Is comunidades de Gèsturi e Ìsili e totu mundu de su fùbalu regionale in custas oras est a presu de su dolore de sa famìlia de su giòvanu Luigi Busia, mortu eris pro una digràtzia.

Su pitzocu, 15 annos, eris a merie in Gèsturi nch’est caladu cun su tratore in una ispèrruma. Su mezu s’est furriau fundu a susu e nde dd’at boddidu de suta.

Una isciagura mala chi at postu in tristura sa bidda sua e cussa de Ìsili, acanta Luigi giogaiat a botza, sa passione manna sua.

Su giòvanu at pèrdidu su vida faghende manovra cun su tratore chi nch’est rutu in unu màrgine. Su mezu si nch’est furriadu fundu a susu e dd’at tentu de suta, betende·nde su muru de un’istàlu.

Comente si nde sunt abigiados de su chi fiat sutzèdidu, sos genitores ant mutidu is sucursos, e in deretura sunt lòmpidos is carabineris e s’elicoteru de su 118, ma non ddoe est istadu nudda de fàghere.

Mancari is dificultades pro su logu iscosciosu, s’elisucursu nche dd’at fata a aterrare e is mèigos ant chircadu de animare su pitzocu , ma a dolu mannu ant pòtzidu petzi cunstatare sa morte de su giòvanu.

«De fronte a tragèdia comente a custa non nche tenet faeddos- si leget in unu comunicadu de s’iscuadra sua -. Sa Polisportiva Ìsili, at suspèndidu totu sas atividades finas a data dae istabilire e si unit a su dolore de is familiares de su piticu campione nostru. Adiosu Luigi».

E pròpiu dae su mundu de sa botza regionale arribbat su primu saludu cummovente a su pitzocu. Su Presidente Gianni Cadoni a nùmene de su CR Sardigna, de is cussigeris federales e de totu su mundu de su fùbalu diletantìsticu sardu at donadu is condulèntzias suas a sa famìlia de su giòvanu Luigi Busia pro sa pèrdida tràgica de su caru issoro. A sa Polisportiva Ìsili, in ue giogaiat Luigi, a sa comunidade de Gèsturi lompant is passièntzias nostras in custu momentu de suferèntzia.

A sa fine est istadu connotu e firmadu s’autore de sa fura acontèssida in su tzentru de Casteddu. Ma ispiegamus comente sunt andadas is cosas.

Sàbadu a merie, su personale de su tzentru cumertziale La Rinascente, at pedidu s’agiudu de un’echipàgiu de s’Iscuadra Volante, pro ite pagu prima unu pitzocu nd’aiat furadu una busceta a una fèmina e fiat istadu sighidu dae is guàrdias de seguresa de su tzentru.

Is Agentes, lòmpidos a su logu, ant iscurtadu su contu de una de is duas guàrdias giuradas chi ant postu fatu a su furone chi a dolu mannu, a pustis de èssere istadu firmadu, nche dd’at fata a si fuire in is caminos de sa Marina. Sa guàrdia giurada at notadu su pitzocu andende a segadas in is corsias de La Rinascente, finas a cando cun un’iscuta lestra, nd’at iscravadu dae is manos sa bursa de una fèmina e s’est fuidu.

In deretura dd’ant postu fatu is guàrdias chi sunt resèssidas a dd’atzaparee a nde ddi torrare a boddire sa bursa. S’òmine est istadu acumpangiadu a su tzentru cumertziale, ma candu at bidu is guardias unu pagu fidadas si nd’est torra fuidu.

Pensaiat de si dd’aere iscampugiada, ma a pustis de unas cantas dies at tentu una sorpresa pagu pragerosa pro issu.

Eris un’àteru echipàgiu de s’Iscuadra Volante, mutidu pro bisionare is immàgines de is telecàmeras postas a tutela de su tzentru cumertziale, at castiadu is registratziones e at connotu a M.D., casteddaju de 36 annos, giai connotu a is Fortzas de Politzia pro medas àteros pretzedentes.

A pustis de unu servìtziu de chirca atentu, s’òmine est istadu agatadu dae is fortzas de s’òrdine passigende paris cun àteros duos giòvanos in Bia de Meilogu. Deretu est istadu firmadu e cando is agentes dd’ant fatu bìere is provas craras contras de issu at dèpidu cunfessare sa responsabilidade de sa fura e, una borta acabados is atos de ritu, M.D. est istadu signaladu a s’Autoridade Giuditziària pro su reatu de irrobatòriu.