Su mundu de su fùbalu no at cumpresu in deretura sa gravidade de su chi est sutzedende in Itàlia a càusa de s’epidèmia de su coronavirus.

Sa Federatzione italiana de su giogu de sa botza at antitzipadu tres possibilidades pro fàghere concruire su campionadu: no assignare s’iscudetu; torrare a cumintzare a giogare su mese de làmpadas , ispostende is Europeos; fàghere is playoff pro decretare su bìnchidore.

Est a bìere comente s’ant a seberare is iscuadras chi ant a tènnere sa possibilidade de s’agiudicare sa vitòria de s’iscudetu.

S’Uefa puru – cun meda istentu – at suspèndidu sa Liga de is Campiones e sa Liga Europea, pustis ca s’est infetadu calicunu giogadore de is iscuadras impinnadas in custos campionados.

Is àteros istados europeos ant tancadu is campionados natzionales pro sa matessi chistione , bidu chi s’epidèmia de coronavirus est sighende a s’ispainare.

Su Casteddu in is dies coladas at detzisu de non s’allenare pro un’iscuta de tempus. In prus su tècnicu nou Walter Zenga – ex portieri de Inter, Sampdoria e Natzionali italiana – s’est postu in cuarantena pro mègius seguresa.

S’ “Ómine Rangiolu” – comente est annomingiadu- non tenet sìntomos de coronavirus e s’intendet bene, ma est sighende a pilu e sinnu is inditos de Regione Sardigna.

Dinfatis s’ordinàntzia regionale òbrigat a totus is chi sunt lómpidos dae sa “zona ruja”, dae su Nord Itàlia, a s’abbarrare a largu de is àteras personas e a istare a disponimentu de is sanitàrios.

Paris cun Zenga sunt acorrados in su tzentru isportivu de Assèmini peri su diretore isportivu Marcello Carli, su vice-allenadore Max Canzi, su tàticu Gianni Vio e su vice-allenadore de sa Primavera Alessandro Agostini.

Su Presidente Tommaso Giulini puru, chi at tentu cuntatos cun s’ex portieri de s’Inter, est cungiadu in domo sua.

Tzertu parint passados annos dae cando su Casteddu de Rolando Maran in su girone de andada est arrenèschidu a fàghere sonnare is tifosos sardos.

Ma prus che àteru cando s’Itàlia non fiat in custa situatzione de apretu.

Pro is casteddajos s’aversàriu de sa partida benidora at èssere sa Roma, un’iscuadra chi est fàghende un’istajone a tretos bonos e a tretos malos.

Is romanos mancari custu andamentu, sunt sighinde a gherrare pro is cualificatziones a sa Liga de is Campiones benente.

Sa partida de domìnigu at èssere una de is pagas partidas de Sèrie A chi s’ant a pòdere giogare custa chida. Su campionadu est sempre prus conditzionadu de s’epedemia de su coronavirus e medas partidas sunt istadas suspèndidas. Su Casteddu at a arrenèschere a bìnchere sa prima partida de su 2020?

At èssere un’isfida istragosa meda pro is ruju-blu, pro ite is grogu-rujos sunt giogadores balentes e ant bìnchidu sa chida colada pro bator a zeru contra su Lecce.

S’atacu de is romanos est unu de is mègius de s’Itàlia e su capitanu Dzeko est unu giogadore chi at a pòdere marcare in ogna momentu.

In sa partida de su girone de andada, su Casteddu est arrenèschidu a paregiare contra sa Roma, in s’istàdiu Olìmpicu, a sa coa de una partida giogada in defensa.

Pro is casteddajos at signadu unu rigore Joao Pedro, pro is romanos un’autogoal iscomùnigadu de su capitanu ruju-blu Ceppitelli.

Custa est una partida in ue is giogadores de su Casteddu ant èssere apretados dae sa gana de fàghere puntos pro non arroinare sa bona istajone.

Immoe tocat a arrenèschere a superare sa crisi de su 2020, e custa diat a èssere sa chida mègius pro is casteddajos.

Pustis de su retiru de Coccaglio – una bidda lumbarda in provìntzia de Brescia -, su Casteddu est abbarradu duas chidas sena giogare – suspèndida sa partida contra su Verona sa chida colada – e s’est allenadu bene.

At a bastare custu pro fàghere torrare sa gana de bìnchere a is giogadores e pro fàghere bìdere sa balentia issoro a is tifosos casteddajos? Isperamus, pro ite diat a èssere làstima a non sighire a gherrare pro is cualificatziones a sa Liga Europea benente.

Contra sa Roma is ruju-blu ant a pòdere torrare a contare a pitzu de Nainggolan, chi contra su Napoli est mancadu pro iscualìfica. Non ant èssere de sa partida contra is grogu-rujus is defensores infortunados Faragò e Ceppitelli, comente a s’iscualìficadu Nandez.

Campionadu finidu pro Pavoletti: s’est torradu a segare su ghenugru in una chena, un’àtera iscomùniga manna a beru pro s’atacante livornesu.

Fonseca puru, allenadore de sa Roma, tenet is infortunados suos: is giogadores Zaniolo – istajone finida -, Diawara, Mirante, Pellegrini, Pastore e Zappacosta. E in prusu at a mancare s’iscualìficadu Mancini.

S’isperàntzia pro su Casteddu est de torrare a fàghere su giogu de su tempus coladu.