Sa gravidade de su chi est sutzedende in Itàlia a càusa de s’epidèmia de su COVID-19 at tocadu sa festa de Sant’Efis puru.

Ocannu su santu gherradore at a torrare a essire su 3 de maju e non su 1 de su matessi mese, comente est semper capitadu in is ùrtimos annos.

Sa die no est istada atatzada a forfè, pro ite sa data de s’isolvimentu de sa promissa a Sant’Efis est semper istada pròpiu su 3 de maju.

Sa die sa Crèsia festat s’agatamentu de sa “Rughe Bera” in su IV sèculu – 324 -. A l’agatare est istada Sant’Elena, sa mama de Sant’Antine – imperadore romanu-. E pròpiu sa visione de sa rughe lughente in chelu at cunvertidu a Efis cando fiat galu unu sordadu romanu.

Tzertu dae medas annos si fiat detzisu de nde istacare su màrtire cristianu dae sa crèsia de Stampaxi sa die de sa festa de is traballadores.

Custu pro permìtere a sa gente de acudire in medas a bìdere su Santu chi- segundu sa traditzione- at liberadu Casteddu dae sa pesta in su XVII sèculu.

Su tzerimoniale de sa festa puru s’at a fàghere in modu diversu: in caminu non ddoe ant a èssere prus is fideles de Sant’Efis pro dd’acumpagiare finas a Nora.

Non s’at a fàghere sa protzessione fatu de is carrelas de Casteddu, ogna annu giai prenas de gente dae mangianu.

Is grupos cun su bestire sardu de is biddas- seberados – no ant pòdere èssere presentes a sa festa prus manna de is casteddajos.

Totu custas detzisiones sunt istadas pigadas in una vìdeu-cunferèntzia, cunvocada dae su prefetu Bruno Corda a sa cale ant partzipadu: su Munsennore Giuseppe Baturi, su presidente de s’Artzicunfraria Giancarlo Sanna e su sìndigu de Casteddu Paolo Truzzu.

Podet èssere chi s’istàtua de Sant’Efis at èssere carrada a Nora in una vetura iscoberta, pro more chi sa gente dae is fentanas potzat bìdere mègius su santu.

Munsennore Baturi at naradu ca in is meses benentes s’ant a fàghere àteras funtziones e pellegrinàgios in is biddas in ue s’istàtua de su santu màrtire cristianu costumat a fàghere tapa.

In is chidas coladas, fideles medas- peri su presidente de sa Regione Christian Solinas – ant pedidu sa gràtzia a Sant’Efis pro s’acabbu de sa pesta de su coronavirus.

At a èssere una festa de inserru e acorru, a càusa de sa pandemia de su COVID-19.

S’Itàlia abituada a sos ritos suos e a sas traditziones antigas, a cumentzare dae sa Chenàbura Santa, at a èssere custrinta a bìdere annullados o modificados sos apuntamentos fitianos suos.

Ocannu sos pràngios cun sos parentes e sas gitas foras tzitade non sunt istados nemmancu pensados, totus custas cosas s’ant a fàghere in domo e a ognunu pro contu suo.

Medas s’ant a iscambiare sos augùrios in vìdeocunferèntzia, cun s’ispetu chi in su 2021 si torret a festare una Chida Santa comente l’amus semper connota.

Però, su pensamentu andat a sos medas chi in totu Itàlia, in custa epidèmia mala, ant pèrdidu persones caras chi no ant a pòdere prus abbratzare. Familiares chi si nche sunt andados sena lis pòdere donare unu interru dignu, pro ite custu virus nd’at chitadu fintzas custu piticu cunsolu.

A sos medas cuntagiados, chi lutant in unu letu de ispidale atacados a unu respiradore.

A sas categorias, comente sos mèdicos e su personale chi traballat in s’ispidale, chi ant a colare sas festas in prima lìnia a atremenare s’ispàinu de su coronavirus.

A issos andat sa riconnoschèntzia pro su chi sunt faghende in custa “gherra” contra s’inimigu vile e invisìbile, cun su coro prenu de tristura pro sos medas collegas chi ant pèrdidu in custas chidas.

Mancari totu, bìdidas sas limitatziones su dpcm chi nos òbrigat a abarrare in domo, tocat a chircare de colare custas dies cun atinu, provende de torrare a agatare sa normalidade chi amus pèrdidu.

No at a èssere fàtzile, ma a mala bògia lu depimus a sos pipios nostros. Eja, pro more chi a sos pitzocheddos non li siat de pesu meda custa Pasca Manna diversa. Non si depent abbigiare de s’istrachesa e de su pessamentu de sos mannos. Ant giai bidu in sos ùrtimos tempos un’iscola cambiada, cun sos genitores e sos professores unidos pro fàghere a manera chi s’addatamentu a sa didàtica a distàntzia siat prus pagu matanosa. E ocannu, custas, pro sos iscolanos, non ant a èssere vacàntzias de Pasca Manna beras.

Sos mannos ant a dèpere tènnere meda inventiva pro chessire a fàghere bìvere a sos pipios una Pasca Manna serena, sena sos pensamentos pro su COVID-19.

Mancari preparende sa cosa de papare de sa Chida Santa paris, coghinende retzetas gastronòmicas de sa traditzione e impreende ingredientes de su logu.

Agatare su tempus pro allegare a costadu de sa zeminera, mancari cun unu betzu chi contat calicunu contu antigu, comente si costumaiat a fàghere a unu tempus.

E si est possìbile, diat èssere bellu fintzas a bìvere su significadu beru de sa festa, cumprendende cussu messàgiu de isperu e de fide arribbadu dae tesu finas a tempos nostros.