Abertas e presidiadas totu sas Càmeras de su traballu in Itàlia e addòbiu in sa sede natzionale de Roma.

In custu modu sa Cgil, paris cun is àteros sindacados, rispondet a s’atacu de eris, mentres benit aparitzada una manifestatzione pro sàbadu imbeniente.

Is sindacados: “Cgil, Cisl e Uil ant a organizare sàbadu su 16 de mese de ladàmine in Roma, una manifestatzione manna natzionale e antifascista pro su traballu e sa democratzia”.

Is dirigentes de is sindacados denùntziant chi s’atracu iscuadrista a sa sede natzionale de sa Cgil est a totu su sindacadu cunfederale italianu, a su mundu de su traballu e a sa democratzia nostra.

Pedint chi is organizatziones neofascistas e neonazistas siant postas in is cunditziones de non nòghere isorvende•las pro lege.

Is sindacados afirmant chi custu siat su momentu de afirmare e realizare is printzìpios e is balores de sa costitutzione Nostra. Invitant, duncas, totu is tzitadinos e is fortzas sanas e democràticas de su Paisu a si mobilitare e a calare a pratza sàbadu chi benit.

Maurizio Landini, segretàriu generale de sa CGIL at decraradu chi est istada ferta sa democràtica e ofesa sa Costitutzione. “Sa de eris est una ferta democràtica, un’atu de ofesa a sa Costitutzione nàschida dae sa Resistèntzia, un’atu chi at violentadu su mundu de su traballu e is deretos suos.

Su segretàriu de su sindacadu italianu prus mannu at decraradu in prus chi su de eris est unu disinnu cuncordadu dae grupos organizados chi ant postu in campu un’atzione iscuadrista e fascista e at agiuntu chi si calicunu pensat de fàghere tìmere sa CGIL, su movimentu de is traballadores sunt is chi ant derrotadu su fascismu in custu Paisu, ant torradu a conchistare sa democratzia, duncas non tenet timoria.

Landini at torradu gràtzias a sa Cisl e a sa Uil, difatis is tres siglas sindacales ant detzìdidu chi sàbadu ant a èssere totus unidos in pratza in Roma.

Su segretàriu at torradu a nàrrere chi no est su momentu de istantargiare nen muros nen cungiados in Itàlia e in Europa. Non ddoe at bisòngiu de partzire ma de unire custu Paisu e si podet unire betende a terra is disegualidades e fàghere bìvere is printzìpios fundamentales de sa Costitutzione.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’Itàlia at pérdidu contra s’Ispagna pro 1-2, in sa gara giogada in s’istàdiu Giuseppe Meazza de Milanu, in ocasione dae is finales de sa Lega de is Natziones.

Custa partida at a colare a s’istòria pro ite est sa prima derota pro s’allenadore Roberto Mancini, a pustis de 37 partidas de sighidu sena pérdidas.

Sa fine de sa sèrie de vitòrias sighidas est arribbada pro manu de is ispagnolos, chi giae in is ùrtimos Europeos sunt istados is aversàrios prus istragosos pro s’Itàlia. Difatis, is asulos fiant resèssidos a bìnchere sa semifinale e duncasa a lòmpere in finale contra s’Inghilterra, petzi a pustis de is rigores.

Tando, naramus chi s’Ispagna s’est vengada contea s’Itàlia pro ite forsis in is Europeos no at otentu su chi diat àere meritadu.

Ma torramus a allegare de s’isfida de sa Lega de is Natziones: in su primu tempus is ispagnolos ant marcadu duas retes cun su giogadore Ferran Torres, bravu e lestru a isfrutare is botzas serbidas dae is cumpàngios e collionare su portieri asulu Donnarumma.

Durante sa partida su giogadore de su Paris Saint German est istadu suliadu meda dae is tifosos de s’iscalinada de s’istadiu milanesu. Est galu friscu s’adiosu a su Milan – mancari is dirigentes apant propostu 8 miliardos de èuros pro rennoare su contratu in iscadèntzia – e is tifosos non dd’ant perdonadu de èssere andadu a giogari in s’iscuadra frantzesa a gratis.

Tocat a nàrrere chi semper in su primu tempus s’Itàlia est abbarrada in deghe òmines, pro more de s’essida de su defensore Bonucci, bogadu dae su campu a pustis de duos grogos pro duos fallos -.

S’Itàlia no at tentu mancu sorte bona, pro ite at corpidu duos palos, e sa rete de su romanista Pellegrini est lòmpidu casi a sa coa de sa partida, e in is pagos minutos de giogu chi abbarraiant non sunt bastados pro paregiare. Naramus però chi is fùrias rujas ant meritadu de colare in finale, in ue ant agatare o su Bèlgiu o sa Frantza. S’Itàlia at a giogare sa finale minore contra s’iscuadra chi diat a pérdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22