In su coro de sa Capitale, su Fèstival de su Tzìnema de Roma s’abrontat a tzelebrare su talentu tzinematogràficu sardu, acollende tres òperas de cabale. Sa Sardigna at a èssere protagonista in su Mercadu Internatzionale de s’Audiovisivu (MEA), ue sa Sardegna Film Commission de sa Regione Sardigna at a acumprire unu ruolu crae.

Peter Marcias presentat “Uomni in Marcia”

Su regista sardu Peter Marcias at a fàghere s’esòrdiu mundiale suo a su 18° Fèstival de su Tzìnema de Roma cun su documentàriu “Uomini in Marcia”. Custa òpera contat unu sèculu de chertos pro su traballu in Itàlia, evidentziende sa negatzione creschente e isvalutatzione de su significadu èticu de su traballu e de sa dignidade assotziada a issu. A traessu de boghes de lota, intervistas e riflessiones, su film collit s’istòria de chie at gherradu pro custu deretu fundamentale. Intre sas testimonias bi sunt sas de Ken Loach e Laurent Cantet, autores nòdidos pro s’aficu issoro in sa rapresentatzione de sos disafios sotziales e generatzionales.

 Ivana Gloria e su mitu de Dafne in “Clorofilla”

S’òpera prima de Ivana Gloria, “Clorofilla,” at a èssere presentada in cumpetitzione in sa Seletzione Ufitziale de Alice in sa Tzitade. Su film si basat subra su mitu ovidianu de Dafne e sighit sa metamòrfosi de Maia, una giòvana de tzitade, in sintonia cun sa natura. S’istòria s’acumprit intre unu giòvanu assoladu, Teo, e Maia, cun unu forte ligàmine cun sa natura. Su film esplorat sa trasformatzione de Maia in Natura a traessu de addòbios ùnicos e nuscos ammajadores, mentras sa “linfa sonora” e sas pedras sonoras de Pinuccio Sciola agiunghent elementos de ispantu a s’òpera. Custa editzione de Alice in sa Tzitade est atzentrada subra de sas òperas chi ponent sas fèminas a su tzentru de sas narratziones, e “Clorofilla” non est de mancu, oferende un’ograda feminile subra de Maia, una pitzoca chi chircat a issa etotu cun fortza e consièntzia.

Carolina Melis e sa cuntierra intre natura e umanidade in “S’Ozzastru – The Millennial Tree”

“S’Ozzastru – The Millennial Tree” de Carolina Melis, unu filmadu de animatzione, est istadu seletzionadu pro Alice in sa Tzitade. Custa narratzione èpica esplorat sa cuntierra intre natura e umanidade e sutalìniat s’importu de sa sostenibilidade ambientale. Su filmadu ammentat chi sa natura podet prosperare sena s’interferèntzia umana, ma est dovere de s’umanidade a la preservare. S’istòria interessat fintzas sos composidores Sebastiano Dessanay e Claudia Aru, arrichende galu de prus s’esperièntzia visiva e sonora.

Cun custos tres film, su Fèstival de su Tzìnema de Roma s’arrichit de narratziones ùnicas e profundas, oferende a su pùblicu sa possibilidade de s’imbèrghere in istòrias de traballu, natura e identidade feminina.

 At a èssere un’editzione chi non s’at a iscarèschere, chi tzèlebrat su tzìnema sardu e su contributu suo a sa de sete artes.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Cun s’arrivu de s’ istagione turistica noa, s’attentzione est posta supra su comune de Tortolì, chi at annunziadu cun galabera meda sa torrada de msos viazos de su Trenu Birde istoricu de sa Sardigna in s’ispantosu camminu Arbatax-Tortolì-Lanusei.

Custa initziativa est un’occasione unica in sa zenia sua, po iscumbattare sas bellesas de sa Regione in manera ammaghiante. Su Trenu Birde est unu bera e propia prenda, una gianna po unu viazu in su tempus passande in mesu a bistas chi che bogant s’alenu e testimonzas istoricas chi ammaghiant e incantant.

Partinde dae su 14 de lampadas, su trenu ad a torrare a pigare sos viazos, apparande a tottus sa possibilidade de bivere sa maghia de custa esperientzia. Ma sas novidades non finint inoghe: cust’annu, in pius de sas cursas regulares in su fine de sa chida, sa chenapura e sa dominica, si sunt baludande atteros isseberos de viaos a nolu.

Custa moddesa at a permittere de assulenare sas esigentzias de sos bisitadores e de arricchire de pius s’esperientzia totale de sos turistas chi disizzant de iscumbattare sa Regione nostra in manera pius personale e istuvuccada.

Su sutzessu de custa initziativa est su risurtadu de un’impignu leadu dae tottus e de una bisione cumone. Su Comune de Tortolì espressat unu ringratziamentu sincheru a tottu cussos chi ant permittidu custu servitziu: dae su direttore generale de s’ARST, Carlo Poledrini, a su Presidente de sa Fundatzione Elso Rei, a sos sindicos de s’iscrocca e a sos membros de sa matessi Fundatzione. Est bistadu gratzias a s’impignu custante insoro e a s’attentzione insoro a sas esigentzias de sa comunidade e de sos chi tribagliant in su campu de su turismu, chi semus capatzes de apparare custa istravanada occasione de viazu.

Un’atteru afficcu de nodare est sa nomina dae pagu tempus de Segretariu de sa Fundatzione Trenu Birde istoricu de sa Sardigna, de su sindicu de Tortolì, Marcello Ladu. Custu riconnoschimentu evidentziat s’impignu de sa tzittade po favoressere e preservare custu patrimoniu culturale unicu, garantinde sa continuidade e s’isviluppu benidore.

Imbidamos tottu sos appassionados de viazos e de sa bellesa naturale a iscoperrere sas meravizzas de su percursu de su Trenu Birde. Custu viazu, promit de essere un’esperientzia chi non si podet ismenticare, permittinde a tottus de si affundare in sa bellesa e in s’istoria de sa Sardigna, in manera unica e ispantosa. Addurade prontos a bos faghere incantare dae sas bistas claras chi che bogant s’alenu e dae sas emossiones chi solu unu viazu cun su Trenu Birde podet donare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22