Fintzas su Màrghine est caladu in pratza pro pedire sa paghe e donare solidariedade a su pòpulu ucràinu, minetzadu dae sa gherra.

Prus de duamìgia persones ant rispostu a s’apellu de su Comunu de Macumere e de sas iscolas e si sunt agatadas in pratza pro torrare a afirmare su deretu de sos pòpulos a sa libertade. Su corteu at isfiladu dae sa pratza Noa, fatu su cursu Umberto pro arribbare a dae in antis su Munitzìpiu. Mannos e piticos, cun istudiantes medas, ant espostu deghinas de banderas de s’Ucràina, de sa paghe e cartellos.

Sos pipios de sas iscolas maternas e elementares ant pedidu a boghe manna sa fine de sa gherra e sa torrada a sa paghe.

“Sa solidariedade nostra andat a chie oe est sufrende suta sos bombardamentos e sas privatziones — at naradu su sìndigu de Macumere Antonio Onorato Succu — custas duamìgia persones ant chertu cundennare custa gherra e torrare a afirmare sa paghe. Su ringratziamentu de s’amministratzione andat a sos pitzocos, a sos dotzentes, a sos dirigentes de su Màrghine e a totus cussos chi ant partetzipadu a sa martza pro sa paghe”.

Sa matessi die fintzas sos istudiantes de Igrèsias, 3.600, si sunt atopados paris cun sìndigu, assessore e dotzentes pro pedire sa paghe in Ucràina. S’apuntamentu, naschidu pro initziativa de s’assessoradu comunale a s’Istrutzione Pùblica, at interessadu unos 3.600 istudiantes e istudiantes e est istadu pretzèdidu dae momentos de riflessione e de aprofundimentu tentos dae sos dotzentes.

“Un’initziativa – at sutaliniadu su sìndigu Mauro Usai – chi cheret manifestare s’interessamentu de totu sa sotziedade e in particulare de su mundu de s’iscola pro sa paghe. In da in antis a sa tragèdia de sa gherra in Ucràina est importante chi crescant sas ocasiones de mobilitatzione, comente sa de oe chi at unidu dotzentes, istudiantes e rapresentantes de sas istitutziones”.

“S’iscola at su dovere morale de educare sos istudiantes a sa cultura de sa paghe e a su repùdiu de sa gherra, comente mèdiu de risolutzione de sas cuntierras internatzionales, gasi comente decretadu dae sa costitutzione nostra – at agiuntu s’assessore Alessandro Lorefice – Cun custu atòbiu amus chertu espressare sa solidariedade nostra a totu su pòpulu ucràinu, mescamente a sos istudiantes ucràinos”.

“Progetto finanziato con l’Avviso Pubblico IMPRENTAS annualità 2021-2022”

Claudio Ranieri est bistadu nomenadu Allenadore Gentleman de sa serie B 2022/2023 in onore de Gigi Simoni, retzinde su titulu gratzias a sas prefferentzias espressadas dae sos vinti allenadores de sa serie BKT. Custu riconnoschimentu arribat pustis de aere giai binchidu su premiu duos annos faghede, pigande su testimonzu dae Stefano Pioli, chi aiat binchidu s’annu prima.

S’integru de su premiu si est tentu in Milano, inube Ranieri at retzidu sa Torretta de San Siro, simbulu de unu premiu chi tzelebrat sos balores beros de su giogu de sa botza, in mesu de su cale, su Fair Play, chi s’allenadore de su Casteddu incarnat in manera tipu.

S’ordiminzu de su Premiu Gentleman, ideadu dae Gianfranco Fasan, cun s’azzudu de sa Lega Serie B, at bidu sa presentzia de sa famiglia de Gigi Simoni, paris a amigos e gasetteris comente Luca Tronchetti e Alberto Cerruti, e de su presidente de su Coni CRL Marco Riva.

Ranieri at espressadu s’ingraenzu sou retzinde su premiu a nomene de Gigi Simoni, deffinindelu un’omine mannu e evidentziande s’importantzia de su Fair Play in su giogu de sa botza e in s’isport in generale. Su presidente de sa Lega B, Mauro Balata,at bantadu Ranieri commente una figura istravanada de su giogu de sa botza in Italia, evidentziande su rolu sou de puntu de relata po sos giogadores e allenadores zovanos,tambene comente isparghidore de sos menzus balores isportivos.

Su premiu est bistadu dadu a Ranieri non solu po su sutzessu battinde su Casteddu in Serie A, ma mescamente po sa lessione de isportividade in sa finale Play off, inube at dimandadu a sos tiffosos suos de nde la finire cun sos allolojos e de tzacullimanare sos tiffosos de su Bari, mustrande rispettu mannu po sos ribales e favoressende s’isportividade in mesu de sas duas isquadras. Custu attua at corpadu tottu sos allenadores de sa Serie B, chi l’ ant premiadu commente su chi meritaiat de piusu in s’annu 2022/2023.

Gianfranco Fasan, s’ordiminzadore de su premiu, at bantadu Ranieri, non solu po custu attu de currettesa, ma puru po s’esempiu custante de lealtade e rispettu po su ribale, balores chi dant trauda positiva a su giogu de sa botza e a s’isport.

Su premiu Allenadore Gentleman “Gigi Simoni”, marcat s’incomintzu de s’edisssione numeru 29 de su Premiu Gentleman Fair Play, chi si at a tennere in s’iscola Militare Teuliè de Milano. At a presentare Massimo Caputi paris cun Laura Barriales e Giorgia Rossi, e at essere tzelebrada giobia 16 de maju e at biere s’assignadura de medas riconnoschimentos, in mesu de sos cales sos Giocadores Gentleman de sa Serie A e su premiu Gentleman Mario Morosini, dedicadu a su giogadore chi incarnat a su menzus su Fair Play in sa Lega B.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22