Tragèdia custu mangianu in Arborea, acanta un’allevadore at pèrdidu sa vida a pustis de èssere rùidu a s’internu de unu machinàriu mòbile pro s’imballàgiu de sa proenda.

S’òmine, 71 annos, s’agataiat a s’internu de s’azienda sua cando est sutzèdidu s’intzidente e galu nos s’ischit comente siat acontèssida sa disgràtzia.

S’imprendidore est mortu de corpu, a càusa de is fertas causadas dae sa rutòrgia. A si nde sapire de su chi fiat sutzèdidu unu prepostu a su ritiru de su late.

In deretura sunt lòmpidos su personale de su 118, carabineris, vìgiles de su fogu e ispetores de s’Assl. Como is autoridades ant a dèpere istabilire is càusas de custa morte bianca, chirchende de cumprèndere si s’òmine siat rùidu a s’internu de sa màchina agrìcula pro malasciagura o pro unu malore.

Sa vìtima Giuseppe Schiavon – paris cun su fìgiu Marco – gestiat un’azienda zootècnica de una chentina de pegos. In lutu sa comunidade de Arborea, acanta s’òmine fiat meda connotu e istimadu.

Custu dramma est s’ùrtimu de is medas disacatos capitados in su setore de s’agricultura. Fintzas ocannu in Sardigna, sunt istados medas is chi sunt mortos traballende in su sartu.

Is datos de is mortes e de is feridos in su traballu acontèssidos in Itàlia sunt lègios a beru. In is ùrtimos deghe annos sunt belle 18 mìgia is chi ant pèrdidu sa vida traballende. Imbetzes is traballadores chi sunt abarrados fertos sunt prus de 600 mìgia.

Medas is maniales agrìculos, medas de cales sunt abarrados interessados in intzidentes cun is tratores chi si nche sunt furriados tenende de suta is pòberas vìtimas.

Intzidentes chi depent fàghere leare provedimentos pretzisos a is autoridades e a su Ministru de is Polìticas Agrìculas Teresa Bellanova.

Pròpiu sa ministra – ex sindacalista- est semper istada sensìbile a custu tema chi corpit unu setore gosi importante de s’economia natzionale.

Eris in Rai3 est andada in direta sa prima puntada de sa sèrie noa de su programma pensadu e conduidu dae Franca Leosini, “Storie maledette”. Sa giornalista at contadu a sa minuda su delitu de Dina Dore, acontèssidu su 26 de martzu de su 2008 in Gavoi. Leosini at intervistadu a su maridu de sa vìtima, Francesco Rocca, su dentista de Gavoi cundennadu a s’ergàstulu in tres grados de giudìtziu pro àere cummissionadu s’ochisura de sa pobidda.

Rocca, dae sa domo tzircundariale de S’Alighera at torradu a nàrrere a tantis bias de èssere innotzente, pro s’infundadesa de is decraratziones de Stefano Lai, su supertestimòngiu chi chimbe annos a pustis de su delitu at donadu una bortada a s’inchiesta concruida cun s’arrestu suo e de Pierpaolo Contu, a s’època de is fatos minorenne, cundennadu a 16 annos comente esecutore materiale de s’ochisura.

Stefano Lai aiat contadu a is incuirentes chi s’amigu Pierpaolo Contu l’aiat cunfessadu de àere mortu issu a Dina, mandadu dae Rocca cun sa promissa de 250 mìgia èuros.

In pràtica Rocca, at torradu a repìtere sa matessi lìnia de difesa chi at naradu a is giùighes, ma chi pro tres bias at tentu su matessi resurtadu: sa cundenna sua.

Su dentista at naradu chi in is indagas ddoe sunt istadas faddinas (at sutaliniadu chi in s’isparadrapa impreadu pro acapiare a Dina Dore ddoe teniat unu canteddu de Dna chi non fiat de Pierpaolo Contu e no est mai istadu iscobertu a chie apartenneret), at naradu chi at a pedire sa revisione de su protzessu e giustìtzia pro Dina. «Ddoe tenet una rasta biològica de sàmbene de Dina ammescradu a su DNA de una persone disconnòschida. Ma custu disconnòschidu no est istadu mai chircadu. Pro su casu de Gambirasio, pro esèmpiu, ant fatu mìgias de chircas. In una bidda pitica comente a sa nostra cun 700-800 campiones de DNA diant èssere arribbados a su resurtadu, o comente si siat a su tzipu parentale», at decraradu Rocca. Chi at agiuntu chi no at mai cumprèndidu su movente de su presupostu assassinu – “disconnòschidu 1” -, ipotizat si diat èssere tratadu de unu tentativu de secuestru o de fura acabbada male.

In prus, at decraradu, chi fìgia sua – oe dòighi annos – non diat èssere a su seguru, pro ite su presupostu mortore de sa mama diat èssere galu lìberu.