S’assòtziu Libertade donat totu sa solidaridade sua a Riccardo Sotgia, su militante comunista tataresu connotu pro s’impinnu suo in sas lotas pro sa defensa de sa Sardigna.

Sotgia est indagadu dae sas autoridades ucràinas pro àere biagiadu diversas bias in sa regione de su Donbass, cun sa punna de espressare sa solidaridade internatzionalista sua a sa populatzione de sas repùbblicas populares chi in su 2014 si sunt decraradas indipendentes dae su guvernu de Kiev.

A pustis de medas annos de contrapositzione forte tra sas fortzas polìticas filo-russas dae una banda e europeistas filo-americanas de s’àtera, s’abbolotu violentu ammaniadu dae sos partidos filo-otzidentales at portadu a sa depositzione de su presidente Yanukovich, a s’illegalizatzione de su Partidu Comunista de s’Ucràina e a sa crèschida esagerada de sas ideologias neofascistas, portadas dae in antis dae medas trumas chi oe cumandant in Ucràina-

«Pro more de totu custu su paisu no est prus seguru pro milliones de tzitadinos – ispiegant sos membros de Libertade – e mescamente pro sos comunistas chi a s’ispissu benint mortos e pro sos ucràinos de limba mama russa de sas regiones orientales, chi depent bajulare una discriminatzione dae parte de su guvernu nou contràriu a sa Rùssia.

In custu cuntestu s’insertat sa decraratzione de indipendèntzia de sas repùbblicas populares de su Donbass e sa gherra chi sas autoridades ucràinas ant iscasidadu contra sos matessi tzitadinos e sas matessi tzitades de su Donbass, chi dae annos subint bombardamentos graes ».

«Oe sas autoridades ucrainas – concruint – chircant de corfire fintzas sos tzitadinos de sos àteros paisos chi sunt solidales cun cussas regiones, e s’aparatu giuditziàriu italianu ponet mente a sas rechertas de Kiev. Riccardo, chenàbura chi benit, at a èssere interrogadu dae sa Digos de Tàtari pro contu de sos giùighes ucràinos, chi diant pòdere detzìdere de rechèrrere s’estraditzione. Amus a sighire a bos tènnere agiornados a pitzu de custa vitzenda, invitende a totus a manifestare indignatzione pro ogna possìbile revesa atuada in contra un’internatzionalista, e nos auguramus chi custu fatu sena sentidu potzat èssere un’ocasione pro fàghere lughe a pitzu de una gherra ismentigada in su coro de s’Europa»

A sa fine est istadu connotu e firmadu s’autore de sa fura acontèssida in su tzentru de Casteddu. Ma ispiegamus comente sunt andadas is cosas.

Sàbadu a merie, su personale de su tzentru cumertziale La Rinascente, at pedidu s’agiudu de un’echipàgiu de s’Iscuadra Volante, pro ite pagu prima unu pitzocu nd’aiat furadu una busceta a una fèmina e fiat istadu sighidu dae is guàrdias de seguresa de su tzentru.

Is Agentes, lòmpidos a su logu, ant iscurtadu su contu de una de is duas guàrdias giuradas chi ant postu fatu a su furone chi a dolu mannu, a pustis de èssere istadu firmadu, nche dd’at fata a si fuire in is caminos de sa Marina. Sa guàrdia giurada at notadu su pitzocu andende a segadas in is corsias de La Rinascente, finas a cando cun un’iscuta lestra, nd’at iscravadu dae is manos sa bursa de una fèmina e s’est fuidu.

In deretura dd’ant postu fatu is guàrdias chi sunt resèssidas a dd’atzaparee a nde ddi torrare a boddire sa bursa. S’òmine est istadu acumpangiadu a su tzentru cumertziale, ma candu at bidu is guardias unu pagu fidadas si nd’est torra fuidu.

Pensaiat de si dd’aere iscampugiada, ma a pustis de unas cantas dies at tentu una sorpresa pagu pragerosa pro issu.

Eris un’àteru echipàgiu de s’Iscuadra Volante, mutidu pro bisionare is immàgines de is telecàmeras postas a tutela de su tzentru cumertziale, at castiadu is registratziones e at connotu a M.D., casteddaju de 36 annos, giai connotu a is Fortzas de Politzia pro medas àteros pretzedentes.

A pustis de unu servìtziu de chirca atentu, s’òmine est istadu agatadu dae is fortzas de s’òrdine passigende paris cun àteros duos giòvanos in Bia de Meilogu. Deretu est istadu firmadu e cando is agentes dd’ant fatu bìere is provas craras contras de issu at dèpidu cunfessare sa responsabilidade de sa fura e, una borta acabados is atos de ritu, M.D. est istadu signaladu a s’Autoridade Giuditziària pro su reatu de irrobatòriu.