S’illèbiat sa situatzione de su coronavirus in s’ìsula Nostra. Segundu s’ùrtimu agiornamentu frunidu dae s’Unidade de crisi regionale sunt firmos a 1362 is casos de positividade a su COVID-19.

Non si registrant àteras cundiduras e, pro fortuna, nissuna morte acapiada a su virus. Is vìtimas abarrant 132.

Immoe in is ispidales sardos resurtant ricoverados chimbe malàidos ebbia, de custos nissunu est in terapia intensiva, imbetzes sunt sete is persones in isulamentu domitziliare.

De pònnere a notu chi sunt curados àteros duos sugetos, faghende arribare a 1199 is malàidos chi nche dd’ant fata a bìnchere sa maladia. Medas de prus is chi sunt curados in manera clìnica, su bellu de deghennoe.

Nùmeros chi donant ispetu bonu pro su benidore e chi s’apròbiant semper de prus a su traguardu de zeru malàidos ricoverados e cunfirmant, dae unas cantas dies a oe, s’ausèntzia de cundiduras noas.

Ma contra custu virus chi sighit a s’ispainare in Àfrica e in is Amèricas, cun epitzentros noos peri in Àsia, est pretzisu a abarrare semper a s’avèrtida.

Pro non pèrdere is resurtados otentos in custos meses, fintzas gràtzias a limitatziones severas e sacrificosas, tocat a sighire a rispetare is normas de istesiamentu sotziale e a si pònnere, cando est netzessàriu, is aparatos de seguresa individuales. Duncas non si podet fàghere a mancu de si pònnere sa fatzoledda cando semus in logos cun gente meda e in is locales pùblicos, in ue est prus perigulosu chi is persones asintomàticas pìtzighent sa maladia.

Fintzas si infadosas, bidu s’arribu de su calore istadiale de custas dies, is mascareddas sighint a èssere unu traste ùtile pro evitare de si pigare coronavirus.

Mancari calicunu apat teorizadu chi su virus siat chitende sa càrriga virale sua, sa parte prus manna de is espertos non sunt de acòrdiu cun custa ipòtesi.

Bonas noas peri pro s’Iscola, pro ite sa Regione e is Entes Locales ant aprovadu is lìnias ghia noas pro torrare in classe in cabudanni.

Custos is nùmeros totales de is casos cumproados in cada provìntzia sarda: 873 in Tàtari, 251 in sa Tzitade Metropolitana de Casteddu, 99 in su Sud Sardigna, 78 in Nùgoro e 61 in Aristanis.

Sunt bastados ses casos noos de infetziones pro torrare a pònnere in oriolu sa Tzina.

A pustis de trintaghimbe dies chi non fiat essidu a campu perunu casu a Wuhan, custa coa de chida custos impestados noos sunt donende pensamentu meda a is autoridades tzinesas.

Sa tzitade, connota a dolu mannu pro èssere istada su primu logu acanta su COVID-19 s’est iscasiddadu, est apressibende a parare fronte a un’àteru possìbile epitzentru de sa maladia.

Difatis Wuhan, intro pagu tempus, est pronta a fàghere sa proa de s’àtzidu nuclèicu a totus is 11 milliones de residentes. In custas dies totus is distretos ant dèpidu presentare unu pranu fatu a sa minuda pro evitare chi si torret a presentare s’apretu de cumentzu de annu.

In veridade is dirigentes locales de sa Preventzione e de su Controllu sunt semper abarrados a s’atentu, mancari is resurtados bonos otentos in is meses colados contra su coronavirus.

Su segretàriu locale de su Partidu Comunista, Wang Zhonglin, in s’addòbiu de lunis in sa tzitade tzinesa, at bòlidu torrare a repìtere calicunu cuntzetu.

At naradu chi tocat a crèschere sa cobertura de is proas, tzentralizende su protzessu de verìfica – difatis pro s’ora sa tzitade de Wuhan, chi tenet prus de 11 milliones de abitantes, at fatu unu millione de test ebbia -.

At sighidu narende chi sa vitòria detzisiva no est galu lòmpida e contra custu inimigu invisìbile tocat a poderare semper is ogros abertos.

Su dirigente locale de su partidu, at concruidu narende chi non bisòngiat èssere ispensados, antzis, est a èssere semper abbistos.

Duncas tocat a tènnere unu cumportamentu responsàbile e prudente, bìdidos peri is fatos tristos acontèssidos a Wuhan.

Sa torrada de s’epidèmia in Tzina diat tènnere efetos lègios a beru pro s’economia e pro su morale de totu sa natzione, e in prus podet tènnere cunseguèntzias malas fintzas in is àteros Paisos corfidos meda dae su COVID-19, pròpiu in su momentu chi medas de custos sunt torrende a bellu a bellu a si nde istantargiare.

Un’esèmpiu est s’Itàlia, in ue pro sa chida chi benit ant a abèrrere torra diversos setores produtivos, faghende torrare sùlidu a s’economia de su Paisu, dannificada meda dae su firmu de is ùrtimos meses.