In su capulogu barbaritzinu una fèmina est resurtada positiva a sa variante de su Covid

Una noa pagu bella est lòmpida erisero dae s’ispidale de Nùgoro, in ue est istadu agatadu su primu casu de variante Delta – ex indiana – in custa zona de Sardigna.

Difatis una fèmina istràngia arribada in s’Ìsula in custa dies est resurtada positiva e istada ricoverada notesta in su Santu Frantziscu de Nùgoro.

Custu casu nou arribat a pustis de is àteros casos suspetos de is àteras dies agatados in su Nord Sardigna, chi isetant de èssere averiguados dae su laboratòriu de virologia de s’Aou de Tàtari, e is dòighi positivos in su Sud Sardigna delineados dae su diretore de su laboratòriu de anàlisi chìmicu-clìnicas e microbiologia de s’Aou de Casteddu Ferdinando Coghe.

Pro immoe, is persones chi ant tentu cuntatu cun sa fémina cuntàgiada sunt resurtados totus negativos a su virus, ma is autoridades sunt sighende a fàgere controllos pro cumprèndere si calicun’àteru chi at biagiadu paris cun issa, pro lòmpere in Sardigna, est istadadu contagiadu.

Pro s’ora in Nugòro sa situatzione diat èssere suta controllu, sende chi non si tratat de un’epitzentru significativu, ma is autoridades sanitàrias racumandat prudèntzia.

Comente ant naradu is espertos, pro èssere seguros contra sa variante Delta ant a èssere semper prus importantes e detzisivos is controllos pro chi intrat in s’Ìsula, mescamente dae is Paisos cun fogos de infetzione o cun unu cuadru epidemiològicu pagu seguru.

Un’àtera cosa de fàghere pro reduire o torrare a zero sa tzirculatzione de su virus, chi in custas dies est sighende a calare, sunt is controllos in is portos e in is aeroportos, paris cun su tratzamentu de is positivos.

Seguru custos resurtados bonos dipendent dae sa campagna de vatzinatzione, sende chi giai sa metade de is sardos at fatu sa primu dose de su vatzinu contra su Covid-19.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa Natzionale italiana de fùbalu at bìnchidu contra s’Isvìtzera puru, cun su resurtadu de 3 a 0 in s’Istàdiu Olìmpicu de Roma.

Gràtzias a custos tres puntos s’Itàlia est istada sa primu iscuadra chi s’est cualificada pro is otavos de finale de s’Europeu. Immoe in sa partida benente contra su Galles, s’at a giogare sa possibilidade de lòmpere a su primu postu de su Girone A.

Sa gara contra is isvìtzeros at amostadu torra su giogu bonu de is òmines de Mancini, capatzos de cumandare in totu is noranta minutos e de apricare ogni botza.

Bastat a pensare chi is Asulos a pagu tempus dae su cumintzu de sa gara ant realitzadu sa rete de su vantàgiu cun su capitanu Chiellini, ma est istada annuddada pro ite at tocadu sa botza cun su bratzu.

Pròpiu su giogadore de sa Juventus in s’atzione sighente est dépidu essire a foras pro more de unu dolu a sa camba e est intradu in campu su latziale Acerbi.

Pagos minutos a pustis Berardi at pigadu botza in su tzentrucampu e s’est fuidu in sa fàscia de s’atacu binchende in velotzidade su tertzinu elvèticu Rodriguez, posca at serbidu in mesu pro Locatelli – cumpàngiu de iscuadra in su Sassuolo – e at marcadu s’unu a zeru.

S’Itàlia at àpidu s’ocasione de marcare àteros duos gol in su primu tempus, cun Immobile e Spinazzola, ma is duos asulos ant pecadu in sa mira.

In su segundu tempus est torra Locatelli a agatare sa segunda rete gràtzias a una punta de pee dae foras de s’àrea de rigore aversària. Mancari su resurtadu bonu, is òmines de Mancini ant sighidu a giogare pro fàghere àteros gol, e solu una bia ant arriscadu su contratacu de is elvèticos, ma su portieri Donnarumma s’est fatu agatare prontu.

Immobile puru at tentu su momentu suo de glòria, marchende su tres a zeru in sa parte finale de sa partida.

Sa partida sighente at a èssere contra su Galles de su capitanu Bale. Custa at a serbire a Mancini pro proare calicun’àteru giogadore chi no at galu giogadu, mancari sa gara at a èssere importante pro lòmpere primos in su girone.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”