Importante meda s’addòbiu chi s’assessora a sa Cultura de su Comunu de Samugheu, Elisabetta Sanna, at oaparitzadu chenàbura su 16 de nadale in sos locales de su MURATS – Museu regionale de s’Arte tèssile sarda, pro allegare de sos istereòtipos de gènere.

S’atopu est istadu fatu cun su coordinamentu de Loredana Rosa, presidente de s’assòtziu ogiastrinu Voltalacarta. Ant partetzipadu a su cumvegnu per sas assistentes sotziales Maria Giovanna Melis e Maria Chitti. Paris cun issas bi fiant peri unos cantos imprendidores de Samugheo: sa responsàbile de sa cantina de Neunele, s’enòloga Emanuela Flore, e Giuseppe Demelas, amministradore de MU, s’azienda de tessidura  apretziada a livellu internatzionale.

Su cunvegnu est istadu s’ocasione pro contare esperièntzias personales e de traballu, cun testimonias relativas a sos medas casos de sessismu e discriminatzione. Pro Loredana Rosa de Voltalacarta “sa luta a pregiudìtzios e istereòtipos est un’aficu chi totus e totus nois devimus assùmere in sa prima persone, a cumentzare dae s’annestru giai de piseddos, pro costruire una tzitadinàntzia prus giusta”

Giuseppe Demelas at contadu  s’esperièntzia de s’azienda MU, eredada dae sa mama tessidora Mariantonia Urru. In unu setore cunsideradu appannaggio esclusivu de sas fèminas, comente a sa tessidura, Samugheu est etzetzione sende chi bantat sa presèntzia de medas òmines chi si dèdicant a custa arte. Emanuela Floras, ùnica enòloga in Sardigna e intre sas pagas meda in Itàlia, at contadu s’àtera cara de sa medàllia, sende chi issa est una etzetzione in unu mundu pro su prus de òmines.  In prus de fàghere s’enòloga est devènnida amministradora delegada e Brand Ambassador de sa dita Moratti.

A sa dibata ant intervènnidu peri Debora Chitti e Maria Giovanna Melis, assistentes sotziales de su Comunu de Samugheu, chi ant contadu s’esperièntzia issoro in intro de sa realidade locale.

Importantes peri sos interventos de su pùblicu chi ant contadu fatos e acontessimentos de sessismu personales o de àteras persones de su logu. Dae s’atopu nd’est essidu a campu chi est importante parare barra a custos istereòtipos de genere e chi pròpiu sas fèminas chi nche l’ant fata a los bìnchere devent èssere de esèmpiu pro sas àteras. Loredana Rosa at acabbadu s’interventu cosa sua torrende gràtzias a  totu s’amministratzione comunale de Samugheu, bidda acanta esistint meda esèmpios de cabbale e bonas pràticas de sighire.

 “Progetu finantziadu cun s’Avisu Pùblicu IMPRENTAS annualidade 2021-2022”

Sa tecnologia sighit a ispantare e a lòmpere a cosas chi a unu tempus non si podiant nemmancu immaginare.

Bastas a pensare a un’aparatu nou chi arribbat dae Taiwàn, capatzu de donare rispostas a preguntas chi finas a oe mamas espertas ebbia podiant donare.

Una de custas est pro ite unu piseddu est pranghende. De seguru si tratat de una de is dimandas chi is babbos si faghent dae is primas dies de fida de unu fìgiu.

Tando, custu aparatu nou diat pòdere agiudare a ddu cumprèndere. Si narat Qbear e est fatu dae Quantum Music, tenet una forma tzirculare e est forradu de silicone. Unu programma analizat su prantigeddu de su pipiu pro cumprèndere si siat istracu, tèngiat fàmine, siat sididu, s’intendat male, bògiat èssere dengadu, o si s’est imbrutadu e tocat a ddu cambiare.

Sa cosa ispantosa est ca custa aina inteligente diat èssere capatza de ddu fàghere isceti in 10 segundos cun una pretzisione de su 95%.

Sos babbos retzint sas notìficas de comente istat su pipiu cun un’aplicatzione cumplementare, chi donat informatziones fintzas de sa temperadura de s’aposentu.

Gràtzias a s’abbistesa artifitziale, su Q-bear diat resèssere a s’adatare a àteros bisòngios de sa criadura. Difatis, segundu sos programmadores, s’aparatu si podet pianificare pro intonare s’anninnia o pro istròchere sa muida chi su pipiu intendiat in sa bentre de sa mama.

Podimus nàrrere chi custa tecnologia dae una banda permitit de cumprèndere mègius sos bisòngios de is pipios piticos, ma in su matessi tempus ponet calicuna duda, sende chi est est semper un’ogetu artifitziale chi intervenet in un’edade dìliga meda. In unu tempus chi totus semus semper collegados a ìnternet e cunditzionados dae sa tecnologia, semus seguros chi una criadura dereta de nàschere depat intrare in cuntatu cun custos aparatos? In prus no ddoe at su perìgulu chi su raportu intre pipiu e genitores potzat èssere influentzadu? Amus a bìdere in su benidore si amus a pòdere rispòndere a custas dudas.

Pro como s’aparatu est espostu in su Consumer Electronics Show (CES) de Las Vegas.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”