Una disgràtzia manna at corpidu a totu sa comunidade de Santu Tiadoru.

Eris a mangianu, in localidade “Lutturai”, est istadu agatadu in unu putzu su corpus sena vida de Danilo Sulas. A su chi s’ischit su pitzocu de 22 annos diat pòdere èssere caladu in su putzu fungudu ses metros – cun tres metros de abba – pro sarvare su cane suo chi fiat rutu a intro pro malasciagura. Si pensat chi su giòvanu non siat resèssidu prus a nde torrare a essire, morende allupadu.

In fundu a su putzu sos subàcueos de sos pompieris ant agatadu fintzas su cane mortu, chi fortzis nch’est rutu sighende un’àteru animale.

Galu non s’ischit cun seguresa ite siat acontèssidu, prus che totu non si cumprendet comente mai su giòvanu no apat mutidu a nemos pro si fàghere agiudare e no apat tentu peruna prudèntzia calende in su putzu. Dae sos tabulados telefònicos de su telefoneddu s’at a istabilire s’ora giusta de custa tragèdia.

Sa die a in antis, sos familiares de Danilo, aiant denuntziadu s’iscumparta de su giòvanu, cun s’ispera de ddu pòdere torrare a bìere sanu, ma comente unu raju ant tentu sa noa mala de sa morte sua in Lutturai acanta costumaiat a ddoe colare ora meda.

Difatis in cussu terrenu, a presu de s’arenile de Cala Suaraccia, su babbu de Danilo ponet sos gommones chi nolegiat in s’istade a sos turistas.

Unu sorte mala sa chi est acontèssida a Danilo, chi at pèrdidu sa vida pro sarbare una bèstia, lassende in su dolore e in tristura sa famìlia e sa bidda sua. S’Amministratzione comunale ghiada dae sa sìndiga Rita Deretta, at proclamadu su lutu tzitadinu.

Custu merie, in sa Crèsia de Santa Teresa de Calcutta ddoe est istadu s’interru de su giòvanu isfortunadu, connotu in bidda pro èssere geniosu e disponìbile cun totus.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Bonas noas pro is chi cherent cambiare sa màchina betza e comporare unu veìculu chi incuinat prus pagu.
Tocat a nàrrere chi s’Itàlia est a s’ùrtimu postu de sa classìfica europea pro su rinnovu de su parcu de autoveturas in tzirculatzione.

In sete annos sunt istadas immatriculadas pagu prus de 12,1 milliones de autoveturas chi, a fronte de unu parcu formadu a s’acabbu de su de sete annos (su 2020) de unos 39,7 milliones màchinas, ant giutu a unu tassu de rinnovu de su parcu de autoveturas in tzirculatzione de su 30,6%.

Ma de su 10 de ghennàrgiu imbeniente sas cosas diant pòdere cambiare cun s’apertura noa de sas prenotatziones pro otènnere s’ecobonus pro sos veìculos chi non luant; pro su 2023 sunt istados postos630 milliones de èuros.

L’at fatu a ischire su ministeru de sas Impresas e de sos produtos fatos in Itàlia pretzisende chi su bonus pertocat sos veìculos no incuinantes de categoria M1 (autoveìculos), L1e-L7e (mototziclos e tziclumotores) e N1 e N2 (veìculos cummertziales).
Sos cuntzessionàrios ant a pòdere pònnere sas prenotatziones in sa piataforma ecobonus.aiat mise.gov.it a cumentzare dae sas 10 de lunis 10 de ghennàrgiu ebbia.
Aco’ comente sunt partzidas sas vàrias risursas:

1) Sos veìculos elètricos: 190 milliones pro sos autoveìculos (finas a 8 persones) cun emissiones cumpresas in sa fàscia 0-20 gramos de anidride carbònica pro chilòmetru

2) Sos veìculos ìbridos cun càrriga esterna: 235 milliones pro veìculos de categoria M1 (pro su trasportu finas a oto persones) cun emissiones cumpresas in sa fàscia 21-60 gramos de anidride carbònica pro chilòmetru

3) Sos veìculos a emissiones bàscia: 150 milliones pro veìculos de categoria M1 (finas cun emissiones cumpresas in sa fàscia 61-135 gramos de anidride carbònica pro chilòmetru

4) Persones giurìdicas: Su 5% de sos importos pro sas màchinas no incuinantes sunt riservados a sos achistos fatos dae persones giurìdicas pro fainas de autonolègiu curtzu cummertziale o nolègiu

5) Motos e tziclumotores: pro mototziclos e tziclumotores de categoria de L1e a L7e (in pràtica dae sos ‘chimbantinos’ a sas micro-veturas) sunt prevìdidos: 5 milliones pro sos veìculos no elètricos; 35 milliones pro sos veìculos elètricos
6) Veìculos cummertziales: 15 milliones pro sos veìculos cummertziales elètricos de categoria N1 (lèbios) e N2 (de 3,5 finas a 12 tonnelladas)

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”