S’Itàlia est su de bator postos de sa classìfica pro atacos subidos dae minetzas ransomware in s’ùrtimu annu.

Ma de ite semus faeddende? Unu ransomware est unu tipu de malware chi blocat s’atzessu de s’aparatu chi infetat, pedende unu riscatu pro nde pesare sa limitatzione.

Prima de s’Itàlia, in sa classìfica ddoe sunt Regnu Unidu, Frantza e Germània. Custos datos sunt istados difùndidos dae sa classìfica fata dae Mandiant, sotziedade de s’azienda de seguridade informàtica FireEye.

S’abitùdine de imbiare e de rùere in sa trampa de is ransomware est in contina crèschida.

In totu s’àrea Emea, chi cumprendet Europa, Àfrica e Mèdiu Oriente, sos ransomware rapresentant sa casta de atacu cyber prus in crèschida, cun unu +422% tra freàrgiu 2020 e maju 2021, comente referit s’azienda.

Si s’analizant is setores, cussu de sa manifatura si cunfirmat a su primu postu, sighidu dae is servìtzios legales e professionales e indùstria ingegneristica.

Segundu is espertos, is grupos criminales chi òperant pro mesu de su ransomware ant a sighire a crèschere e si difùndere finas a cando su problema no at a èssere afrontadu dae su mundu polìticu.

Pro sa seguridade de totus, diat èssere ùtile, frenare custas atziones criminales, ma at a serbire un’interessamentu mannu de totus. Duncas su cybercrime est unu disafiu globale chi tenet bisòngiu de s’impignu de totus, massimamente contra is paisos chi donant protetzione a is cyber criminales o chi atzetant, cun passividade, is atziones issoro, fintzas a cando non s’at a furriare contra a chie ddos protèget etotu.

Una racumandatzione chi devet èssere iscurtada dae cuddas natziones chi ant a bìdere un’aumentu continu de is atacos de custos grupos criminales, cun cunseguèntzia econòmicas malas non de pagu contu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa Natzionale italiana at cungiadu su Girone A de is Europeos de fùbalu cun noe puntos, duncas a puntégiu prenu. Difatis is Asulos ant bìnchidu finta s’ùrtima partida contra su Galles cun su resurtadu de unu a zeru, gràtzias a su bellu gol de tacone de Pessina, serbidu in s’àrea aversària dae Verratti.

Custa bia s’allenadore Mancini at cambiadu sa formatzione titulare e at fatu intrare casi totu is giogadore chi non fiant galu falados in campu. Mancari custu cambiamentu s’iscuadra at giogadu bene, custrìnghende is gallesos a si cungiare in difesa. Tzertu, is aversàrios ant àpidu carchi ocasione mescamente cun su capitano Bale, ma non sunt renèssidos a marcare sa rete de su parègiu.

Custa Itàlia est cumentzende a fàghere timòria a is àteras natzionales favoridas a bìnchere is Europeos de ocannu. Medas espertos de fùbalu ant naradu faeddos de istima pro is Asulos, pro comente gherrant in ogna botza e pro comente sunt unidos tra issos.

Is agentzias de iscummissa puru ant declaradu sa natzionale asula sa segunda probàbile binchidora de is Europeos, fatu fatu a sa Frantza.

Immoe però tocat a pensare a is otavos de finale, in ue s’Itàlia at a agatare s’Àustria, lòmpida segunda in su Girone C – bìnchidu dae s’Olanda – e a in antis de s’Ucraina allenada dae is ex giogadores de su Milan, Shevchenko e Tassotti.

Is austrìacos sunt un’iscuadra de rispetare, pro ite sunt lestros e fortes in difesa, duncas mancari s’Itàlia in su paperi  siat prus forte meda, diat èssere mègius a non si fidare. Su giogadore prus importante pro s’Àustria est su tertzinu e capitanu Alaba, chi custa istade est istadu comporadu dae su Real Madrid a pustis de trèighi annos colados in su Bayern Monaco. Àteros giogadores chi tocat a tènnere in contu sunt su giòvunu tzentrucampista Baumgartner e s’ex atacante interista Arnautovic.

Amus a bìdere comente at a acabbare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”