In custas dies, in totu su mundu, s’est faeddadu de sa sorte de su Cumandante Supremu de sa Corea de su Nord.

Ispeculatziones nàschidas dae cando est istadu operadu a su coro – un’interventu chirùrgicu pro pònnere unu stent coronàricu -.

A pustis de duas chidas no s’ischit prus nudda de Kim Jong-un, chi dae tando no at partetzipadu prus a nisciunu eventu pùbblicu natzionale.

Est mancadu fintzas a sa cummemoratzione pro sos 108 annos dae sa nàschida de su giaju Kim Il-sung, fundadore de su regìmene coreanu.

Est comintzada a girare sa boghe chi s’est mortu, pro more de s’interventu chirùrgicu andadu male, e un’àtera boghe narat chi siat biu ma màrturu, in istadu vegetativu .

In su mentres sa televisione Kctv – s’emitente istatale de su Nord – no at dadu nisciuna informatzione subra su capu coreanu.

In sos mèdias sotziales sunt essidas una pariga de fotografias de su ditadore, una de custas mustrat su Maresciallu corcadu in sa lètia, prontu a èssere interradu.

Su giassu internet “38 North” at naradu chi Kim-Jong-un est biu e s’agatat in unu cumplessu residentziale a Wonsan, in sa costera orientale de sa Corea.

Custu pro ite sas immàgines de su satélite ant mustradu su trenu de su Cumandante Supremu in s’istatzione a presu de custa zona. S’acumpangiamentu ferroviariu de su leader coreanu – longu prus de 200 metros e de colore birde – s’agatat incue dae una pariga de dies.

Sa Corea de su Sud at naradu ca su mere de sa natzione a làcana istat bene e ca s’est chérfidu petzi assolare pro evitare s’epidémia de su coronavirus.

Chi si siat pasende, a pustis s’operatzione, pro torrare in fortzas? Un’iscuadra de 50 mèdicos tzinesos sunt istados mandados dae Xi Jinping in Corea de su Nord pro unu consultu subra sa salude de su Marisciallu.

Mancari Kim Jong-un siat gióvanu meda – 36 annos ebbia-, de salude no istat bene: est grassu meda – pesat 130 chilos pro un’artia de 1,70 metros -, e in prus fumat e bufat meda.

Tzertu chi si est a beru ca s‘est mortu, su podere at a colare a sa sorre Kim Yo-jong. Sa carrale at a guvernare finas a cando su fìgiu de Kim, 10 annos – ndi tenet àteros duos puru – at a èssere mannu.

Noas malas chi interessant su COVID-19 pro sa Repùbblica Pobulare Tzinesa

Sa tzitadina de Suifenhe – localidade ispèrdida de chentumìgia abitantes in su fritu Nordest mantzesu chi tenet medas negòtzios cun sa Rùssia, immoe a dolu mannu est divènnida famada a càusa de su coronavirus.

Mancari sa positzione isulada a làcana cun Sibèria, Suifenhe, est un’epitzèntru nou de s’epidèmia de coronavirus in Tzina , cun 400 casos noos de impestados atzertados.

Su guvernu tzentrale tzinesu s’est mòvidu in deretura mandende duos aeroplanos de càrrigu prenos de istrumentos e forniduras de meighinas pro permìtere de fraigare un’ispidale provisòriu in ue isulare is malàidos.

Sa tzitadina de monte inghiriada dae padentes crosos, però no est s’ùnica a èssere istada corpida dae un’epidèmia noa de coronavirus. Difatis a parte Suifenhe, un’àtera infetzione de COVID-19 s’est iscasidada in Harbin, capitale provintziale de sa zona.

In su cabulogu in totale ddoe tenet 40 persones positivas a su virus, e in s’àrea metropolitana bivent prus de deghe milliones de tzitadinos. Si sa pidèmina s’ispainaret diat èssere unu perìgulu berdaderu pro su Paisu asiàticu de rùere torra in s’emergèntzia, a pustis de su casu de Wuhan.

In prus, brulla de su destinu, sa prima tzitade corpida dae sa maladia est istada torrada a abèrrere una deghina de dies a oe.

Tocat a firmare in deretura s’ispartzinamentu de su coronavirus a Harbin. Dd’ant cumprèndidu bene is responsàbiles de su partidu comunista de sa zona, chi ant retzidu una nota de demèritu pro custos contàgios. Una mancàntzia grave chi at a abbarrare in is fascìculos personales e chi at a pesare meda pro carrieras issoro.

Si narat chi s’epitzèntru de su COVID-19 in Tzina siat dipèndidu dae sa torrada in pàtria de un’istudiante dae is Istados Unidos de Amèrica.

In su mentres sa tzitadina a làcana cun sa Rùssia, Suifenhe, est istada cungiada, coladòrgiu de sa dogana est istadu serradu e totus is tzitadinos tenet s’òbbligu de s’abbarrare acorrados in domo. Ma s’oriolu prus mannu, comente amus giai naradu, est prus che totu pro sa populosa Harbin, chi in custas oras est poderende in pensamentu una natzione intrea.