Eris sero in Casteddu, una vetura nch’est ruta in un’ispèrruma in arborada Europa.

Is pitzocos, giòvanos meda, sunt istados leados cun apretu a ispidale in còdighe ruju. Biagiaiant in un’Alfa Romeo Mito e fiant colende su caminu chi segat Monte Urpinu – betada – cando s’autista at pèrdidu su controllu de su veìculu.

Sa màchina diat àere donadu una addobbada prima in su martzia pee, posca sa barriera de protetzione est posca nche est acabbada in su fossu, firmendesi prus suta de su caminu.

In deretura sunt arribados s’ambulantzas de su 118, is vìgiles de su fogu e sa politzia munitzipale. S’iscena chi ant agatadu fiat lègia a beru, cun sa màchina totu carcangiada e is pitzocos arrèschidos in mesu a is lamieras. S’Alfa belle non si connoschiat prus.

S’autista de 19 annos, residente a Cuartùciu, si diat agatare a su Brotzu in graves cunditziones, imbetzes duos passigeris sunt istados ricoverados a su Policlìnicu de Pauli.

Sa politzia munitzipale est traballende pro cumprèndere sa dinàmica s’intzidente, chi at tocadu meda is parentes, is amigos e totus.

A dolu mannu in is ùrtimos tempos si sunt registrados numerosos intzidentes chi ant interessadu pitzocos e pitzocones, torrende a pònnere a su tzentru de s’atentu is problemàticas acapiadas a sa viabilidade e a sa seguridade istradale in su cabulogu isolanu e non solu.

Difatis dae is ùrtimos datos, mancari su perìodu de cunfinamentu a càusa de s’epidèmia de su Covid-19, is intzidentes istradales sunt semper de prus e semper prus lègios. Is motivos sunt semper is pròpios: paga atentzione, velotzidade arta ma fintzas sa cunditzione semper prus precària de is caminos de s’Ìsula, comente est istadu denuntziadu dae vàrios assòtzios de is vìtimas de s’istrada.

S’isperat chi is vìtimas de custu intzidente si potzant intèndere mègius, e chi pro issos abarret unu regordu malu ebbia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In su tempus de oe is ispàtzios sociales sunt diventados virales pro gióvanos e mannos, ma in is ùltimas chidas est sempres prus preocupante su fenómenu nomenadu: “disafiu estremu”.

Si tratat de marranias tontas chi no istant ne in chelu, ne in terra. Comente a si pònnere una sachitedda de plàstica in conca e a dd’acapiare cun s’isparatrapa.

Difatis in Itàlia, pagu tempus a oe, calcunu pitzinnu est mortu fàghendu custos giogos ponende mente a òmines e féminas chi traballant comente “influentzadores”.

Calcunu de custos sunt istados arrestados pro su reatu de intzitamentu a sa morte.

Unu de is ispàtzios sotziale prus impreados dae custus malaitos “influentzadores” est TikTok. Custa prataforma diventada populare meda nàschida in Tzina, est semper prus conchistende s’Italia, acanta est ingangulitzende gente de diferente edade.

Medas polìticos e personalidades de s’isport ant incumentzadu a tènnere unu profilu in custu ispàtziu sotziale pro ite ant èssere prus is ocasiones de èssere sìghidos.

Sa resèssida de TikTok dipendet dae fatu ca faghet a pònnere vìdeos curtzos de trinta segundos ebbia paris cun sa sa mùsica. In prus is meres de sa sienda sunt fàghende investimentos mannos pro isvilupare s’aplicatzione.

Custu ispàtziu sociale pòdet causare dipendèntzia, pro ite cullunat a chie ddu imprat a s’abbarrare a tot’ora faghende vìdeos.

Ma prima sa gente pensat ca serbiat solu pro fàghere cantare baddare e a istròchere is iscenas de unu film, immoe s’est cumpresu ca sa est unu mundu meda perigulosu pro is minores.

Seguru at a tocare chi is babbos e mamas siant prus atentos a controllare is fìgios cando impreant custa aplicatzione tzinesa. Ma is meres dae TikTok ant a dèpere bogare a foras a lestru is chi realizat vìdeos cun disafios estremos, denuntziende∙ddo in deretura a sa politzia postale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”