Whatsapp e Facebook ant tentu unu guastu pro unu sero.

Su guastu, chi at interessadu totu su Mundu, est duradu chimbe oras bonas. Su mere de Facebook, Mark Zuckemberg, at dèpidu dimandare iscusa pro su chi est capitadu, cun unu mesàgiu publicadu in un’ispàtziu sotziale chi at giai fatu istòria.

Ma dae ite est istadu causadu custu guastu chi at firmadu Facebook e is ispàtzios sotziales suos – Instagram, Whatsapp e Messenger -?

Comintzamus a nàrrere chi no est istadu pro neghe de nissunu atacu de is hacker, comente s’est pensadu in is oras sighentes a su funtzionamentu malu de su servìtziu. Imbetzes est istada una configuratzione isballiada de is router chi controllant su tràficu de sa rete tra is tzentros de is datos suos. Unu farta chi at fatu guastare sa rete e iscuradu is famados ispàtzios sotziales de Zuckemberg.

Comente ant naradu is espertos de su setore, custa interrutzione de su tràficu de sa rete at tentu un’efetu “a istrumpu” in su modu de comunicatzione in is tzentros de is datos, chi ant firmadu is servìtzios de Facebook e de is àteros ispàtzios sotziales.

Su chi est seguru però, est ca sa gente chi est a totu die cun su telefoneddu inteligente in manos, s’est agatada dae unu minutu a un’àteru sena pòdere prus impreare cussas aplicatziones. Pro more de custu guastu at portadu meda discòidu, comente a calicunu chi at pòdidu prus tzarrare cun sa persone istimada, ma a parte is brullas custa disservìtziu at causadu medas problemas in su traballu.

Is chi nche ant pérdidu de prus sunt Zuckemberg e is atzionistas de Facebook, pro more de su tìtulu in calu.

Però pro una pariga de oras milliardos de persones in su Mundu sunt abarrados unas cantas ora sena impreare is ispàtzios sotziales e e is plataformas de messagìstica, e pro unu pagu totus sunt a su tempus chi custos mèdios digitales non si connoschiant.

Est istadu unu bene o unu male? Naramus chi, comente totu is cosas, si sa tecnologia est impreada bene podet èssere de grandu profetu. Su problema però est chi in ùrtimos annos mannos e minores sunt ammachiendesi tropu cun custas cosas: diat tocare a comintzare a pensare a un’impreu prus sostenìbile cun sa vida reale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Est istada una manifestatzione manna a beru sa de ocannu, organizada dae sa sienda Agris de Tanca Regia in Abbasanta.

Sunt istados 287 is caddos presentes a su 59° Prémiu Regionale Sardu de allevamentu de caddos, mancari su Covid, in custos duos annos s’allevamentu at poderadu bene.

A organizare s’atopu de custa domìniga colada, est istada s’Agentzia Agris Sardigna-Servìtziu Chirca pro sa Calidade e Valorizatzione de is Produtziones de Caddos, in collaboratzione cun su Comitadu Regionale FISE Sardigna, suta de s’atentzione de su Mipaaf.

Su campione regionale sardu nou est Cloes, de ratza sedda italianu dae Clarimo e Nora De Bois (dae Orame) pesada dae Raffaele Mulas de Cabuterra e presentada dae Pietro Arba.

S’ebba dae tres annos at bìnchidu sa cumbinada chi at postu in paris is resurtados de su “brìnchidu in libertade”, in ue est lòmpida segunda e sa proa “morfo-atitudinale” in ue s’est classificada in su de tres.

Cloes at pigadu in totale 237,6 puntos, segunda est lòmpida Coupe de Rain, pesada dae Enrico Olla e de propiedade de Giangavino Serra, presentadu dae Antonio Niedda. In su de tres Hannibal Lecter, pesadu dae Antonio Piras e de propiedade de Enrica Dettori, presentadu dae Riccardo Dettori

Su “brìnchidu in libertade – sena cadderi- est istadu bìnchidu pro sedda italianu dae Campidanu, pesadu dae Efisio Lepori de Santa Giusta e presentadu dae Agostino Mascia.

Tra is anglu-arabos de tres annos, vitòria pro Coro Eranu, pesadu dae Luigu Ladu dae Benetuti e presentadu da Andrea Pes.

Pro is caddos de duos annos, at bìnchidu sa proa dae prontesa a su brìnchidu, s’ebba Deboi, pesada e presentada dae Leonardo Galleri de Biddanoa Monteleone. Su primu de is anglu-arabos est istadu imbetzes Doria de Francesco Murgia, issu puru de sa bidda de su poeta a bolu Remundu Piras.

A premiare is binchidores est istadu su dirigente de is Servìtzios Ìpicos Agris, Raffaele Cherchi, su presidente de sa Fise Sardigna Stefano Meloni e sa sìndiga de Abbasanta Patrizia Carta.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22