In s’ocasione sa regione sarda fiat istada declassada e “custrinta” a mesura prus severas pro atremenare s’ispàinu de su Covid 19.

Su provedimentu de su Tar arribat cun unu decretu monocràticu de su presidente, Dante di Alessio, a pustis de sa rechesta apretosa presentada dae is legales de sa Giunta chi aiant pedidu una detzisione derere galu a in antis de sa discussione de sa rechesta cautelare chi at a èssere discussa su 17 de freàrgiu.

Segundu su Tar non b’at istadu nisciunu paràmetru isballiadu e niciunu avaloramentu discretzionale e immotivadu de is òrganos tècnicos de su ministeru.

Sa classificatzione diat èssere istada fata in base a s’arriscu valutadu dae s’aplicatzione de medas critèrios, pro su prus automàticos, elaborados cun un’algoritmu, chi sunt istados seberados pro compidare s’andamentu de s’epidèmia e riguardant diversos àmbitos, comente iscriet su presidente de su Tar in su decretu suo.

In su perìodu de controllu, in Sardigna, fiant resurtados peorados bator indicadores importantes: sa pertzentuale de ocupatzione de is postos letu in is terapias intensivas, su pesu de is casos ativos ogni 100.000 abitantes, s’andamentu de is epitzentros de contàgiu e sa completesa e sa lestresa de trasmissione de is datos.

Detzisiva fintzas sa pertzentuale de ocupatzione de is postos letu in terapia intensiva – in su perìodu de riferimentu – fiat aumentada su 31%, unu puntu pertzentuale subra su lìmite de allerta de su 30%.

Sa permanèntzia de s’Ìsula in custa fàscia in s’agiornamentu de su 29 ghennàrgiu, at a dipèndere dae is paràmetros chi depent resurtare positivos in is imbenientes duos report consecutivos (e tando a pustis de duas chidas), cun sa cunsighèntzia chi sa Sardigna at a pòdere benefitziare de su megioramentu atzertadu de is suos dados (si cunfirmados in su raportu imbeniente), cun su passàgiu a sa zona groga, giai in sa sighente determinatzione de su Ministeru”, duncas su 5 freàrgiu chi benit.

Pro su momentu custa situazione est donende pensamentu a medas categorias – comente baristas e ristoradores – postos in ghenugros dae is mesuras cunsighentes a s’apartenèntzia a sa zona colore de aràngiu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In sa die de oe su Presidente de sa Camera Roberto Fico at a cumentzare is consultatziones cun is partidos pro bìere chi si ddoe sunt is cunditziones de fàghere su guvernu “Conte-ter”.

Fico – chi at retzidu su mandadu esplorativu dae su Presidente Sergio Mattarella – at a atopare pro primu is delegados de su Movimentu Chimbe Isteddos, e a sighire is rapresentantes de su Partidu Democràticu, Itàlia Viva e Lìberos e Uguales.

Sa crisi de su Guvernu s’est aberta a pustis de is dimissiones de is ministras Teresa Bellanova e Elena Bonetti e de su sutasegretàriu Ivan Scalfarotto.  Mancari is votos a favore de Giuseppe Conte a sa Camera e  a su Senadu – bàtoro dies a oe – est istada declarada   sa crisi cun is dimissiones de su primu ministru.

S’incàrrigu de Fico est istragosu meda, pro ite su capu de Itàlia Viva, Matteo Renzi, diat puntare a unu Guvernu ghiadu dae unu primu ministru chi non siat Conte.

Is esponentes printzipales de su Partidu Democràticu e de su M5S bolent  comente Presidente de su Consìgiu semper s’abogadu pulliesu.  Ma essende chi su tentativu de allargare sa majoria sena is votos de su partidu de Renzi no est resèssidu, at èssere difìtzile meda chi Conte bèngiat cunfirmadu.

In custas oras sunt essidos a pìgiu àteros nùmenes, comente cussu de su  Ministru de is Esteros Luigi di Maio e de sa Ministra de is Internos Luciana Lamorgese.

In unu cuntestu polìticu che custu non s’ischit ite at a pòdere capitare. Seguru – sarvu sorpresas – non s’at a lòmpere in presse a is eletziones, comente imbetzes est dimandende sa minoràntzia ghiada de su capu de sa Lega Matteo Salvini.

Fico at a dèpere agatare una solutzione a lestru, pro ite s’Itàlia non si podet permìtere àteros “trumbulamentos” in is meses sighentes, bidas totu is discumbènios causados dae sa pandemia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”