At pesadu unu muntone de chèscias su pràngiu de mèrcuris coladu in un’albergo de Sàrdara – in prena zona arantzu – acanta ddoe fiant unas 40 persones tra polìticos e dirigentes mannos de sa Regione Sardigna.

Sa rebota est istada interrùmpida dae sa Guàrdia de Finàntzia, chi at identificadu deghennoe partetzipantes, is àteros imbetzes ant acudidu a si fuire pro non si fàghere connòschere. Unu de is chi si sunt fuidos diat aere brincadu dae sa bentana e si diat èssere istichidu in mesu a sa tupa pro s’iscrancare sa contraventzione de 400 èuros e prus che totu sa figura lègia.

Sa giustìtzia est valutende is giustificatziones donadas dae is presentes arribbados dae vàrias partes de s’Ìsula e sa Procura de sa Repùblica de Casteddu at abertu un’inchiesta, pedende a is capos de sa Guàrdia de Finàntzia una relatzione pretzisa de su chi est acontèssidu a Sàrdara.

A su chi s’ischit finas a immoe, calicunu at fatu una telefonada anònima a is finantzieris de sa Tenèntzia de Seddori, avisende de sa presèntzia de medas màchinas in su parchègiu de s’albergo. Difatis is normas contra su covid previstas pro sa zona arantzu non permitiant a is albergadores de serbire pastos a persones esternas non registradas.

In s’ora chi sunt essende a campu is nùmenes de is possìbiles polìticos e dirigentes presentes a su pràngiu, sunt medas is protestas de is vàrias fortzas polìticas. Calicunu partidu at publicadu comunicados acanta decrarant chi nemos de is esponentes issoro fiat presente a su “pràngiu de sa birgòngia”.

Su guvernadore de sa Sardigna, Christian Solinas, amargadu meda dae su fatu, diat èssere prontu a pigare provedimentos sèrios in is cunfrontos de is chi s’agataiant a s’ispuntinu.

Duncas, sa satzadura de Sàrdara arriscat de pònnere in trèulu partidos e majoria, finas a cando no at a èssere craridu su fatu e ognunu non s’at a pigare is responsabilidades suas. Su chi est capitadu, difatis, est una mancàntzia de rispetu de sa polìtica pro is sardos, in custu momentu de limitatziones e crisi chi sunt pesende meda subra sa populatzione e s’economia de su Paisu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Est coladu pagu prus de unu mese dae cando sa Sardigna fiat in zona bianca, imbetzes immoe est una de is pagas Regiones chi est torrada ruja, cando imbetzas belle totu s’Itàlia est in colore de arantzu.

Dae oe, difatis, e a su mancu pro duas chidas, s’Ìsula at dèpere baliare medas limitatziones a càusa de sa crèschida de is positivos a su Covid-19 e de s’ìnditze de contàgiu chi est su prus artu de Itàlia.

Ma andamus a bìdere cales ant a èssere is cosas cunsentidas e is chi non dd’ant a èssere durante sa permanèntzia in zona ruja.

Is iscostiamentos: faghet a s’iscostiare in intro de sa regione pro motivu de traballu, salude o netzessidade ebbia. No est possìbile andare a agatare amigos o parentes. Si podet andare a agatare su cumpàngiu o sa cumpàngia chi istat in àtera tzitade, si su logu est cussu de residèntzia. Faghet a andare a sa segunda domo – fintzas si s’agatat in un’àtera Regione – ma petzi su matessi nùcleu familiare e si sa domo est de propiedade issoro.
Si podet andare in is parcos pùblicos, ma solu si sunt a presu de s’abitatzione pròpia e si no ddoe at ordinàntzias sindacales chi ddu proibint, francu però chi non si ammuntonamentos.
In màchina est possìbile a s’ispostare cun persones non cunviventes est possìbile ma solu cun su ghiadore e duos passigeris in is sediles de palas. Totus devent pònnere sa mascheredda.

Interros: est possìbile partetzipare a is tzerimònias pro is interros fintzas in un’àtera tzitade, ma solu si su mortu est unu parente istrintu.

Tzilleris e ristorantes: abertos petzi pro s’asportu. Is tzilleris dae is 05 a is 18 e is ristorantes de is 05 a is 22. Non si podet papare e bufare sa cosa comporada a presu de is tzilleris e de is ristorantes.

Butegas: belle totu is butegas ant a dèpere serrare, abarrant abertos imbetzes is alimentares e is butegas chi bendet gèneres de netzessidade.

Manifestatziones in pratza: podent èssere fatas is gosi mutidas “manifestatziones istàticas”.

Logos de cultu: faghet a andare solu in cussos chi sunt a probe de domo e rispetende semper is inditos de su Dpcm.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”