Cras in su mercadu de Campagna Amica de Casteddu, in pratza “Centomila”, partit s’ispesa suspèndida pro s’Ucràina dae imbiare a sos tziviles chi bivent in custa natzione acanta comintzant a mancare sas provistas alimentares o de donare a sas mìgias de pròfugos chi sunt arribbende fintzas a Sardigna.

Initziativa chi s’at a fàghere in totus sos mercados de Campagna Amica de Itàlia, chi bidet sa collaboratzione in su sud Sardigna de sa Caritas Diotzesana e de s’assòtziu Oci, Organizatzione tzitadinos immigrados.

S’Ispesa suspèndida s’ispirat a su modellu napoletanu de “cafè suspèndidu”, cando a su tzilleri si lassat unu cafè pagadu pro su cliente chi at a bènnere a pustis. In custu casu si tratat de fruta, berdura, casu, salumes e ogni ratza de gènere alimentare fatu in Sardigna, de calidade arta meda e a km zero. Cun su suportu de sos giòvanos e de sas fèminas de sa Coldiretti, in totu sos mercato alimentares sunt istados ammaniados tretos apòsitos acanta si podent fàghere sas ofertas, fintzas in collaboratzione cun parròchias, Comunos e assòtzios.

Custa de s’ispesa suspèndida est solu una de is medas initziativas chi sunt cumentzende a essire a campu in Sardigna, pro chircare de parare fronte a s’emergèntzia alimentare chi est corpende s’Ucràina a càusa de sa gherra.

Cras a mangianu a sas 9.30, at a èssere presentada s’initziativa in Casteddu, in su mercadu de Campagna Amica in pratza Centomila, in ue at a èssere presente paris cun su presidente e diretore provintziales de Coldiretti Casteddu, Giorgio Demurtas e Luca Saba, su diretore natzionale de Fundatzione Campagna Amica Carmelo Troccoli, sa Caritas Diotzesana de Casteddu ghiada dae don Marco Lai e una delegatzione de Ucràinos de s’Assòtziu Oci. In sas dies sighentes bos amus a fàghere ischire de comente est andasa s’initziativa e sa regorta de cosa de papare.

“Progetto finanziato con l’Avviso Pubblico IMPRENTAS annualità 2021-2022”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22