Fabio Aru est prontu a serrare s’aventura sua in su mundu de su tziclismu de professionista.

Dd’at a fàghere a 31 annos a s’agabbu d sa Vuelta a España, a su bia sàbadu dae Burgos. S’aventura sua tra is professionistas a s’inghitzu est istada ispantos, ma in is ùrtimos bator annos, limitada dae problemas medas fìsicos.

Su ritiru suo in is caminos ispagnolos tenet unu significadu profundu: est in cue chi Aru at otentu sa vitòria prus importante, in sa Vuelta de su 2015.

Su tziclista sardu at afirmadu chi at a èssere bellu serrare sa carriera in su Paisu chi m’at regaladu sa cuntentesa mea prus manna, ma a pustis de 16 annos in bitzicleta at fatu a ischire chi est arribbadu su momentu de pensare pro primu a sa famìlia.

S’ùrtima de is 9 vitòrias de professionista de Aru est de su 2017 in su Tour de France, in sa tapa de Planche des Belles Filles.

Cussu cuintu postu a su tèrmine de sa Cursa groga est istadu s’ùrtimu atu de protagonista in is cursas a tapas de su biddacidresu.

A dolu mannu a pustis sunt arribbadas is delusiones cun sa màllia Uae-Emirates, dèpidas fintzas a su grave problema a s’artèria iliaca, risòlvidu cun un’interventu chirùrgicu in su beranu de su 2019.

In su 2021, at fatu isperare meda is tifosos, a pustis de s’aventura lestra in su tziclocross e su càmbiu de màllia cun sa sudafricana Qubeka-NextHash. A dolu mannu però pro Aru est lòmpidu su momentu de serrare custa parte de sa vida sua, mancari at afirmadu chi su tziclismu at a restare semper sa passione sua.

A dare sa noa de s’adiosu est istadu issu etotu, in unu comunicadu de s’iscuadra. Aru oramai at seberadu sa famìlia: sa cumpàngia sua Valentina e sa fìgia Ginevra, nàschida in su mese de ladàmine de su 2019.

In is ogros de is apassionados, ant a abarrare is atacos in logu monte, is marranias suas, e is duos pòdios in su Giru de Itàlia. Bella fintzas s’amighèntzia-rivalidade cun Vincenzo Nibali, chi issu puru chitzo at a fàghere a ischire cale at a èssere su benidore suo in su tziclismu.

A ogna contu pro Aru abarrant tres chidas de Vuelta, dae Burgos a Santiago de Compostela. S’ùrtima fadiga subra de sas duas rodas de Fabio Aru.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Ite narant is sondàgios polìticos in Itàlia in s’ùrtimu annu?

Cun su Parlamentu in vacàntzia finas a su cumintzu de cabudanni, ocannu is fèrias de sos onorèvoles ant a durare belle unu mese, nos podimus fàghere un’idea cunfrontende sa rilevatzione fata dae s’istitutu Swg in sa data de su 3 de austu 2020 cun cussa de su 2 de austu 2021, cust’ùrtima publicada dae su Tg La7.

Castiende is duos sondàgios, essit a campu comente in is ùrtimos dòighi meses Giorgia Meloni apat balangiadu votos in is cunfrontos de Matteo Salvini, cun sa crèschida de in prus de ses puntos pertzentuales de Fratelli d’Italia chi est istada belle aguale a su calu atribuidu a sa Lega.

Belle unu puntu pertzentuale de mancu imbetzes pro su Movimentu 5 Isteddos, mentras su Partidu Democràticu at pèrdidu calicunu votu. In s’ùrtimu annu diat èssere imbetzes megiorada Forza Italia, gràtzias cun probabilidade de sa nàschida de su guvernu Draghi.

In su campu de is moderados su cunfrontu tra is duos sondàgios nde essit pregiadu Carlo Calenda, cun Itàlia Viva de Matteo Renzi chi imbetzes làssinat a suta de su limenàrgiu de isbarramentu de su 3%.

In s’ùrtimu annu Giorgia Meloni diat àere isciaddidu a Matteo Salvini cun duos milliones de votos in prus. Custu est su chi nde istupat a foras cunfrontende su sondàgiu polìticu fatu dae Swg in data 3 de austu 2020 e cussu, realizadu semper dae su matessi istitutu, publicadu su 2 austu coladu.

Sa crèschida de Fratelli d’Italia, craru giai in su 2020, diat àere cumentzada giai dae beranu, cando Giorgia Meloni at detzìdidu de tènnere su partidu suo foras de sa majoria chi sustentat su guvernu Draghi.

In su matessi tempus si diat èssere abrandada sa crisi de sa Lega, sende chi in is ùrtimas dies Matteo Salvini e Silvio Berlusconi ant fatu cumprèndere de bòlere atzellerare in su progetu de federatzione tra su Carroccio e Forza Italia.

Su passàgiu de incàrrigos tra Nicola Zingaretti e Enrico Letta diat pàrrere àere firmadu sa pèrdida de cunsensos atestada a su Partidu Democràticu, mentras su cunfrontu tra is duos sondàgios tzertìficat sa crisi de cunsensos de su Movimentu 5 Isteddos respetu a is eletziones polìticas de su 2018.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22