Unu carru de gala decoradu pro una festa tzelebrativa nd’est essidu a campu dae is iscavos de Civita Giuliana, a nord de Pompei.

S’iscoberta est etzetzionale e s’agatamentu est istadu annuntziadu dae su Parcu Archeològicu de Pompei e dae sa Procura de sa Repùblica de Torre Annunziata.

Si tratat de unu carru tzerimoniale mannu a bator rodas, cun elementos in ferru e decoratziones in brunzu e istàngiu, cun is partes in linna mineralizados. In prus ddoe sunt is imprentas de is elementos orgànicos.

Su carru est istadu atzapadu belle intreu in s’antale de s’istalla in ue giai tres annos a oe fiant istupados is cògios de tres caddos e unu caddu decoradu.

Cuntentu mannu su Ministru de sa Cultura Dario Franceschini chi at decraradu chi Pompei sighit a ispantare cun is iscobertas suas e at a èssere gasi pro meda àteru tempus, sende chi tocat a iscavare ancora prus de binti ètaros.

Su mèritu mannu est de su diretore Zuchtriegel chi in Pompei est chessende a fàghere cunvìvere chirca, formatzione e istùdios.

Una valorizatzione capatza de atràere turistas dae totu su mundu chi diat dèpere èssere pigada comente esèmpiu fintzas dae sa Sardigna, chi cunservat medas meravìllias antigas de su tempus coladu suo chi sunt galu cuadas.

Su pìgiu de chinisu chi at tudadu su carru at permìtidu sa cunservatzione de is formas originàrias.

Su carru est formadu dae bator rodas e si pensat chi potzat èssere unu pilentum, unu mèdiu de trasportu impreadu in su mundu romanu dae is nòbiles durante is tzerimònias.

A palas portat una filera de medalliones in brunzu e istàngiu cun iscenas chi rapresentant figuras maschiles e feminiles e peri iscenas a tema eròticu.

Su carru rapresentat pro s’Itàlia un’iscoberta ùnica, non solu pro su livellu de cunservatzione, ma fintzas pro ite non si tratat de unu mezu agrìculu o de traballu, ma unu carru tzerimoniale, chi nos contat meda de sa richesa de sa tzitade de Pompei in època romana.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Zoom – Zoom Video Communications – est una sotziedade de servìtzios de telecunferèntzia cun sede a San Jose in Califòrnia chi frunit servìtzios de cunferèntzia remota chi cumbinat videocunferèntzias, riuniones in lìnia, tzarradas e collaboratzione mòbile.
At cunfirmadu in unu messàgiu ufitziale in su blog cosa sua, chi at a pònnere a disponimentu sa trascritzione de is sutatìtulos pro totus, intro s’agabbu s’annu. Sa cumpangia at ispiegadu puru comente at a funtzionare sa novidade.
Sa funtzionalidade at a èssere a tempus reale. Si basat in s’inteligèntzia artifitziale chi est giai impreada pro sa funtzione “Live Transcription”, disponìbile pro is impitadores chi pagant unu cànone in abbonamentu ebbia.
S’òspite de s’aposentu – est a nàrrere chi at creadu s’arresonu – at a pòdere abilitare sa visualizatzione de is sutatìtulos diretamente dae su programma de navigatzione o dae s’aplicativu.
Una diferèntzia non de pagu contu in cunfrontu a oe, pro ite is iscritos, prus che totu cussos sena abbonamentu, ant a pòdere tènnere profetu de sa trascritzione de su testu in tempus reale. Una funtzionalidade fundamentale pro is impitadores chi no intendent, chi finas a immoe non teniant sa possibilidade de pòdere sighire un’arresonu in lìnia, opuru deviant isetare sa visualizatzione de paràulas postas a manu dae is organizadores de sa videocunferèntzia.
Non s’ischit galu cando custa novidade at a essire, ma chi tenet problemas a s’uditu podet giai fàghere sa recherta de visualizatzione de is sutatìtulos, imbuchende in si pàginas de suportu de Zoom e isetende s’ativatzione de su sèberu pro su contu personale.
Ma est pretzisu a nàrrere chi sa trascritzione est disponìbile in inglesu ebbia e s’isperat chi cando at a èssere posta a disponimentu de totus sos impitadores, ddoe at a èssere sa possibilidade de tènnere sutatìtulos peri in àteras limbas.
Tocat a nàrrere chi is sutatìtulos automàticos sunt disponìbiles fintzas in àteros servìtzios de videocunferèntzia comente Google Meet e Microsoft Teams, e bida sa popularidade chi custa tipologia de aplicatzione est leende, est una cosa bona a beru donare sa possibilidade a is persones cun disabilidades tènnere trastos comente a custu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”