Bonas noas pro is chi cherent cambiare sa màchina betza e comporare unu veìculu chi incuinat prus pagu.
Tocat a nàrrere chi s’Itàlia est a s’ùrtimu postu de sa classìfica europea pro su rinnovu de su parcu de autoveturas in tzirculatzione.

In sete annos sunt istadas immatriculadas pagu prus de 12,1 milliones de autoveturas chi, a fronte de unu parcu formadu a s’acabbu de su de sete annos (su 2020) de unos 39,7 milliones màchinas, ant giutu a unu tassu de rinnovu de su parcu de autoveturas in tzirculatzione de su 30,6%.

Ma de su 10 de ghennàrgiu imbeniente sas cosas diant pòdere cambiare cun s’apertura noa de sas prenotatziones pro otènnere s’ecobonus pro sos veìculos chi non luant; pro su 2023 sunt istados postos630 milliones de èuros.

L’at fatu a ischire su ministeru de sas Impresas e de sos produtos fatos in Itàlia pretzisende chi su bonus pertocat sos veìculos no incuinantes de categoria M1 (autoveìculos), L1e-L7e (mototziclos e tziclumotores) e N1 e N2 (veìculos cummertziales).
Sos cuntzessionàrios ant a pòdere pònnere sas prenotatziones in sa piataforma ecobonus.aiat mise.gov.it a cumentzare dae sas 10 de lunis 10 de ghennàrgiu ebbia.
Aco’ comente sunt partzidas sas vàrias risursas:

1) Sos veìculos elètricos: 190 milliones pro sos autoveìculos (finas a 8 persones) cun emissiones cumpresas in sa fàscia 0-20 gramos de anidride carbònica pro chilòmetru

2) Sos veìculos ìbridos cun càrriga esterna: 235 milliones pro veìculos de categoria M1 (pro su trasportu finas a oto persones) cun emissiones cumpresas in sa fàscia 21-60 gramos de anidride carbònica pro chilòmetru

3) Sos veìculos a emissiones bàscia: 150 milliones pro veìculos de categoria M1 (finas cun emissiones cumpresas in sa fàscia 61-135 gramos de anidride carbònica pro chilòmetru

4) Persones giurìdicas: Su 5% de sos importos pro sas màchinas no incuinantes sunt riservados a sos achistos fatos dae persones giurìdicas pro fainas de autonolègiu curtzu cummertziale o nolègiu

5) Motos e tziclumotores: pro mototziclos e tziclumotores de categoria de L1e a L7e (in pràtica dae sos ‘chimbantinos’ a sas micro-veturas) sunt prevìdidos: 5 milliones pro sos veìculos no elètricos; 35 milliones pro sos veìculos elètricos
6) Veìculos cummertziales: 15 milliones pro sos veìculos cummertziales elètricos de categoria N1 (lèbios) e N2 (de 3,5 finas a 12 tonnelladas)

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

In custas dies coladas semus andados a Triei a bìdere unu de is logos archeólogicos mezus custoidos e de ispantu de s’Ogiastra: sa tumba de is mannos de Osono.

Est unu fràigu mannu a beru chi mesurat binti metros de lòngaria dae s’arcu de s’esedra e cun dòighi perdas mannas a inghìriu. In s’imbucada in s’aposentu de mortu ddu est su liminartzu de susu, longu prus deghe metros, cun sa cobertura fatta dae sette perdas ladas galu intreos.

Dae is repertos, chi sunt istados agatados in is forrojos archéologicos, si at a pòdere nàrrere chi custu logu est istadu travicadu dae su XVI séculu a.C. fintzas a su III séculu d.C. .

Ph: Roberto Anedda

Dae su sartu in ue est s’ispantosa tumba de is mannos trieddina, si pòdit bìdere totu su panorama chi mòvet de su Supramonte de Baunei e lòmpit fintzas a su mare de Arbatax. Tocat a nàrrere chi est istada una die bella a beru cun su celu craru chi nos at prenadu su coro de felitzidade.

Ph: Roberto Anedda

Pro lòmpere a custu logu depimus pigare s’istrada statale 125 chi dae sa bidda Lotzorai colat a su rughe de su caminu pro Ardali, furriare bia su campu de fùbalu de Triei  e pustis una pariga de chilòmetros  semus arribados.

Ph: Roberto Anedda

In mesu a is montes imbusciados dae bellos padenteddos s’at a pòdere ammirare custa òpera pesada de is òmines ogiastrinos antigos.

Ph: Roberto Anedda

In custu logu de Sardigna paret de intèndere chi sa terra siat sagrada cun is coròngios mannos traballados dae picapedreris sabius chi galu sunt istantàrgios.

Ph: Roberto Anedda

Sa tumba de is mannos de Osono, non tenet nudda dae imbidiare a is localidades archéologicas prus famadas de s’Ìsula. In prus de s’àteru ogni bìculu de custa cussòrgia tenet calicuna cosa chi mèritat de èssere bida. Pro cussos chi sunt inamorados de su mare, a curtzu ant agatare plajas cun colores bellos chi abarrant in su coro.

Ph: Roberto Anedda

Pro chi no ant mai bidu custos logos, amus detzisu de pònnere calicuna fotografia.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”