S’isolvimentu de sa promissa a su màrtire gherradore s’at a fàghere in modu diversu dae is àteros annos pro more de s’emergentzia de su COVID-19.

Immoe est ufitziale, s’istàtua de Sant’Efis at èssere carrada a Nora in una vetura aberta.

Sa subrintendèntzia at torradu isceda pro permìtere sa protzessione chi s’at a fàghere su 3 de maju.

Ocannu paris a su màrtire cristianu, in caminu non ddoe ant a èssere is fideles pro dd’acumpangiare finas a Nora. At a èssere sa camioneta de sa Rughe Ruja ebbia, a iscolletare s’istàtua in unu biàgiu técnicu.

Sa vetura impreada at èssere una Volkswagen modellu Amarok, chi est istada giambada pro permìtere de pònnere subra s’istàtua pro su pellegrinàgiu.

S’Artzicunfraria at propostu de seberare s’assòtziu de volontariadu meda famadu, pro diversas motivatziones.

In una lìtera bella meda, at ispiegadu cale sunt sos valores chi ant semper distintu sa Rughe Ruja: sa neutralidade, su bonucoro e su de èssere a costàgiu de sos pius débiles.

Su presidente de sa Rughe Ruja, Sergio Piredda, s’est cummóvidu meda pro esserent istados seberados pro pro acumpangiare Sant’Efis.

Tzertu a dolu mannu at a mancare sa gente in is carrelas e no ant èssere presentes is grupos cun su bestire sardu de is biddas. Sa bellesa de sa festa at a pèrdere meda sena sos fideles e sos colores issoro.

Ma tocat a nàrrere chi non b’aiat àtera possibilidade istransire s’ispàinu de s’epidemìa de su coronavirus.

Sa gente at a pòdere bìdere in televisione sa protzessione cun Santu cristianu nàschidu in Antiòchia portadu in su logu dae su màrtiriu.

In is meses benentes s’ant a fàghere àteras funtziones in is biddas in ue s’istàtua de su Sant’Efis cristianu costumat a fàghere tapa.

Medas fideles sunt invochende·si a su Santu chi- segundu sa traditzione- at liberadu Casteddu dae sa pesta in su XVII sèculu.

Totus sunt pedende sa gràtzia a Sant’Efis pro s’acabbu de s’epidémia de su coronavirus.

S’Itàlia proat a pònnere torra in motu sos motores de sas sindas, fintzas si no at a èssere una riapertura cumpleta.

Pro torrare a sa normalidade, prima de s’apretu de su coronavirus, nch’at a bòlere meda tempus.

Dae oe sunt partidas diversas siendas importantes chi tenent cuotas istratègicas de mercadu in s’istràngiu e arriscaiant de las pèrdere. Sa parte prus manna de sas impresas de sos setores de sa manifatura, edilìtzia e cummèrtziu ant a partire su 4 de maju. Pro torrare a sa vida sotziale chi connoschìamus, imbetzes, amus a dèpere isetare finas a cando s’at a agatare unu vatzinu contra su COVID-19.

Ma ite s’at a pòdere fàghere in cuncretu dae su 4 de maju? Descrivimus in curtzu sos puntos printzipales.

Ant a èssere permìtidos sos ispostamentos, motivados, in intro de sa regione de residèntzia. Sos ispostamentos motivados sunt cussos de traballu, de netzessidade e de salude. Ma b’at fintzas un’àtera novidade: sa possibilidade de abisitare e adobiare familiares e parentes- semper respetende sa proibitzione de s’addobiare in medas e su distantziamentou -.

Abbarrat s’òbrigu de cumpilare s’autotzertificatzione pro sos ispostamentos: su follu chi amus imparadu a connòschere in custos meses.

Sos aparatos de protegimentu – sa fatzoledda pro nos cumprèndere – divenint obrigatòrios in sos logos cungiados, cun sa novidade chi est istadu fissadu unu prètziu màssimu.

At a èssere possìbile praticare isport a sa sola in su territòriu comunale de residèntzia, ma poderende semper sa distàntzia dae sos àteros.

Ant a èssere torrados a abèrrere sos parcos tzitadinos, fintzas si in sas àreas destinadas a sos pipios diant pòdere èssere regulamentadas sas intradas, pro evitare amuntonamentos de minores. S’ùrtima paràula a pitzu de sa riapertura de custos logos at a tocare a sos sìndigos de ogni tzitade.

S’at a pòdere andare a mare pro nadare e a su monte pro passigiare, ma a sa sola e pro su prus in duos. No at a èssere galu possìbile a si tramudare in sas segundas domos.

S’at a pòdere retirare su màndigu dae de sos tzilleris, pitzerias e ristorantes, fintzas si no at a èssere possìbile los consumare in sos locales, cosa chi, fortzis, s’at a pòdere fàghere dae su mese chi benit.

Sos interros ant a èssere tzelebrados in sa presèntzia de màssimu bìndighi persones, chi ant a dèpere portare sas fatzoleddas e mantènnere sa distàntzia de seguresa. A s’imbesse no est istada dada s’autorizatzione pro sa partetzipatzione de sos fideles a sa missa, pro ite est galu perigulosu.

Si totu at a andare bene cun sa fase 2, su 18 de maju b’ant a èssere àteras aperturas e at a èssere bogada calicuna de sas limitatziones introduidas dae su guvernu pro firmare s’epidèmia de coronavirus.