Sunt 1.376 is casos de positividade a su Covid-19 atzertados in Sardigna dae su cumintzu de s’apretu.

A dolu mannu a pustis de sa persone positiva de eris, oe puru s’agiunghet un’àtera noa mala pro s’Ìsula.

In s’ùrtimu agiornamentu de s’Unidade de crisi regionale si registrant duos cuntàgios noos in sa Tzitade Metropolitana de Casteddu. Si tratat semper de nùmeros chi non donant pensamentu, ma chi faghent cumprèndere comente siat importante a tènnere semper coidadu.

Difatis si est beru chi semus essidos dae sa temporada mala, in su matessi momentu no amus segudadu unu portu seguru. Duncas est pretzisu a sighire a impreare, cando serbint, is aparatos de amparu individuales comente is mascareddas, e a rispetare semper s’istesiamentu sotziale.

Non nche depimus fuliare is meses de sacrifìtzios fatos dae sa populatzione durante is meses de cunfinamentu. Peri pro ite ddoe est semper s’arriscu chi su coronavirus si torret a s’iscasiddare cun s’arribu dae foras de persones cuntagiadas. Difatis sa pandemia sighit a caminare in is natziones de su Sud Amèrica e in is Istados Unidos, in ue carchi Istadu at a firmare is atividades.

Dae is USA arribbant però bonas noas puru: s’isperimentatzione clìnica de su vatzinu contra su Covid-19 isvilupadu dae su National Institutes of Health e s’azienda Moderna paret chi siat donende resurtados bonos. Difatis est istadu donadu su permissu pro incarrerare sa segunda fase, cun s’isperimentatzione clìnica.

Torrende a s’ìsula Nostra, in totale sunt istados fatos 95.175 tampones. Is malàidos ricoverados in ispidale sunt in totu 4, nissunu est in terapia intensiva, mentras 8 sunt is persones in isulamentu domitziliare. Su datu progressivu de is casos positivos cumprendet 1.227 malàidos sanados, prus àteros 3 curados in manera clìnica. Abarrat semper su matessi su nùmeru de is mortos, 134 in totu.

De is 1.376 casos positivos atzertados in Sardigna, 258 (+2) sunt istados rilevados in sa Tzitade Metropolitana de Casteddu, 101 in su Sud Sardigna, 61 a Aristanis, 78 in Nùgoro, 878 in Tàtari.

Bonas noas dae sa luta contra su virus Corona: pro sa prima bia a su mundu unu vatzinu candidadu contra su coronavirus nou, at neutralizadu su virus in is tzèlulas umanas.

Comente at decraradu a s’Ansa Luigi Aurisicchio de s’azienda Takis de Pomezia, is anticorpos ingendrados in is sòrighes dae su vatzinu italianu funtzionant.

Is proas sunt istadas fatas in su Spallanzani (su pràpiu istitutu chi at isuladu su virus). Pro is proas subra s’òmine s’at a dèpere isetare a pustis de s’istiu.

Aurisicchio at fintzas decraradu: «Gràtzias a is cumpetèntzias de su Spallanzani, a su chi nd’ischimus, semus is primos a su mundu a àere dimustradu sa neutralizatzione de su coronavirus pro manu de unu vatzinu.

Nos isetamus chi custu acuntessat fintzas in s’òmine. Nois semus faghende totu su possìbile pro more chi unu vatzinu chi naschet dae sa chirca italiana, cun una tecnologia totu italiana e innovativa, bèngiat isperimentadu in Itàlia e postu a disponimentu de totus. Pro lòmpere a custu – at agiuntu– tenimus bisòngiu de su suportu de is istitutziones e de collaboradores chi nos agiudent a atzelerare su protzessu: custa no est una gara e unidos podimus bìnchere totus contra su coronavirus».

«Is resurtados otentos finas a oe lassant ispetu bonu, prus meda de is aspetativas: a pustis de una sìngula vatzinatzione is sòrighes ant isvilupadu anticorpos chi podent firmare s’infetzione de su virus Sars-CoV-2 in is tzèllulas umanas», at naradu Aurisicchio.

A pustis de àere osservadu chi is chimbe vatzinos candidados ingendraiant una cantidade manna de anticorpos, is chircadores ant seberadu is duos vatzinos chi ant donadu is resurtados mègius. Dae su sàmbene ricu de anticorpos est istadu isuladu su suru chi est istadu analizadu in su laboratòriu de Virologia de s’Istitutu Spallanzani. «Aìamus bidu sa cantidade de anticorpos induida, immoe bidimus chi is anticorpos renessent a firmare su virus. S’àteru passu – at agiuntu – at a èssere su de cumprèndere cantu tempus durat sa risposta immunitària».

Totus e chimbe is vatzinos candidados si basant subra su materiale genèticu de sa proteina Spike, sa punta moleculare chi su virus impreat pro intrare in is tzèlulas umanas, e in sa tècnica de s’eletroporatzione, chi cunsistet in un’inietzione in su mùsculu acumpangiada dae un’impulsu elètricu lestru pro fatzilitare s’intrada de su vatzinu in is tzèlulas e ativare in custu modu su sistema immunitàriu.