Torra un’episòdiu de violèntzia in un’istitutu iscolàsticu de sa Sardigna, ue unu genitore at agredidu un’insinnante de matemàtica de 56 annos. Sa càusa de custu episòdiu est istadu sa briga chi at domadu a su fìgiu , unu giòvanu istudiante de 16 annos, a pustis de s’èssere cumportadu male in classe.

Durante una letzione, su professore aiat torradu a cramare s’atentzione de s’istudiante pro more chi fiat tzarrende a totora in classe. Si trataiat de una curretzione ebbia, ma a dolu mannu, su giòvanu at rispòndidu isullende  s’insinnante in antis de lassare sa classe arrenegadu.

Pagu tempus a pustis, su pitzocu at mutidu su babbu, chi at individuadu su dotzente de matemàtica e l’at corfidu cun unu corpu de conca a sa cara.  Su professore at tentu bisòngiu de s’interventu lestru de su 118 e sunt arribadas fintzas sas fortzas de s’òrdine.

Siat su babbu de su giòvanu istudiante siat s’insinnante interessadu sunt istados leados a s’ospidale pro retzire sas curas netzessàrias. Sas fortzas de s’òrdine sunt como valutende sa possibilidade de denuntziare s’agressore pro lesiones, violèntzia e resistèntzia a pùblicu ufitziale.

Custu intzidente est a dolu mannu petzi unu de sos medas episòdios de violèntzia contra su personale dotzente in sas iscolas. Nointames, est importante a sutaliniare chi sos dotzentes sunt reconnotos comente  pùblicos ufitziales, cosa chi cumportat cunsighèntzias legales ispetzìficas pro cumportamentos chi  los ofèndent o los fitupèriant.

Su Còdighe Penale Italianu, a s’artìculu 357, definit su pùblicu ufitziale comente acussu chi esèrtzitat una “pùblica funtzione legislativa, giuditziària o amministrativa”. Custa definitzione s’àplicat fintzas a sos dotzentes cando acumprint sas funtziones issoro a s’internu de sas istitutziones iscolàsticas, cumpresos sos atòbios cun sos babbos de sos istudiantes.

Sa Corte de Cassatzione, cun sa sentèntzia n. 15367/2014, at torradu ispetzificare custa cualifica de pùblicu ufitziale pro sos insinnantes, estendende·la a totu sas fainas connètidas a s’insignamentu, cumpresos sos addòbios cun sos babbos.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

S’atteru manzanu, bi est bistada un’accorrada importante meda de su comidadu de sa provintzia de Nugoro, de s’ordine e sa seguresa pubbrica, cun sa presidentzia de su Prefettu de Nugoro Dionisi, a sa cale ant partetzipadu sos cumandantes provintziales de sas Fortzas de s’ordine, e de sa polizia de sos cartzereris Antoni Galati. S’argomentu printzipale est bistadu un’attera borta cussu de s’emergentzia chi bi est in sa presone de Badu e’ Carros, una chistione custa, chi est dimandande interventos chi si leant tottu paris.

Respundinde a s’imbiu de s’Esercitu po controllare sa presone dae sa parte de fora, si ispettant interventos puru da parte de s’amministrassione de sa Presone. Su provvedidore at isboddiadu tottu sos particulares de s’imbiu intro de pagu tempus, in Sardigna de 71 agentes mascros,21 feminas e 34 arrezzentes, chi arrivant dae sos cursos
chi sunt finidos dae pagu.

Su segretariu generale de sa Uil Pa Polizia de sas Presones de sa Sardigna, Migheli Cireddu, at faeddadu de sa desemplada assione leada dae su Prefettu Dionisi, chi at collaboradu meda cun su Provvedidore Galanti, po i sfidare sa situassione cun meda detzisione. Bell’e gai, Cireddu at evidentziadu chi s’imbiu de personale nou, est solu unu signale positivu, no est sa solutzione deffinitiva, ispetzie si cunsideramos sos pensionamentos chi ant esser fattos in pagu tempus.

Su personale de sa polizia de sa presone, in manera particulare in Nugoro e Tattari, sighint a tribagliare in manera precaria, cun orarios de tribagliu longos meda e paga claresa de su controllu. Cireddu at nadu puru chi bi est s’abbisonzu de torrare a ordimizare su tribagliu e de interessare de pius sos sindacados in custu processu, in manera chi sas intetziones bonas de sas istitussiones si potant traduire in assiones e mesorias beras.

S’impignu de onzi die, de su cumandu regionale e de su Prefettu, est appretziadu meda, ma est urgente chi si passet dae sas ideas a sa pratichesa,interessande sos de sos sindacados in s’ordimizu de su tribagliu. Solu in custa manera si at a podere iscansare chi carchi derettura e cumandante, mancari tenzant sas menzus intentas, sigant a
faghere dannos mannos a livellu logale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22