Luna Rossa a pustis dae àere bìnchidu contra sa barca inglesa Ineos, agiudichendesi sa Prada Cup, eris a note at pòdidu cumpètere contra Emirates Team New Zealand pro chircare de bìnchere sa Copa Amèrica.

Su primu apuntamentu cun s’istòria at mustradu s’imbarcatzione italiana pronta a parare fronte a su Defender de is meres de domo.

In Auckland Luna Rossa, a diferentzia de 21 annos a oe contra Emirates Teams New Zealand, custa borta at a gherrare meda de prus.

Mancari is zelandesos apant bìnchidu sa prima regata, is òmines ghiados dae Max Sirena ant fatu cumprèndere cun custa vitòria chi non sunt in cue pro marcare sa presèntzia ebbia.

S’isperat chi custa at a èssere sa bia bona, a pustis de tres chi un’iscuadra italiana partètzipat a is regadas chi assignant sa Copa Amèrica, pro portare “su pannu” in Itàlia.

Su Skipper Sirena connoschet is segretos pro bìnchere custu eventu mannu, bidu chi at ampuladu sa copa giai duas bortas, ma est cussente chi at a èssere una marrania matanosa meda.

Totu sa Sardigna tenet isperu chi Luna Rossa resessat a bìnchere su Team New Zealand, pro ite Max Sirena in Casteddu est unu de famìlia e sa barca italiana s’est preparada pròpiu in su cabulogu sardu.

Is duas regatas benidoras s’ant a fàghere chenàbura. Mancant galu àteras 11 regatas, e su trofeu at a andare a s’iscuadra chi nd’at a bìnchere 7.

Oe is barcas s’ant a pasare. Dae cras s’ant a fàghere duas proas a sa die, e mèrcuris, si iscuadras ant a lòmpere a su resurtadu de 6-6, ant a disputare sa de trèighi e ùrtima regata pro podere marcare su pròpiu nùmene in su trofeu prus antigu de su mundu.

A ogna contu pro in italianos eris a note est istada una satisfatzione manna su de àere dimustradu de èssere a su mancu presentes in custa cumpetitzione ispantosa, faghende fintzas bella figura.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu at paregiadu 2-2 contra sa Sampdoria, a pustis de una partida bella a beru.

Is sardos, pro comente si fiat posta sa gara in su segundu tempus, torrat dae Genova cun unu puntu de oro.

Difatis is òmines de Semplici sunt resèssidos a colare in vàntagiu – in su primu tempus – gràtzias a su gol de su brasilianu Joao Pedro, a pustis de unu tiru lestru chi at coglionadu su portieri Audero.

Ma s’iscuadra doriana de s’ex allenadore Ranieri, òmine sabiu meda, at reagidu in is ùrtimos 25′ minutos de giogu, marchende duas retes.

Prima cun una calada de pee de su tertzinu Bereszynski e poi cun un’àteru tiru de s’atacante Gabbiadini – intradu in campu pagos minutos a in antis -.

Immoe i sardos non sunt prus s’iscuadra iscambada e sena gana de gherrare de is chidas coladas: sun prus unidos e sunt renessende a fàghere bìdere totu su caràtere issoro.

Custu assentu at fatu lòmpere is casteddajos a su parègiu a sa coa de sa partida, gràtzias a Nainggolan – su giogadore prus famadu de is ruju-blu – chi at marcadu su gol de su 2-2.

Pregiadu meda pro su resurtadu s’allenadore nou Semplici, chi at fatu is complimentos a is òmines suos, ma sena festare meda, antzis, pensende a sa partida benente.

Su Casteddu at a giogare contra sa Juventus in sa Sardigna Arena, ca eris est istada bogada dae sa Copa de is Campiones pro manu de is portoghesos de su Porto.

Pro is sardos at a èssere una partida isconchiosa meda pro ite is biancu-nieddos ant a èssere afelonados ca non sunt resèssidos a adderetzare su resurtadu de andada de sa manifestatzione de Fùbalu prus importante in Europa.

Ronaldo puru, su mègius giogadore de Sèrie A, eris at delusu, e seguru at a bòlere fàghere bìdere su valore suo pròpiu contra is sardos.

Sa partida chi benit no at a èssere fàtzile duncas. Su Casteddu at a dèpere donare cura a non repìtere is matessi isbàllios de sa partida pèrdida contra s’iscuadra de Pirlo in su girone de andada e proare a regalare una bella satisfatzione a is tifosos sardos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”