Su Mundu est bìvende s’emergentzia tràgica de s’epidemia de su coronavirus. S’Olimpìade de Tokio programmada pro s’istade 2020 est istada suspéndida e s’at a fàghere in su 2021.

S’est cumpresu chi, pro more de sa gravidade de su chi est sutzedende in ogna continente, s’ùnica possibilidade fiat a si firmare.

A dolu mannu pro apassionados e pro atletas, s’est arribados a custa detzione pro evitare chi sa pesta de su coronavirus sighiret a s’ispaianare.

Is Giogos olìmpicos modernos sunt istados cantzellados solu in ocasione de is duas gherras mundiales. Est capitadu in su 1916, a printzìpiu de sa Gherra Manna, e in su 1940 e 1944 cun s’àteru conflitu mundiale.

Giovanni Malagò, presidente de su CONI, intervistadu dae sa trasmissione RAI sa “Domenica Sportiva” at antitzipadu sa data noa de s’Olimpìade.

No est galu ufitziale, ma su nùmeru unu de sa Federatzione olìmpica italiana at naradu ca is Giogos s’ant a cumentzare su 23 de mese de argiolas de s’annu chi benit.

Su CIO, tra pagu tempus, at a fàghere ischire sa data sigura de s’inìtziu de s’Olimpìade, ma comente at naradu Malagò, at èssere in s’istade 2021.

Custu pro ite est s’ùnica fentana de tempus istòbile in su calendàriu de is manifestatziones isportivas. In prus, comente in òrigine, ant a abbarrare in sa matessi istajone de s’annu.

Pro su 2020 sunt istados suspéndidos puru totus is àteros abenimentos mannos de s’isport, comente is Europeos de fùbalu.

Medas natziones europeas ant tancadu dae ora is atividades isportivas pro sa matessi chistione, bidu chi s’epidèmia de coronavirus est lompende a petotu.

Tzertu, is atletas chi ant passados is ùrtimos annos a s’allenare pro bìnchere s’Olìmpiade ant a bìdere is sacrifìtzios issoro brujados. Ma ant a tènnere sa possibilidade de s’agiudicare sa vitòria s’annu benidore, si totu at andare bene.

Comente at afirmadu su nadadore Gregorio Paltrinieri – oru olìmpicu a Rio de Janeiro 2016 -, immoe sa cosa prus pretzisa est s’emergentzia Covid-19.

Su mundu de su fùbalu no at cumpresu in deretura sa gravidade de su chi est sutzedende in Itàlia a càusa de s’epidèmia de su coronavirus.

Sa Federatzione italiana de su giogu de sa botza at antitzipadu tres possibilidades pro fàghere concruire su campionadu: no assignare s’iscudetu; torrare a cumintzare a giogare su mese de làmpadas , ispostende is Europeos; fàghere is playoff pro decretare su bìnchidore.

Est a bìere comente s’ant a seberare is iscuadras chi ant a tènnere sa possibilidade de s’agiudicare sa vitòria de s’iscudetu.

S’Uefa puru – cun meda istentu – at suspèndidu sa Liga de is Campiones e sa Liga Europea, pustis ca s’est infetadu calicunu giogadore de is iscuadras impinnadas in custos campionados.

Is àteros istados europeos ant tancadu is campionados natzionales pro sa matessi chistione , bidu chi s’epidèmia de coronavirus est sighende a s’ispainare.

Su Casteddu in is dies coladas at detzisu de non s’allenare pro un’iscuta de tempus. In prus su tècnicu nou Walter Zenga – ex portieri de Inter, Sampdoria e Natzionali italiana – s’est postu in cuarantena pro mègius seguresa.

S’ “Ómine Rangiolu” – comente est annomingiadu- non tenet sìntomos de coronavirus e s’intendet bene, ma est sighende a pilu e sinnu is inditos de Regione Sardigna.

Dinfatis s’ordinàntzia regionale òbrigat a totus is chi sunt lómpidos dae sa “zona ruja”, dae su Nord Itàlia, a s’abbarrare a largu de is àteras personas e a istare a disponimentu de is sanitàrios.

Paris cun Zenga sunt acorrados in su tzentru isportivu de Assèmini peri su diretore isportivu Marcello Carli, su vice-allenadore Max Canzi, su tàticu Gianni Vio e su vice-allenadore de sa Primavera Alessandro Agostini.

Su Presidente Tommaso Giulini puru, chi at tentu cuntatos cun s’ex portieri de s’Inter, est cungiadu in domo sua.

Tzertu parint passados annos dae cando su Casteddu de Rolando Maran in su girone de andada est arrenèschidu a fàghere sonnare is tifosos sardos.

Ma prus che àteru cando s’Itàlia non fiat in custa situatzione de apretu.