Nudda de fàghere in su pamentu in linna de su Taliercio pro sa Dinamo Tàtari.

Is òmines de Pozzecco non sunt resèssidos a bìnchere una pardida dominada pro bona parte de su tempus, cun unu vantàgiu de 19 puntos in prus de is meres de domo.

Chi diat èssere istada una partida istragosa meda e chi si diat èssere bìda una partida gherrada finas a s’ùrtimu segundu dd’aìamus pensadu, ma pro comente est acabada est istada una befa manna a beru.

Unu finale de partida chi assimìgiat a sa prima gara de playoff, acanta is biancu-blu si sunt fatos isciaddire de is aversàrios in s’ùrtima parte de sa gara.

Ma castiamus comente est andada sa partida a sa minuda: su primu cuartu est acabbadu 24 a 23, a metade isfida su resurtadu fiat de 36 a 49 – cun is tàtaresos a in antis de tréighi puntos – , e in is tres cuartos de sa partida, a su sonu de sa sirena, su resurtadu fiat 63 a 77. Ma est in s’ùrtimu tempus chi pro sa Dinamo est andada male ca peus: prima is meres de domo sunt resèssidos paregiare 87 a 87 a unu minutu e mesu dae sa cungiada de sa partida, ma is biancu-blu sunt torrados a fàghere puntos e a lòmpere a su resurtadu de 87 a 91, ma a pustis de duos isbàglios de is tàtaresos e una farta frischiada dae s’àrbitru a Spissu, sa partida est cambiada in favore de Venezia. Is tres puntos fatos dae Tonut ant regaladu sa cualificatzione a is vènetos pro 93 a 91.

S’allenadore de sa Dinamo, Pozzeco, a pustis de sa partida at naradu chi fiat meda dispiàghidu pro is òmines suos, pro ite diant àere meritadu de lòmpere in semifinale contra s’Olimpia Milano e su de pèrdere pro duos puntos e malu a ingùrtere.

Ma su disafiu beru at a èsserre in s’istajone noa, comente at naradu sa “Musca atómica” de su basket in Limba Sarda “Familia bona donu de su chelu” e nde essit de su bestire pro s’idea de torrare a bìdere is giogadores suos. Is tifosos sardos puru, isperant chi pro s’annu chi benit is giogadores tataresos siant prus indanimados a bìnchere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Erisero amus bidu comente fiat sa situatzione in Aristanis, s’antiga capitale de su Giuigadu de Arborea.

Semus andados a bìdere comente sa gente at pigadu custa detzisione, isetada dae paritzu tempus.

Tocat a nàrrere chi su lunìs est una die de traballu e duncas est una cosa crara chi is carreras non podiant èssere prenas de gente. Però cussu chi nos at prenadu su coro, est istadu chi in fines amus bidu is mesas e is cadreas de is tzilleris e de is recreos in foras, cun òmines e feminas papende e bufende.

Custu est pròpiu unu bellu messàgiu pro is meres de is atividades cummertziales pro su tempus benidore e at a donare coràgiu sa populatzione sarda disigiosa de torrare a sa normalidade, massimamente is imprendidores de su setore de sa retzidura, giai iscambados dae is chidas coladas in zona ruja e arantzu e provados dae is efetos malos causados dae sa pandemia.

Ph: Roberto Anedda

Isperamus chi tra prus pagu de unu mese – comente ant naradu is espertos – chi sa Sardigna potzat torrare in zona bianca.

A bìdere is cussos caminos de sa tzitade, chi ocannu no ant bidu sa Sartìglia, nos at fatu ammentare sa calada de su capu-cursa cando poderat in sa manu sa pipia de maju, su dòpiu iscetru de violas prenu significados.

E torrat a mente sa giostra de caddos de su 2020. S’annu coladu sa manifestatzione fiat renèssida bene a beru, cun unu pùblicu in festa chi aiat acudidu a tropa pro assìstere a s’antiga cursa a caddu de carrasegare.

Ph: Roberto Anedda

Eris Aristanis s’est fata agatare pronta e cortesa, cun sa matessi bellesa medievale incantosa de semper.

Difatis in medas sunt aprontende is butegas pro s’arribbu de is turistas. In sa costera de Aristanis puru, amus bidu chi sunt cumintzende a assetiare is locales pro s’istajone istadiale.

Ph: Roberto Anedda

Sa bellesa de is plajas e is colores bellos de su mare in custu mese de maju, nos at prenadu su coro de felitzidade. Ogni bìculu de custa cussòrgia tenet calicuna cosa chi mèritat de èssere bida.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”