Ita Airways diat pòdere arribbare a Sardigna, dae su 15 de maju finas a su 14 maju de su 2023. Totu in isetu de su bandu nou pro s’assegnatzione de sas tratas (24 meses) in regìmene de continuidade territoriale, est a nàrrere a tarifas calmieradas, intre sos tres iscalos sardos e sos aeroportos de Roma e Milanu.

Sa disponibilidade de Ita Airways, a sa manifestatzione de interessu publicada dae sa Regione pro garantire sos collegamentos in su perìodu netzessàriu a predispònnere su bandu nou, arribbat cun una nota acanta s’azienda «comùnicat sa voluntade sua de operare is sas printzipales rotas in continuidade territoriale dae e pro sa Sardigna segundu sas cunditziones de su Decretu de su Ministeru de sas Infrastruturas e de sa Mobilidade Sustenìbile: 466 dae su 25 de santandria 2021 pro bolare de su 15 de maju 2022 finas a su 14 de maju 2023 dae Roma Fiumicino e Milanu Linate cara a S’Alighera, Casteddu e Terranoa e a s’imbesse».

In sa nota sa cumpangia annùntziat chi «at a garantire sos bolos fitianos cun sa Sardigna in totus sas ses printzipales rotas in Continuidade Territoriale dae sos tres aeroportos sardos assegurende in custu modu sa mobilidade de sos tzitadinos sardos e sa connetividade de sos territòrios de sa Regione cun sas destinatziones domèsticas, internatzionales e intercontinentales operadas dae Ita Airways e de sos vetores suos partners».

E su rincaru de sos carburantes de su 40 pro chentu non paret influire subra sas detzisiones de sa Cumpangia de bandera chi annùntziat de chèrrere biagiare «sena cumpensatziones dae banda de sa Regione Sardigna e garantende in manera eguale unu servìtziu pùblicu mantenende tarifas meda vantagiosas a tutela de sa populatzione sarda pro dimustrare sa voluntade sua de contribuire a su Sistema Paisu e èssere unu pilastru fundamentale pro sa connetividadee s’isvilupu econòmicu de s’Itàlia in unu momentu de intzertesa manna a livellu mundiale». Finas a su 14 de maju 2022, sos bolos in continuidade territoriale ant a èssere garantidos dae sa cumpangia aèrea Volotea chi sas dies coladas at manifestadu sa voluntade de sighire petzi subra de sa lìnia Casteddu Roma in sos meses istadiales e, posca de analizare in custas dies «sos datos subra sas rotas dae e pro sa Sardigna in sos meses colados » e «valutare sos collegamentos chi diant pòdere èssere operados in su matessi perìodu tra sos iscalos isolanos e sos printzipales aeroportos italianos».

 “Progetto finanziato con l’Avviso Pubblico IMPRENTAS annualità 2021-2022”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22