Wonder Pictures, in collaboratzione cun Sardegna Film Commission, at annuntziadu s’arribu in sas salas italianas de Silent Land, primu longumetràgiu dirìgidu dae Aga Woszczyńska, in sos tzìnemas dae su 29 de mese de làmpadas.

Sos paesàgios assolados de sa Sardigna faghent de isfundu a unu dramma interiore ispantosu iscadenadu dae un’intzidente chi trìulat sas vacàntzias istiales de una giòvana còpia benestante polaca chi at detzìdidu de istare in una villa isolada de sa Sardigna cara a mare e cun piscina. S’idìlliu aparente  de Anna (Agnieszka Żulewska) e Adam (Dobromir Dymecki) benit interrùmpidu de repente dae una sèrie de eventos: sos ventiladores non funtzionant e sa piscina, pro more de sa sicagna, abarrat sena abba.

Non bastant sa limpiesa de sos fundales marinos, sa bellesa de sa magra mediterrànea e su pasu de su paesàgiu pro torrare a cumpònnere sa tensione intre sos duos protagonistas, a s’imbesse, sas cussèntzias issoro ant a èssere iscutuladas a fundu dae sos eventos inaspetados e dae sas cunsighèntzias issoro. Silent Land ponet a su tzentru unu raportu de còpia difìtzile, in unu contu chi colat a dramma e faghet essire a campu sa parte prus iscurigosu de sas relatziones interpersonales.

Silent Land at esordidu in anteprima mundiale a su Toronto IFF Platform Competition in su 2021 e in su matessi annu at bintu su prèmiu FIPRESCI in s’International Competition de su Thessaloniki Film Fèstival. In su 2022 at abertu su Kinoteka Film Fèstival e est istadu premiadu comente  Su Mègius Film a su Crossing Europe Film Fèstival. Prima de s’essida in Itàlia, su film at a èssere presentadu a sa de 19 editziones de Biografilm Fèstival (Bologna, 9-19 de làmpadas).

Silent Land est una coprodutzione polacu-italu-tzeca de Agnieszka Wasiak pro sa polaca Lava Films, Giovanni Pompili pro s’italiana Kino Produtziones e Jordi Niubó pro sa sotziedade tzeca i/o post, in Itàlia at a èssere distribuidu dae Wonder Pictures in collaboratzione cun Sardegna Film Commission.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

S’Arbutzu, connotu fintzas comente  Cadrilloi, Cadrillòni, Cadilloni, Cadrigione, Irbutu, Ischiria, Iscraria, est una mata connota meda in sas traditziones de sa Sardigna. Cun su  frore suo, custu fundu ispontàneu de sa mantza mediterrànea tenet unu ruolu màgicu e cun meda impreos in sa cultura isolana.

Cumintzat a frorire in maju. Unu tempus, in sas domos sardas, non mancaiant mai sas cranistas cun s’arbutzu in sos cabidales de sas isposas. Custas cranistas, cun formas e mannària diferentes, fiant essentziales pro sas fainas fitianas in coghina e pro sa traballadura de su pane e de àteros alimentos preparados in domo. Sos frustigos de arbutzu, robustos e mujaditos, costituiant sa matèria prima pro sa realizatzione de custas cranistas, ma non pro custu ebbia: su frore istilizadu fiat impreadu a s’ispissu in traballos de recramu e tessidura, arrichende su patrimòniu artìsticu e artesanale de s’ìsula.

S’Arbutzu s’impreaiat fintzas pro abrontare su màndigu. Sa patata cora suta de sa chisina, rapresentaiat una risursa pro sas classes prus pòberitas,  cumpletende pastos modestos. Sos rebuddos friscos de su cambu, ammaniados in vàrias maneras, deveniant parte de su màndigu de onga die, unidos a àteros vegetales e ortalìtzias. Sas fògias friscas, imbetzes, fiant impreadas pro imboligare formas piticas de casu, lis donede a sos nidolos unu sabire e unu nuscu partcuculae, chi istesiaiat fintzas sos babbois.

In prus de sas calidades alimentares suas, s’arbutzu possedit propiedades benèficas pro sa pedde. Sas fògias suas sunt impreadas pro infriscare sa pedde e pro curare sas brusiaduras causadas dae su sole. In su Medioevu, s’arbutzu fiat devènnidu un’alleadu pretziosu pro sa bellesa de sas fèminas, pro ite s’impitaiat pro nde peare sas mantzas de sa pedde, comente sas lentìgias.

Ancora oe, s’Arbutzu est assotziadu a creìngios antigos: si creiat chi custu fundu poderet agire comente rimèdiu pro abenenamentos o ispìtzulos de babbois velenosos, una traditzione chi tenet raighinas in sas influèntzias de sos Gregos e de sos Romanos, lòmpidos a Sardigna. In sa mitologia grega, s’arbutzu beniat postu a inghìriu de sas tumbas, pro more chi si creiat chi agiudaret sos mortos pro su biàgiu in s’aldilà.

In su cuntestu cristianu, su cambu de s’arbutzu leat su nùmene de “Bàculu de Santu Giosepe”. Sa paristòria  contat chi Santu Giosepe, a sa chirca de unu maridu pro Maria, giughiat unu bàculu de arbutzu chi aiat froridu in modu meraculosu, inditende in custa manera s’isposu adatu pro Maria.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”