Su Casteddu chi at a giogare su 14 de custu mese contra su Como, at a bìdere s’esòrdiu de s’allenadore nou Claudio Ranieri.

Pro su tècnicu romanu no est sa prima borta chi at a ghiare s’iscuadra sarda, difatis prus de trint’annos  a oe est istadu giai in sa banchita ruju-blu. A cussos tempos, in tres annos dae su 1988 a su 1991, Ranieri fiat resèssidu a fàghere pròmovere is casteddajos dae sa Sèrie C a sa Sèrie A, e s’ùltimu annu in su massimu campionadu italianu a sarbare su club dae sa retroga.

Is tifosos sardos pro custa rejone non dd’ant ismentigadu mai e est istadu semper istimadu in totu custos annos, in is cales at allenadu medas iscuadras italianas e istranzas. Su tènnicu classi 1951 s’est agiudicadu copas natzionalis e europeas, ma sa vìttoria prus importanti chi at àpidu est cando at bìnchidu sa Liga Inglesa cun su Leicester. Un’iscuadra minore de su campionadu de fùbalu prus ricu de su mundu, chi nemos diat àere iscumissu.

Immoe a 71 annos dd’at a aspetare unu còmpitu difìtzile meda: chircare de fàghere lòmpere is sardos un’àtera bia in Sèrie A. Is ruju-blu si presentant cun un’iscuadra avilida meda, a pustis meses meda cun pagu giogu e resultados negativos. A Ranieri pro custa missione istragosa meda dd’at a serbire sa disponibilidade de totu is giogadores de sa rosa.

Sa prima partida sena s’allenadore Fabio Liverani, esoneradu una pariga de chidas coladas, su Casteddu dd’at bìnchida contra su Cosenza, ùltimu in classìfica, cun Fabio Pisacane interinu in banchitta.

Sa partida contra su Como at a nàrrere si is casteddajos ant a tènnere is cartas pro chircare de recuperare puntos a is iscuadras chi sunt a in antis in campionadu.

Pro immoe non s’ischit cale at a èssere su mòdulu nou de is sardos e is possìbiles càmbios chi Ranieri at a fàghere in difesa, tzentru-campu e atacu.

Seguru, su tècnicu nou at a dèpere risòrvere su problema de su repartu de in antis chi at marcadu belle nudda in custa istajone e cussu de coa pro èssere prus abistus. Cun su mercadu de su fùbalu abertu, fortzis at a lòmpere calchi giogadore nou.

Oe Ranieri at a dèpere lòmpere in aeroportu cun medas tifosos chi dd’ant a aspetare e a pustis at a fàghere sa prima cunfèrentzia a in antis de is giornalistas.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Est lòmpidu s’annu nou, unu 2023 càrrigu de isperu e de disafios mannos chi nos abetant. Nos lassamus a palas unu 2022 chi est istadu unu de is prus istragosos de s’istòria moderna.

S’Europa s’est agatada a parare fronte a sa gherra in Ucràina chi at postu in ghenugru s’economia de totu su mundu e mescamente at cajonadu vìtimas meda.

S’Unione Europea e àteras natziones ant corfidu su guvernu de sa Russia cun santziones ecònomicas, pro chircare dae fàghere frimare s’invasione chi at cumandadu su presidente Vladimir Putin.  Pro immoe no est serbidu a nudda, cun sa gherra chi est sìghendu e is prejos de is cosas sunt crèschidos, mescamente s’enertzia, comente s’eletritzidade e su carburante. Tzertu non sunt mancadas puru is ispeculassiones finantziarias.

A nàrrere chi  s’annu “betzu” fiat ispetadu comente cussu de sa ripresa a pustis sa pandemia de su Covid-19, unu nemigu piticu e invisìbile chi at ammustradu totu sa fragilidade de sa Tziviltade umana. Sa vatzinatzione est istadu unu passu importante meda pro parare fronte a sa tzirculatzione de su virus e immuzzare sa populatzione, ma sa gherra in Ucràina at arèschidu sa ricostrutzione ecònomica.

Pro custu rejone est importante meda pro s’Itàlia su Recovery Fund, su fundu pro sa ripresa cun tìtulos europeos comunos pro finantziare sa ripresa de totus is Paisos prus corfidos de sa crisi a pustis de s’epidèmia, e depet donares rispostas subra disafios mannos pro lantzare torra s’economia. Difatis gente meda at pèrdidu su traballu, cun famìlias a arriscu poberesa.

Un’ocasione manna pro su Paisu nostru pro chircare de nde essire cantu prima dae custa  situassione e pro pensare a una natzione prus moderna.

S’isperu est chi su guvernu nou ghiadu de Giorgia Meloni at a èssere sabiu e cun coràgiu at a dimustrare capatzidades mannas pro afrontare is dificultades chi amus a agatare in s’àndala de is meses benentes. Ant a serbire respostas lestras e chi faghent efettu, pro ite ddu mèritat sa populatzione chi at fatu sacrifìtzios in custus ùltimos annos.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”