S’isport natzionale prus mannu est pro torrare in su retàngulu birde: sa Sèrie A est pro torrare sàbadu su 21 de austu cun is antìtzipos de is garas de sa prima giorronada.

Is amantiosos de fùbalu ant a torrare a bìdere is iscuadras issoro a pustis de sa vitòria de s’Itàlia a is ùrtimos Europeos. Totus ant a tènnere galu in is ogros sa partida contra s’Inghilterra, chi at regaladu un’istade chi at a abarrare in s’istòria de s’isport, paris cun is Olimpìades de Tokyo.

Su campionadu chi est pro cumintzare, est unu torneu difitzile meda de intrepetare: prima de totu pro ite is iscuadras prus balentes ant cambiadu meda, e custa borta non is giogadores ebbia, ma puru is allenadores.

Bastat pensare a s’Inter, Campione de s’Itàlia, chi at saludadu prima su técnicu, Antonio Conte e a pustis su tertzinu, Achraf Hakimi, cun s’atacante prus forte de sa Rosa: Romelu Lukaku. Tzertu est lòmpidu s’allenadore Simone Inzaghi, su tzentru a in antis Edin Dzeko e àteros giogadores bonos, ma s’iscuadra est isdebilitada.

Sa Juventus cun sa torrada de Massimiliano Allegri fortzis est sa candidada nùmeru unu a bìnchere su campionadu, mancari no at fatu unu mercadu mannu pro pigare giogadores famados, ma Cristiano Ronaldo e Paulo Dybala chi sunt in bona cunditzione sunt sa còpia de atacantes prus forte de sa Sèrie A. Non tocat a s’ismentigare chi Giorgio Chiellini, Leonardo Bonucci e Federico Chiesa ant a torrare a falare in campu comente campiones de s’Europa.

Imbetzes su Milan, chi est abarradu cun s’allenadore de s’annu coladu, Stefano Pioli est un’iscuadra chi at cambiadu pedde, cun su portieri de sa natzionale asula, Gigio Donnarumma, e su tzentrucampista Hakan Calhanoglu partidos in àteros club, ma chi at a èssere semper ghiadu a in antis dae Zlatan Ibrahimovic. Su giogadore prus balente però immoe tenet un’annu in prus e sa salude de atleta no est comente cando fiat gióvanu.

Is àteras iscuadras chi ant a gherrare pro s’iscudetu ant a èssere: sa Roma allenada dae Josè Mourinho, sa Lazio ghiada dae Maurizio Sarri e su Napoli cun su tècnicu Luciano Spalletti. Totus òmines de fùbalu sàbios e abistos, cun is primos duos chi ant bìnchidu giai su campionadu italianu,

S’Atalanta de Gian Piero Gasperini diat a èssere sa surpresa pro lòmpere a sa vitòria de s’iscudetu, a pustis de is ùrtimos annos giogados bene a beru.

Amus a bìdere is caddos a sa lòmpia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

No agabbant is brigas pro more de su cuntzertu a indonu de Salmo a Terranoa.

S’ispetàculu de su 13 de austu, chi s’artista terranoesu at fatu pro is biddas de sa provìntzia de Aristanis corpidas de is fogos a coa de su mese coladu.

In crìticas sunt lòmpidas pro ita su cuntzertu at fatu atopare personas a muntone, chi no ant poderadu sa distàntzia de seguresa pro evitare is cundiduras de su Covid-19, mancari fiant sena mascaredda.

Is primos a andare contra Salmo, sunt istados sa giornalista Selvaggia Lucarelli e su cantante Fedez, fàghente briga pro àere fatu su cuntzertu in custu perìodu de apretu dèpidu a su coronavirus, cun s’arriscu de àteros fogos epidemiomògicos in Sardigna.

Su rapadore dae Terranoa at torradu isceda a lestru. At naradu chi dae su palcu at consigiadu a a totu sa gente presente a fàghere su vatzinu contra custa pesta, e chi sa sua est una gherra contra is règulas chi ant firmadu su mundu dae s’ispetàculu. Segundu s’artista sardu pro su fùbalu e sa vitòria de is Europeos non sunt istadas rispetadas normas de seguresa, e memos s’est chesciadu.

A pustis in is ispàtzios sotziales sunt cumentzadas is brigas, cun faeddos graes meda tra Salmo e Fedez. In pagos ant fatu sa parte a su terranoesu, tra custos su cantautore Francesco De Gregori.

Su guvernadore de sa Sardigna, Christian Solinas, chi est istadu postu in mesu a su chertu dae Fedez pro comente fiat istadu possìbile a permìtere su cuntzertu, at atacadu Salmo e at negadu chi sa Regione fiat istada informada. Sa matessi cosa, at naradu su sìndigu de Terranoa, Settimo Nizzi.

Su cuntzertu de su 13 de austu, at fatu mòvere sa Procura de Terranoa puru, e in is dies benentes ant a sighire is chircas pro cumprèndere si calicunu at autoritzadu a fàghere s’ispetàculu.

Pro immoe Salmo at naradu chi sa sua est istada una provocatzione e chi nisciun’àteru est responsàbile. Semus seguros is brigas pro custa istòria ant a andare a in antis peri in is dies sighentes.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22