Su Casteddu at cuncuistadu unu puntu a Brescia, gasi a sa fine est arrenèschidu a andare a in anti in sa classìfica.

Tzertu, su Casteddu no at giogadu bene comente in is meses colados, ma s’est torrada a bìdere un’iscuadra prus unida e gherradora.

Su Brescia est caladu in campu pro bìnchere sa partida giogada in domo e s’est dimustradu un aversàriu istragosu, comente in su primu atopu de campionadu.

Sa partida s’est posta a lestru bene pro is ruju-blu, cun una rete marcada dae Joao Pedro: unu corpu de conca a pustis de su servìtziu de Cigarini.

Is rundineddas ant arrespostu cun duas retes de Torregrossa – giogadore in die ditzosa – a in antis de conca cussu puru, e a pustis cun una calada de pee dae tesu.

Is sardos sunt torrados tene pro tene cun unu rigore iscutu dae Joao Pedro.

Cando sa partida fiat galu aberta a ogna resurtadu e coigiaiant deghe minutos a s’acabbu, su Brescia est abbarradu cun unu ómine de mancu. A pustis Balotelli, intradu de pagu, si nch’est fatu bogare dae s’àrbitru pro is chèscias suas, a pustis de una calada de pee a conca de Pisacane. S’àrbitru Giua, gadduresu de Caragnani, at aplicadu a pilu e sinnu su regulamentu.

Su Casteddu, cun prus òmines, at àpidu duas ocasiones pro bìnchere sa partida, cun Nainggolan e Cerri, ma non ddas ant isfrutadas. Su 2-2 est unu risultadu giustu pro cussu chi s’est bidu in campu, chi at acuntentadu de prus su Casteddu chi non su Brescia. S’iscuadra de s’ex presidente ruju-blu Cellino sìghit a abarrare a coa de sa classìfica.

Domìnigu is casteddajos ant a giogare a Milano contra s’Internazionale. S’at a bìdere chi s’iscuadra at èssere prus cuntzentrada e chi at superadu sa crisi. E chie dd’ischit si at arrenèschere torrare sa presta pro su 4-1 patidu contra is nieddos-asulos chi sa chida colada nche ddos ant bogados in malumodu dae sa Copa Itàlia.

Su Casteddu si depet cuntzentrare e agatare sa fortza de torrare a bìnchere. Pro ite est perdende dae chimbe partidas, bator in campionadu e una in Copa Itàlia.

Seguru in custas garas at tentu aversàrios balentes che sa Juventus e s’Internazionale e in prus est galu manna sa delusione pro s’iscunfita contra sa Lazio.

Ma in sa partida foras de domo contra s’Udinese, e in cussa a Sant’Elia contra su Milan – chi fiat andende male meda – s’iscuadra no est arrenèschida a fàghere mancu unu puntu. In s’urtima de Copa Itàlia, su Casteddu est partu iscambadu e sena gana de gherrare. Tocat a nàrrere però ca s’Internazionale tenet giogadores de preju e s’atacante Romelu Lukaku est fàghende sa diferèntzia in Sèrie A.

Is tifosos casteddajos s’aiant fatu sa bucabona cun is resultados de s’iscuadra e teniat isperu bonu de sighire in cuss’àndala. Tocat però a si regordare ca sa punna de su Casteddu est a abarrare in Sèrie A, e pro s’ora is bintinoe puntos conchistados in su girone de andada, sunt una base bona meda.

Sa partida chi benit est dominigu, foras de domo, contra su Brescia. Non at a èssere fàtzile pro ite is rundineddas sunt in sa coa de sa classìfica. Annotamala su Casteddu depet tènnere a mente ca at pèrdidu sa prima partida de su campionadu pròpiu contra s’iscuadra de s’ex presidente ruju-blu Massimo Cellino. In prus in su Brescia ant a torrare giogadores importantes pro su giogu de Eugenio Corini, comente su defensore Andrea Cistana e su tzentrucampista Sandro Tonali.

Is òmines de Rolando Maran sunt mutidos a donare una proa manna in s’istàdiu Mario Rigamonti de Brescia pro superare custu momentu malu. Pro nche arréneschere a is giogadores ddis at a tocare a esserent unidos e a nde bogare a foras su caràtere issoro. Est pretzisu a traballare meda in sa difesa e chi is atacantes torrent a èssere de muta bona, pro ite in is ùrtimas partidas ant marcadu belle nudda.

Pro regalare una bella satisfatzione a is tifosos sardos emigrados a Brescia e de totu sa Lombardia.