Oramai nche semus: dae cras su 20 freàrgiu at a èssere possìbile pedire su ”bonus” marchende·si in una prataforma Sogei intrendende dae su situ de su Mit (www.mit.gov.it).

Su contributu istatale de 30 èuros pro s’achistu de sos setzidòrgios antiabandonu obrigatòrios pro lege pro portare in màchina sos pipios finas a 4 annos de edade.

Una bia presentada sa domanda e atzetadu su contributu, si depet ispèndere su ”bonus” intro unu mese, si nono tocat a fàghere torra sa rechesta.

Su contributu – comente ispiegadu in su giassu de su ministeru – est cuntzèdidu mediante s’emissione de unu bonus de ispesa eletrònicu de 30 èuros pro s’achistu de su dispositivu antiabbandonu assotziadu a su còdighe fiscale de su pipiu.

Chie at giai comporadu su setzidòrgiu non si depet arriolare: est prevìdidu unu rimbursu chi si podet otènnere sighende una protzedura pretzisa: tocat a fàghere una rechesta intro 2 meses dae sa die chi sa prataforma est ativa, unende a sa domanda sa còpia de s’iscontrinu fiscale o de sa fatura. Su dinari at a èssere acreditadu intro 15 dies dae sa rechesta.

Donade cura: pro chie non s’at a pònnere in règula, dae su 6 martzu sunt prevìdidas santziones chi andant dae 83 a 333 èuros – cun una reduida dae 58 a 100 èuros pro chi pagat intro 5 dies- e cun s’istoddimentu de 5 puntos dae sa patente. Pro chie at a èssere multadu 2 bias in 2 annos est prevìdidu su sergustu de sa patente dae 15 dies a duos meses.

Àtera cosa de ischire: sos aparatos, narat sa normativa, non depet tènnere una omologatzione particulare, ma depent èssere acumpangiados dae unu tzertificadu de cunformidade emìtidu dae su produtore.

In prus est obrigatòriu chi s’ativent in manera automàtica ogna bia chi s’impreant, sena bisòngiu de s’interventu de su guidadore. Si su guidadore s’iscrescet su pipiu in machina si depent ativare in deretura sos sinnales visivos, acùstistos e de vibratzione, chi depent èssere visìbiles siat in intro de sa vetura, siat in foras.

Pro mègius seguresa sos aparatos antiabbandonu o sos setzidòrgios podent èssere collegados a su tzellulare chi in custu modu inviat avisos a su genitore gràtzias a una aplicatzione o cun su sistema Bluetooth.

In sas butegas o in sos sitos in lìnia ddoe tenet sa possibilidade de comporare una surra de modellos de setzidòrgios, adatos a ogna gustu.

In Roma, Silvio Busaferro – presidente de s’Istitutu Superiori de sa Sanidade – at mustradu is barcas de abba in miniadura sena pilota cumandadas a distàntzia – drones acuàticos -, cuncordadas pro averiguare s’incuinamentu de is rios e de is lagos.

S’ocasione est istada s’atopu pro sa presentada de sa relata a tìtulu “The lancet countdown on Health and Climate Change” – conta a s’imbesse pro sa salude e su càmbiu de su clima -.

Is barchiteddas sunt istadas cuncordadas pro contu de su Progetu Europeu Horizon 2020 IntCatch. A custu traballu at partetzipadu s’Istitutu Superiore de sa Sanidade cun su Dipartimentu de s’Ambiente e de sa Salude.

Su Progetu Horizon est istadu giai impreadu pro su controllu de sa cunditzione de sa salude de is abbas.

Is robot barchitas sunt frunidas de sensores chi permìtent de mesurare medas informatziones: sa temperadura de s’abba, s’aghidùmine (su Ph), sa condutzibilidade, is sustàntzias nutritivas – comente s’azotu e su fósfuru -, e totus is metallos e idrocarburantes.

Un’aplicatzione intelligente, isvilupada dae su matessi progetu, retzit is datos in tempus reale dae su robot barchitedda.

Is resultados benint traballados in unu laboratóriu minore portàtile, in ue ant èssere is chircadores italianos a tzertificare totus is datos inviados dae su robot navigadore.

Su laboratóriu, chi s’at a agatare a presu de sa barchitedda, at a dare a lestru is resultados de su microbiota e at a iscoviare sa possìbile presèntzia de agentes de maladias.

Tocat a nàrrere ca s’innovatzione tecnològica benit impreada sempre de prus pro sa defensa de s’ambiente. Bastat a pensare a is robot navigadores e boladores impitados pro amparare is tostóinos marinos chi arriscant de s’ispèrdere, comente is Caretta Caretta e Chelonia.

Pro sa defensa de is tostóinos, is barchiteddas, cun una aplicatzione ant a signalare is esemplares abistados a is trasmitidores satèlitares, chi ant a marcare totu is ispostamentos issoro.

Gràtzias a custa trassa is chircadores podent amparare custas genias de tostóinos dae is perìgulos.