in medas ant impreadu sa fatzola mancari a s’abertu non siat prus obligatória. Diversu pro in is butegas e in is magasinos, abertos a su pùblicu pro s’ocasione -, acanta sena mascaredda non si podiat intrare.

Ph: Roberto Anedda

Sa gente lòmpida a custu atopu de “Atòngiu in Barbàgia” est andada prus che totu in chirca de cosa de su papare de su logu, comente sa “purputza”, chi est piaghìda a s’ammachiada. Su pròpiu su binu e is ispetzializades agro-pastorales.

Ph: Roberto Anedda

Ant interessadu meda is butegas de su pane e de is tapetes antigos, e in medas sunt intrados a bìdere comente si traballat e a connòschere s’istòria de su berme de seda.

Ph: Roberto Anedda

Bene meda is turronajos, is bendidores de castàngia, de peddes, de arresòrgias e de belludu, chi ant fatu bonu ispatzu. Difatis fatu de is carreras fiant medas is chi portaiant in conca su bonete comporadu pro s’ocasione.

Ph: Roberto Anedda

Però sa cosa prus bella, est istada a bìdere gióvanos e mannos ballare in mesu de sa ruga a sonu de launeddas e fisarmónica su ballu sardu finas a tardu mannu de note.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22