Sa missione de Enrico Letta at a èssere sa de chircare de agatare s’unidade pèrdida de su Partidu democràticu.

Pro custu est torradu a su Nazareno a sete annos dae sa bessida sua de iscena, a pustis de àere lassadu su logu a presidente de su Consìgiu a Matteo Renzi.

Dd’at fatu gràtzias a su votu de un’assemblea natzionale, chi l’at nominadu segretàriu nou de su Partidu democràticu cun una majoria manna meda, – su 99,3% de is cunsensos -.

Is votos favorèvoles sunt istados 860, is contràrios 2 e is astènnidos 4. Tocat a nàrrere chi s’ex presidente de su Consìgiu fiat s’ùnicu candidadu a sa segreteria.

Su segretàriu nou est intervènnidu bia a mangianu a tardu, torrende a propònnere su ius soli, su votu a is giòvanos de 16 annos e ponende is fèminas tra is prioridades.

Totus propòsitos bonos meda segundu Nicola Zingaretti, chi at lassadu sa ghia de su PD pro permìtere a su partidu de agatare un’echilìbriu nou, pro firmare is brigas tra currentes a pustis de sa nàschida de su guvernu Draghi.

Sa prima proa de su Partidu Democràticu “nou” ant a èssere is eletziones amministrativas, ma prus importante at a èssere bìnchere is partidos de dereta in is polìticas de su 2023.

Letta isperat chi su PD boghet ideas noas in economia e chi si torret a pensare a unu modu pro fàghere cumpartzire a su traballadore, a su dirigente aziendale e a s’atzionista su destinu de s’impresa e fàghere a manera chi is rènditas arribbent fintzas a su traballadore. In prus diat bòlere torrare a abèrrere su diàlogu sotziale, massimamente tra sindacados e impresas.

Su segretàriu nou at evidentziadu comente su guvernu Draghi est istadu bòlidu dae su PD, mentras Lega diat dèpere ispiegare pro ite est sustenende·ddu.

Letta at marcadu s’àndala de sighire pro su benidore, mandende a totus unu messàgiu: su fràigu de unu tzentru-manca nou ghiadu dae su partidu democràticu.

Amus a bìdere si su sèberu de s’ex presidente de su Consìgiu at a permìtere a su PD de divenire su partidu prus forte de sa manca italiana, opuru si ddoe ant a èssere àteras istàgios internos cun sa nàschida de unu cuntenidore eletorale nou.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu at paregiadu 2-2 contra sa Sampdoria, a pustis de una partida bella a beru.

Is sardos, pro comente si fiat posta sa gara in su segundu tempus, torrat dae Genova cun unu puntu de oro.

Difatis is òmines de Semplici sunt resèssidos a colare in vàntagiu – in su primu tempus – gràtzias a su gol de su brasilianu Joao Pedro, a pustis de unu tiru lestru chi at coglionadu su portieri Audero.

Ma s’iscuadra doriana de s’ex allenadore Ranieri, òmine sabiu meda, at reagidu in is ùrtimos 25′ minutos de giogu, marchende duas retes.

Prima cun una calada de pee de su tertzinu Bereszynski e poi cun un’àteru tiru de s’atacante Gabbiadini – intradu in campu pagos minutos a in antis -.

Immoe i sardos non sunt prus s’iscuadra iscambada e sena gana de gherrare de is chidas coladas: sun prus unidos e sunt renessende a fàghere bìdere totu su caràtere issoro.

Custu assentu at fatu lòmpere is casteddajos a su parègiu a sa coa de sa partida, gràtzias a Nainggolan – su giogadore prus famadu de is ruju-blu – chi at marcadu su gol de su 2-2.

Pregiadu meda pro su resurtadu s’allenadore nou Semplici, chi at fatu is complimentos a is òmines suos, ma sena festare meda, antzis, pensende a sa partida benente.

Su Casteddu at a giogare contra sa Juventus in sa Sardigna Arena, ca eris est istada bogada dae sa Copa de is Campiones pro manu de is portoghesos de su Porto.

Pro is sardos at a èssere una partida isconchiosa meda pro ite is biancu-nieddos ant a èssere afelonados ca non sunt resèssidos a adderetzare su resurtadu de andada de sa manifestatzione de Fùbalu prus importante in Europa.

Ronaldo puru, su mègius giogadore de Sèrie A, eris at delusu, e seguru at a bòlere fàghere bìdere su valore suo pròpiu contra is sardos.

Sa partida chi benit no at a èssere fàtzile duncas. Su Casteddu at a dèpere donare cura a non repìtere is matessi isbàllios de sa partida pèrdida contra s’iscuadra de Pirlo in su girone de andada e proare a regalare una bella satisfatzione a is tifosos sardos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”