Sa tzertificatzione birde est unu de is trastos impreados dae su guvernu pro agiudare s’essida de s’Itàlia dae sa pandemia de su Covid-19.

Ma non totus sunt de acòrdiu e in totu su paisu sunt medas is protestas contra su gosi mutidu “green pass”.

Fintzas in Sardigna non mancant is crìticos a sa carta birde, tra custos ddoe sunt de seguru is “no vax” est a nàrrere is chi sunt contràrios a si vatzinare contra su virus, ma fintzas cussos chi s’oponent a s’òbrigu de sa tzertificatzione in su postu de traballu.

Pro custu belle 2000 persones oe ant manifestadu in is caminos de su tzentru de Casteddu contra s’òbrigu de sa carta birde in logu de traballu.

Unu corteu mòvidu dae pratza de su Cramu est lòmpidu a dae in antis s’assessoradu regionale de sa Sanidade e posca s’est firmadu suta su palatzu de sa Regione.

Mentras is manifestantes fiant colende in bia de Pola, dae su corridòriu de unu palàtziu calicunu at iscutu una sìcia de abba. Is manifestantes infustos ant aboghinadu contra sa bentana de s’abitatzione dae ue est istada iscuta s’abba, invitende s’autore de cussu gestu a sì fàghere bìere.

Mancari is protestas però, sa campagna vatzinale sighit a andare a in antis, cun nùmeros òtimos, mescamente in sa categoria 12-19 annos, chi segundu is informatziones est andende prus mègius de sa mèdia natzionale.

In su matessi tempus oramai est allarghendesi su nùmeru de is persones chi s’at a dèpere sutapònnere a sa de tres doses, in previsione de sa de chimbe undadas de sa pandemia chi est istada annuntziada dae sos espertos, paris cun s’abbassada de sas temperaduras.

Comente afirmant is autoridades, su prus de is italianos ant cumpresu chi pro essire dae custa crisi econòmica e sotziale grave meda causada dae s’apretu coronavirus, s’ùnicu caminu chi tocat a sighire est cussu de s’iscièntzia e su mèdiu prus lestru est su vatzinu, e sa “carta birde” at cumbintu in medas a si vatzinare.

In prus de totu tocat a sutaliniare chi in pessu chi s’80% de sa populatzione at àere fatu sa dòpia dose de vatzinu, s’òbrigu de sa tzertificatzione birde at a bènnere abolidu in su logu de traballu.

Duncas tocat a aguantare e cun unu sacrifìtziu piticu dae banda de totus nos at a permìtere de nos lassare a palas in modu definitivu su Covid-19 e is efetos drammàticos suos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’Itàlia est lòmpida a su de tres postos in sa Lega de is Natziones, a pustis àere bìnchidu 2-1 contra su Bèlgiu in su Juventus Stadium de Torino.

Su matessi resurtadu de sa partida de is Europeos, cun s’Itàlia chi at torradu a agatare su bellu giogu fatu bìdere custa istade colada.

Pro is òmines de Roberto Mancini is retes sunt istadas marcadas dae su sardu Barella e dae Berardi – gràtzias unu rigore -, imbetzes pro sa natzionale belga su gol est istadu realizadu dae De Ketelaere.

In veridade tocat a nàrrere chi s’iscuadra foras de domo at corpidu unu palu e duas traversas cun is giogadores Saelemaekers, Batshuayi e Carrasco.

In custa gara, pro sa prima borta, su portieri Donnarumma at postu sa fàscia de capitanu de is asulos, e a diferèntzia de sa partida in s’istàdiu Meazza, acanta fiat istadu pigadu a sùrvios pro more de àere lassadu in malu modu su Milan – sa gente in is gradinadas dd’at fatu festa.

In sa gara contra su Bèlgiu s’allenadore Mancini at fatu giogare un’iscuadra giòvana, cun òmines chi ant tentu pagu ispàtziu in is Europeos. Custa est istada una cosa importante meda pro su tempus benente, comintzende dae is partidas de cualificatzione a su Mundiale in Qatar in s’atòngiu de su 2022.

Comente in s’ùrtimu Europeu chi s’Itàlia at bìnchidu contra s’Inghilterra, su juventinu Chiesa est istadu unu de is mègius giogadores, e at mustradu chi cando istat bene est difìtzile a ddu firmare.

Tzertu, cussu chi mancat a custa natzionale asula, est unu tzentru a in antis balente meda, a s’imbesse su tzentru-campu e sa defensa sunt repartos de livellu mundiale.

Imbetzes sa finale de sa Lega de is Natziones est istada bìnchida dae sa Frantza chi at superadu s’Ispagna cun su resurtadu de 2-1, gratziàs is retes marcadas dae Benzema e Mbappé. Pro is ispagnolos at realizadu su gol Oyarzabal.

Sa natzionale frantzesa sutzedet in s’albu de oro a su Portogallu de Cristiano Ronaldo.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22