Su Casteddu no est renèssidu a iscansare sa de sete partidas pèrdidas. At bìnchidu su Milan.
In sa Sardinia Arena est acabbada 0-2 pro is ruju-nieddos cun totus is gol realizados dae Zlatan Ibrahimovic.
A is ruju-nieddos ddis serbiant puntos pro abarrare primos solos in classìfica, torrende∙si a istesiare dae s’Inter, e ant meritadu de bìnchere pro sa gana dimustrada.
Su primu gol de su Milan est lòmpidu a su cumentzu dae sa gara – 6′ minutu de su primu tempus – gràtzias a unu rigore assignadu dae s’àrbitru Abisso, pro more de una farta – pagu crara — de Lykogiannis a dannu de de Ibrahimovic. A pustis, su giogadore isvedesu etotu, dd’at trasformadu ispiatzende s’ùrtimu òmine de su Casteddu Alessio Cragno.
Su Casteddu no est renèssidu a adderetare su risultadu, e pro totu sa primu parte de sa partida no est lòmpidu a sa porta de is aversàrios. Antzis est istadu su Milan a s’acostiare a sa rete, cun duas caladas de pee dae largu de su tertzinu Davide Calabria — in unu at fertu su palu -.
Pròpiu su difensore milanesu, in is primos minutos de su segundu tempus, at passadu sa botza a su cumpàngiu Ibrahimovic pro sa rete de su 2-0.
A pustis is ruju-blu ant proadu a marcare unu gol cun s’argentinu Simeone, chi est istadu firmadu cun una bella parada dae su portieri aversàriu Donnarumma.
Ma su Milan no est abarradu a castiare: semper Ibrahimovic – su protagonista de sa partida – no est resèssidu a fàghere un’àtera rete solu gràtzias a unu miràculu de Cragno.
Mancari s’iscuadra de Stefano Pioli siat abarrada in deghe a pustis chi s’àrbitru nch’at bogadu a foras de su campu su tzentrucampista Alexis Saelemaekers cun su cartellinu ruju, is casteddajos non sunt resèssidos a mudare sa sorte de sa gara.
Tzertu a is òmines de Eusebio di Francesco mancat unu rigore pro sa farta de Brahim Diaz subra Riccardo Sottil, ma at fatu tropu pagu a beru pro paregiare sa partida.
Immoe a pustis de custu risultadu, sa banchita de s’allenadore abrutzesu est semper prus in arriscu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Crisi de guvernu, Conte oe a sa proa de su votu in Senadu

Su guvernu Conte a sa chirca – difìtzile chirca ma no impossìbile – de sa majoria a Palatzu Madama

A pustis de àere otentu sa majoria assoluta a sa Càmera cun 321 votos – su plenum de s’assemblea est de 630 – su primu ministru Giuseppe Conte at a dèpere superare sa proa de su Senadu, acanta is nùmeros a favore de su guvernu sunt contados.

Su partidu “Itàlia viva”, a pustis de àere lassadu su guvernu, at annuntziadu chi s’at a astènnere in su votu finale e custu at a permìtere a s’esecutivu de otènnere sa fidùtzia cun una majoria relativa.

Difatis non serbit unu quorum mìnimu e at a bastare a superare s’opositzione fintzas cun unu votu ebbia.

Medas però sutalìniant chi si Conte non superaret sa cuota de 161 a Palatzu Madama — est a nàrrere sa majoria assoluta, su plenum est de 315 prus 6 senadores a vida – diant dèpere presentare is dimissiones.

Totu custu dae unu puntu de bista mescamente polìticu, ma no est obligatòriu. Difatis diat bastare a torrare in segus in s’istòria republicana pro bìere chi sunt istados dòighi is guvernos de minoria, in una o in totu e is duas is Càmeras, tra custos fintzas su primu guvernu De Gasperi e in is annos prus reghentes su primu Berlusconi.

Is prepostos a is traballos narant chi a favore de su guvernu atuale ddoe diat tènnere unu nùmeru de senatore( tra 152 e 159) prontos a donare sa fidùtzia. A is votos de is esponentes de M5S, Pd e Leu si diant pòdere agiùnghere tra 12 e 15 votos de su grupu Mistu o de is foressidos de àteros grupos, e àteros 7 de su grupu de is Autonomias.

Ma si tratat petzi de previsiones. Custu mangianu si sunt abertos is traballos in Senadu. Su guvernu at retzidu s’apògiu de is Senadores Monti, De Falco e Casini, cun custu ùrtimu chi at sotadu a Conte de torrare a dialogare cun Renzi remonende peri a Aldo Moro: “Mègius faddire paris chi tènnere resone a solos”.

In su mentres in custas oras is Senadores sunt istados partzidos in tres categorias: is responsàbiles – meda apensamentados pro is efetos de una crisi de guvernu, is traitores – chi sunt isetende postos ebbia, e is isfinges – is chi finas a s’ùrtimu non si esponent. Sunt pròpiu custos chi ant a poderare is italianos in riolu, e non pro sa subravivèntzia de su Conte-bis ebbia.

S’apuntamentu est pro custu sero, cando a pustis de su votu s’at a cumprèndere cale at a èssere su guvernu chi — francu imprevistos improvisos – in is meses sighentes s’at a dèpere fàghere càrrigu de gestire s’apretu sanitàriu e econòmicu de s’Itàlia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”