Su fatu est acontèssidu in Toscana. S’istòria tenet comente protagonistas is meres de unu tzilleri e unu furone famidu, ma posca pentidu.

S’òmine at furadu una safata de brioches dae unu tzilleri in prenu tzentru a Pistoia, ma dd’at fatu pro bisòngiu.

Difatis sa die a pustis, is titulares de s’Alibabar in sa vetrina ant agatadu deghe èuros e unu billete cun iscritu: “Iscusade, s’àteru mangianu tenia fàmene e non tenia dinare, gràtzias”.

Su fatu est capitadu lunis a mangianeddu. Is gestores no agatende sa sòlita safata prena de durches esposta in unu cuntenidore, ant pensadu chi su durcheri si nd’esseret ismentigadu o ddoe esseret istadu un’errore in sa cunsigna. Ma posca ant iscobertu sa fura.

Su mangianu a pustis però s’ispantu est istadu mannu, cando is baristas ant agatadu su billete de iscusas non firmadu e sos 10 èuros pro pagare su dèpidu.

Corpidos dae su gestu, is gestores ant publicadu sa foto de su billete in sa pàgina sotziale de s’atividade cummertziale, cummentende: “Custa est sa situatzione chi est bivende s’Itàlia oe. Gente custrinta a “furare” pro fàmene, e torrare a pagare su dèpidu cun dignidade. Tristura infinida”.

Ma non si sunt firmados a custu ebbia, ant sotadu s’òmine a si presentare in su tzilleri, oferende•ddi unu traballu: unu postu comente agiudu durcheri.

Chissai si immoe sa persone in chistione s’at a presentare e at a atzetare s’agiudu propostu dae is titulares de su locale. Dae banda nostra s’isperu chi custu fatu tèngiat una fine alligra, ca semus seguros chi su furone famadu si sa die pustis at chertu pagare sos durches est istadu custrintu dae su bisòngiu.

Si imbetzes non rispònderet a s’apellu de su tzilleri, mancari est resèssidu a agatare unu traballu e a risòlvere sas dificultades econòmicas sua.

A ogna contu diat èssere bellu si benneret lassadu una safata de durches ogni mangianu – pro chie non si ddu podet permìtere – in foras de is locales de totu Itàlia, pro permìtere a calicunu isfortunadu de fàghere un’ismùrgiu dignitosu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’Itàlia est lòmpida a su de tres postos in sa Lega de is Natziones, a pustis àere bìnchidu 2-1 contra su Bèlgiu in su Juventus Stadium de Torino.

Su matessi resurtadu de sa partida de is Europeos, cun s’Itàlia chi at torradu a agatare su bellu giogu fatu bìdere custa istade colada.

Pro is òmines de Roberto Mancini is retes sunt istadas marcadas dae su sardu Barella e dae Berardi – gràtzias unu rigore -, imbetzes pro sa natzionale belga su gol est istadu realizadu dae De Ketelaere.

In veridade tocat a nàrrere chi s’iscuadra foras de domo at corpidu unu palu e duas traversas cun is giogadores Saelemaekers, Batshuayi e Carrasco.

In custa gara, pro sa prima borta, su portieri Donnarumma at postu sa fàscia de capitanu de is asulos, e a diferèntzia de sa partida in s’istàdiu Meazza, acanta fiat istadu pigadu a sùrvios pro more de àere lassadu in malu modu su Milan – sa gente in is gradinadas dd’at fatu festa.

In sa gara contra su Bèlgiu s’allenadore Mancini at fatu giogare un’iscuadra giòvana, cun òmines chi ant tentu pagu ispàtziu in is Europeos. Custa est istada una cosa importante meda pro su tempus benente, comintzende dae is partidas de cualificatzione a su Mundiale in Qatar in s’atòngiu de su 2022.

Comente in s’ùrtimu Europeu chi s’Itàlia at bìnchidu contra s’Inghilterra, su juventinu Chiesa est istadu unu de is mègius giogadores, e at mustradu chi cando istat bene est difìtzile a ddu firmare.

Tzertu, cussu chi mancat a custa natzionale asula, est unu tzentru a in antis balente meda, a s’imbesse su tzentru-campu e sa defensa sunt repartos de livellu mundiale.

Imbetzes sa finale de sa Lega de is Natziones est istada bìnchida dae sa Frantza chi at superadu s’Ispagna cun su resurtadu de 2-1, gratziàs is retes marcadas dae Benzema e Mbappé. Pro is ispagnolos at realizadu su gol Oyarzabal.

Sa natzionale frantzesa sutzedet in s’albu de oro a su Portogallu de Cristiano Ronaldo.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22