Su Ministeru de sa Cultura, Dario Franceschini, est istadu craru subra de is noas essidas in contu de su tratamentu diferente pro sa presèntzia de su pùblicu in is eventos isportivos e in cussos culturales.

Difatis in s’auditzione de lunis e in is propostas imbiadas eris a su Cts, Franceschini at pedidu chi s’in casu deperent èssere autorizados eventos isportivos cun pùblicu, sa pròpiu règula diant dèvere bàlere pro is cuntzertos e is ispetàculos in is istàdios o in ispàtzios anàlogos.

S’arresonu de su ministru est custu: si est possìbile atzèdere in un’istàdiu cun 16 mìgia persones pro su fùbbalu devet èssere possìbile a ddu fàghere fintzas pro unu cuntzertu.

Una chistione de printzìpiu fintzas pro Enzo Mazza – dirigente de Fimi, sa Federatzione de s’indùstria musicale italiana – chi at afirmadu chi su mundu de sa cultura non podet èssere tratadu sena respetu e cunsideradu in modu diversu dae s’isport. Faeddos chi aiat naradu in ocasione de s’autorizatzione de su guvernu a sa presèntzia de su 25% de tifosos a s’Olìmpicu pro Euro 2020. Mazza, at faeddadu de discriminatzione e de farsa, pedende deretu un’atopu cun su guvernu.

S’amministradore de Fimi at naradu chi pro is eventos musicales in programma custu istiu cun solu milli o pagu prus persones a s’abertu si depent sighire protocollos severos a beru, e in su matessi momentu s’aprovat unu pranu pro s’atzessu de prus de 16 mìgia persones a s’Olìmpicu in ocasione de is europeos de fùbbalu.

Cunsideros custos fatos tenende contu de totu is disacatos causados a su mundu de s’ispetàculu e de sa mùsica in biu dae prus de un’annu de pandemia.

Unu setore iscambadu, traballadores ispèrdidos e sena risursas, tzìrculos piticos chi ant serradu pro semper e como, narat Mazza, at a bastare detzisione polìtica pro derogare is restritziones sanitàrias.

Su ceo de Fimi invitat is artistas e prepostos a is traballos de no atzetare una discriminatzione de custa gravidade e pedit una mesa de cunfrontu pro otènnere unu tratamentu uguale.

Mazza at torradu a nàrrere chi si est possìbile intrare in un’istàdiu cun deghinas de mìgias de persones pro su fùbalu, su matessi depet èssere possìbile fintzas pro unu cuntzertu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In deghe dies in s’Ìsula belle su 60% de malàidos noos in ispidale corfidos dae su virus

A dolu mannu in Sardigna, in su giru de pagu prus de una chida si registrat una crèschida de is ricòveros pro more de su Covid-19.

Difatis in una deghina de dies s’est registradu casi prus de su 60% de is persones intradas a ispidale. Difatis in is repartos normales si registrat prus de 56% de letos ocupados, mentras in is terapias intensivas is malàidos sunt addopiados.

Tocat a nàrrere chi pro fortuna sa mortalidade causada dae su coronavirus s’est abbassada ma sa crèschida esponentziale de is positivos noos est donende pensamentu meda, ca si si sighit gosi is ispidales sardos ant a andare a tribulia comente s’annu coladu.

S’ùnicu modu pro evitare chi is nosocòmios si prenent de malàidos est su de atzelerare sas vatzinatziones, chi a dolu mannu in s’Ìsula sunt andende tropu a pagu. Bastat a pensare chi is nùmeros de is suministratziones de su perìodu de Pasca ant sighidu a s’abbassare de prus.

Su chi est seguru, comente afirmant is espertos, at a tocare chircare de arribbare a vatzinare a su mancu mesu millione de persones a sa die. Custu pro chi a su mancu tra is primos de maju s’arribbet a belle sa metade de is italianos immunizados – vatzinados e curados -.

Su modellu de sighire est cussu de Israele, acanta sunt istados abertos tzentros pro sa vatzinatzione in totu su territòriu.

Su malu est chi sa gente non nde podet prus, mescamente medas imprendidores custrintos a lassare is serrandas ambasciadas, cun is agiudos chi arribbant a iscutas e non bastant.

In prus de totu est pretzisu a acorrare is zonas rujas in s’Ìsula, oramai semper prus a matzas bàrgias dae nord a sud cun 16 comunos oramai in cunfinamentu.

Is sìndigos faghent su chi podent, ma medas bias tocat a issos etotu a dèpere averguare is datos de is contàgios noos, sende chi in sa prataforma regionale non resurtant totus in manera contemporànea.

Custas chidas ant a èssere detzisivas pro s’istajone istadiale imbeniente, cun una crisi econòmica e sotziale chi corfit sa populatzione prus dèbile e pòbera.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”