Pro is casteddajos s’aversàriu de sa partida benidora at èssere su Verona, un’iscuadra chi est fàghende unu campionadu bonu meda.

At èssere una partida istragosa meda pro su Casteddu, pro ite is veronesos sunt giogadores chi gherrant e ant bìnchidu duas chidas coladas contra sa Juventus.

Sa defensa de is scalìgeros est una de is mègius de su campionadu e s’iscuadra est sesta in classìfica, a in antis de is sardos.

In sa partida de su girone de andada, su Casteddu no est arrenèschidu a bìnchere contra su Verona, in s’istàdiu Sant’Elia, a sa coa de sa partida. Pro ite su defensore ruju-blu Pisacane est lischinadu in su campu, lassende sa botzaa a is aversàrios chi ant segnadu su goal.

Ma custa est un àtera partida, cun is ruju-blu chi ant èssere apretados de sa gana de fàghere puntos pro non arroinare sa bona istajone.

Pro arrenèschere a superare sa crisi de su 2020, custa chida su Casteddu est partidu in retiru a Coccaglio, una bidda lumbarda in provìntzia de Brescia.

At a bastare pro fàghere torrare sa gana de bìnchere a is giogadores e pro fàghere bìdere sa balentia issoro a is tifosos casteddajos?

At èssere làstima a nche fuliare custu incumentzu de campionadu e a non sighire a gherrare pro is cualificatziones a sa Liga Europea benente.

Contra su Verona is ruju-blu ant a pòdere torrare a contare a pitzu de Nainggolan, chi contra su Napoli est mancadu pro iscualìfica.

Non ant èssere de sa partida contra is grogu-blu is defensores infortunados Faragò e Cacciatore, comente a s’iscualìficadu Nandez.

Àtera  maniga de candela Pavoletti: s’est torradu a segare su ghenugru in una chena, ratza de iscomùniga pro s’atacante de Maran!

Juric, allenadore de su Verona, tenet is pensamentos suos: is giogadores Borini e Pazzini sunt infortunados.

S’isperàntzia pro su Casteddu est de torrare a fàghere innamorare is tifosos cun su giogu de su tempus coladu. Sa tzitade de Giulietta e de Romeo  diat a èssere su logu mègius pro chi torret a capitare. Amus a  bìere.

A pustis de sa partida de Milanu, paregiada domìniga contra s’Internazionale, cras is casteddajos ant torrare a giogare in su Sant’Elia.

S’aversàriu nou at èssere su Parma, un’iscuadra chi est fàghende un’istajone bona meda, comente a su Casteddu etotu.

Is ruju-blu ant èssere apretados dae sa gana de fàghere bìdere a is tifosos issoro de àere superadu a beru sa crisi de su mese coladu.

S’iscuadra de Rolando Maran at a calare in campu pro bìnchere sa partida, pro sìghire a abarrare in su tretu de sa classìfica bonu pro is cualificatziones a sa Liga Europea benidora.

Ma at èssere una partida echilibrada, pro ite su Parma est istada un’iscuadra gherradora e cun una de is mègius defensas de su campionadu.

Tzertu su Casteddu in sa partida de su girone de andada est arrenèschidu a bìnchere in s’istadiu Tardini contra is meres de domo, ma custa est un àtera partida.

Is ducales non sunt prus sa matessi iscuadra de s’incumentzu de s’istajone e in s’ùrtimu tempus s’allenadore Roberto D’Aversa est traballende bene meda.

Cras a is emilanos lis at a mancare Kulusevski pro infortùniu, su giogadore gióvanu iscobiadura de sa Sèrie A de ocannu. Est unu mistériu imbetzes sa presèntzia de Gervinho, su carchiadore grogu-blu est tres dies chi non s’allenat cun is cumpàngios suos e D’Aversa at naradu ca fortzis sa sotziedade si dd’at béndidu a un’iscuadra de su Qatar.

Faeddende de partèntzias, su Casteddu at saludadu a su giogadore Castro, passadu a sa Spal. A su chi si narat, paris cun a su tzentrucampista argentinu, fintzas s’atacante Cerri diat èssere destinadu a Ferrara.

Contra su Parma is casteddajos ant a contare meda a pitzu de Nainggolan e de Joao Pedro. Su giogadore belgu at marcadu una rete bella meda a Milano, cun unu corpu de pee dae tesu. Su brasilianu, imbetzes, est su cannoneri e su protagonista mannu de s’iscuadra sarda.

Tando: totus a s’istadiu de Casteddu pro intèndere su nuscu de su fùbalu de sa Liga Europea, ca mancat dae Sardigna oramai dae bintichimbe annos.