In medas non l’ischint, ma ochire o atzapare sos bròmbolos de mare est unu reatu in base a su Còdighe Penale. Custa cosa chi diat pòdere pàrrere una tontesa, est imbetzes istada  comunicada dae s’Enpa de Ravenna, chi aiat giai sutaliniadu s’importu de non maletratare sos càvaros. A pustis de custu comunicadu de sensibilizatzione, est istadu emìtidu dae s’Assòtziu Eticoscienza un’àteru comunicadu chi pertocat sos bròmbolos:

“Sos bagnantes diant dèvere ischire chi sa rimotzione e s’ochidura de sos bròmbolos costituint reatos, sugetos duncas a santziones penales. Chie maletratat un’animale, inclùdidos sos bròmbolos, segundu s’artìculu 544 ter de su Còdighe Penale, arriscat una pena detentiva de tres meses a un’annu o una multa chi vàriat dae 3000€ a 15.000€, cun sa possibilidade de un’aumentu finas a su 50% in casu de morte de s’animale interessadu. Custu artìculu, cunfirmadu dae sentèntzias pretzedentes de sa Corte de Cassatzione, non si lìmitat a sas lesiones fìsicas, ma s’allargat finas a sas tribulias de caràtere ambientale, cumportamentale, etològicu o logìsticu, capatzos de causare tribulia a sos animales, sende chi sunt èsseres sentzientes.

Est craru chi a nde pesare animales dae s’habitat naturale issoro e a los pònnere in manera temporale in cuntenidores comente sitzas, chi sunt inadatos a sas caraterìsticas etològicas issoro, pròvocat  istrachidùdine e tribulia, costituende unu cumportamentu rilevante dae su puntu de vista penale.

Ite tocat a fàghere tando? Si nadende agatamus unu bròmbolu, est mègius a si nche istesiare e torrare a riba, avertende sos àteros bagnantes. Si si bient medas bròmbolos, est pretzisu a mutire sa guàrdia costera o sa capitaneria de portu de sa zona e sighire sos inditos issoro. Si bidimus a calicunu chi cassat o ochit unu bròmbolu, tocat a l’informare chi est cummitende unu reatu e e tocat a li  pedire de torrare a pònnere s’animale in mare, a largu de sa riba. Si sa persone non lu faghet tando si depet mutire sa capitaneria de portu. Tocat a ammentare chi su mare est s’ambiente naturale issoro e s’òmine est petzi un’istràngiu, duncas est importante respetare sa fàuna e sa flora sua, inclùdidas sos animales perigulos o notzivos pro s’òmine.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Cun s’arrivu de s’ istagione turistica noa, s’attentzione est posta supra su comune de Tortolì, chi at annunziadu cun galabera meda sa torrada de msos viazos de su Trenu Birde istoricu de sa Sardigna in s’ispantosu camminu Arbatax-Tortolì-Lanusei.

Custa initziativa est un’occasione unica in sa zenia sua, po iscumbattare sas bellesas de sa Regione in manera ammaghiante. Su Trenu Birde est unu bera e propia prenda, una gianna po unu viazu in su tempus passande in mesu a bistas chi che bogant s’alenu e testimonzas istoricas chi ammaghiant e incantant.

Partinde dae su 14 de lampadas, su trenu ad a torrare a pigare sos viazos, apparande a tottus sa possibilidade de bivere sa maghia de custa esperientzia. Ma sas novidades non finint inoghe: cust’annu, in pius de sas cursas regulares in su fine de sa chida, sa chenapura e sa dominica, si sunt baludande atteros isseberos de viaos a nolu.

Custa moddesa at a permittere de assulenare sas esigentzias de sos bisitadores e de arricchire de pius s’esperientzia totale de sos turistas chi disizzant de iscumbattare sa Regione nostra in manera pius personale e istuvuccada.

Su sutzessu de custa initziativa est su risurtadu de un’impignu leadu dae tottus e de una bisione cumone. Su Comune de Tortolì espressat unu ringratziamentu sincheru a tottu cussos chi ant permittidu custu servitziu: dae su direttore generale de s’ARST, Carlo Poledrini, a su Presidente de sa Fundatzione Elso Rei, a sos sindicos de s’iscrocca e a sos membros de sa matessi Fundatzione. Est bistadu gratzias a s’impignu custante insoro e a s’attentzione insoro a sas esigentzias de sa comunidade e de sos chi tribagliant in su campu de su turismu, chi semus capatzes de apparare custa istravanada occasione de viazu.

Un’atteru afficcu de nodare est sa nomina dae pagu tempus de Segretariu de sa Fundatzione Trenu Birde istoricu de sa Sardigna, de su sindicu de Tortolì, Marcello Ladu. Custu riconnoschimentu evidentziat s’impignu de sa tzittade po favoressere e preservare custu patrimoniu culturale unicu, garantinde sa continuidade e s’isviluppu benidore.

Imbidamos tottu sos appassionados de viazos e de sa bellesa naturale a iscoperrere sas meravizzas de su percursu de su Trenu Birde. Custu viazu, promit de essere un’esperientzia chi non si podet ismenticare, permittinde a tottus de si affundare in sa bellesa e in s’istoria de sa Sardigna, in manera unica e ispantosa. Addurade prontos a bos faghere incantare dae sas bistas claras chi che bogant s’alenu e dae sas emossiones chi solu unu viazu cun su Trenu Birde podet donare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22