A pustis de tres annos dae regnu de Giovanni Carboni cun Rubacuori Baio, su sartu a ostàculos saludat sa torrada in tronu isolanu de Gianleonardo Murruzzu. Su cadderi aristanesu binchet su campionadu sardu de brincu ostàculos in s’Ippopark de Figari. Lu faghet a oto annos dae  su de sete tìtulos. “Cun Taissa Sarda apo bintu in totue, mancaiat petzi su tìtulu regionale”, at cummentadu satisfatu Murruzzu.

Gara difìtzile e tècnica meda sa de su percursu disegnadu dae Giovanni Bussu in s’impiantu gestidu dae Piera Monti e Angelo Pala, in sa manifestatzione organizada in collaboratzione cun sa Fise Sardegna. Bella meda sa fòrmula noa in de tres dies de garas cun proas diferentes. Su binòmiu Gianleonardo Murruzzu-Taissa Sarda at dadu unu signale pretzisu, binchende cun percursu netu sa proa de chenàbura, a tempus subra de ostàculos de 135 tzentìmetros. Sàbadu, in sos 140 tzentìmetros, imbetzes, a s’impònnere est istadu Luigi Angius cun Rarità.

In sa de tres proas, a duos manches cun ostàculos de 140 tzentìmetros, su cadderi aristanesu at piatzadu unu dòpiu netu pro tènnere resone subra de Luigi Angius, chi at pagadu caru s’errore in sa prima manche, resessende però cun una segunda manche perfeta a conchistare sa prata a in antis de s’òtimu Giovanni Onnis subra de Tiberio, chi imbetzes at furriadu un’ostàculu in su barrage.

Su de bator postos pro Antonio Meloni, 19 annos, cun Vadir (s’annu coladu at bintu su I gradu), mentras su campione essidore Giovanni Carboni at serradu a su de chimbe postos cun Its G, sedda olandesa de calidade ma de su caràtere non simple meda.

Sos àteros binchidores. Su campionadu de I gradu at bidu sa resessida de Gabriele Visca cun Courtney a pustis de sas duas medàllias de prata de sas editziones coladas. At pretzèdidu Giorgio Laconi cun Alys Jvh Z e sa mègius amàtzone de sos campionados sardos, balet a nàrrere Beatrice Schirru cun Della Spock.

Vitòria in domo (Tzìrculu Sos Olivastri) pro Francesca Dessena cun Conan Mc Murphy in sos Brevetos pony. Pòdiu cumpletadu dae Alice Agnese Granella cun Tehiya Sundance e Anita Putzu cun Ma Belle Fleur Vh Bruulhof.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22