Est coladu pagu prus de unu mese dae cando sa Sardigna fiat in zona bianca, imbetzes immoe est una de is pagas Regiones chi est torrada ruja, cando imbetzas belle totu s’Itàlia est in colore de arantzu.

Dae oe, difatis, e a su mancu pro duas chidas, s’Ìsula at dèpere baliare medas limitatziones a càusa de sa crèschida de is positivos a su Covid-19 e de s’ìnditze de contàgiu chi est su prus artu de Itàlia.

Ma andamus a bìdere cales ant a èssere is cosas cunsentidas e is chi non dd’ant a èssere durante sa permanèntzia in zona ruja.

Is iscostiamentos: faghet a s’iscostiare in intro de sa regione pro motivu de traballu, salude o netzessidade ebbia. No est possìbile andare a agatare amigos o parentes. Si podet andare a agatare su cumpàngiu o sa cumpàngia chi istat in àtera tzitade, si su logu est cussu de residèntzia. Faghet a andare a sa segunda domo – fintzas si s’agatat in un’àtera Regione – ma petzi su matessi nùcleu familiare e si sa domo est de propiedade issoro.
Si podet andare in is parcos pùblicos, ma solu si sunt a presu de s’abitatzione pròpia e si no ddoe at ordinàntzias sindacales chi ddu proibint, francu però chi non si ammuntonamentos.
In màchina est possìbile a s’ispostare cun persones non cunviventes est possìbile ma solu cun su ghiadore e duos passigeris in is sediles de palas. Totus devent pònnere sa mascheredda.

Interros: est possìbile partetzipare a is tzerimònias pro is interros fintzas in un’àtera tzitade, ma solu si su mortu est unu parente istrintu.

Tzilleris e ristorantes: abertos petzi pro s’asportu. Is tzilleris dae is 05 a is 18 e is ristorantes de is 05 a is 22. Non si podet papare e bufare sa cosa comporada a presu de is tzilleris e de is ristorantes.

Butegas: belle totu is butegas ant a dèpere serrare, abarrant abertos imbetzes is alimentares e is butegas chi bendet gèneres de netzessidade.

Manifestatziones in pratza: podent èssere fatas is gosi mutidas “manifestatziones istàticas”.

Logos de cultu: faghet a andare solu in cussos chi sunt a probe de domo e rispetende semper is inditos de su Dpcm.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su laboratòriu de s’Azienda ospedaliero-universitària de Casteddu at iscobertu una variante de SARS-CoV-2, chi finas a immoe non fiat istada galu essida a campu in Itàlia ma fiat giai presente in unos cantos paisos europeos comente Islovènia, Frantza, Isvìtzera e Regnu Unidu.

A.27, custu su nùmene tècnicu de sa variante, est istada iscoberta dae s’iscuadra de su diretore de su laboratòriu de su Policlìnicu Ferdinando Coghe in collaboratzione cun s’iscuadra de su professore Germano Orrù, responsàbile de su servìtziu de Biologia Molecolare.

Su 18 de martzu sa variante est istada cumproada subra de 4 malàidos – 1 defuntu – de su cabulogu sardu gràtzias a una prataforma noa pro su secuentziamentu gènicu.

Custa variante de su Covid A.27 presentat una cumbinatzione de duas mudaduras particulares, sa N501Y e sa L452R chi, in cumbinatzione cun unas cantas mudaduras agiuntivas, parent èssere responsàbiles de una trasmissione majore de su virus.

Comente narant is ricercadores casteddajos, is variantes, màssimu is chi interessant sa proteina Spike, est apessamentende sa comunidade sientìfica pro sa possibilidade chi custas mudaduras potzant induire una infetividade prus arta, virulèntzia e fintzas sa capatzidade de su virus de poderare a s’atzione de is anticorpos.

Una cosa chi donat pensamentu de custas variatziones est s’eficatzidade de is vatzinos e de is meighinas antivirales.

Su laboratòriu de s’Aou, tzentru de riferimentu de totu su tzentru sud de sa Sardigna, dae su cumintzu de sa pandemia at esaminadu prus de 200 mìgia tampones molecolares.

Unu traballu mannu e ispantosu, chi rapresentat un’istrumentu fundamentale pro sa lota contra su virus.

Unu reconnoschimentu mannu andat a sa cumpetèntzia e sa professionalidade de custos chircadores e operadores in s’àmbitu sanitàriu chi rapresentant unu primore sardu in su panorama natzionale e internatzionale.

Gràtzias a custas iscobertas e a custas chircas, si comintzat a tènnere unu pagu de isperu bonu in sa gherra contra sa pandemia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”