A medas primos tzitadinos italianos, sa decraratzione de Jennifer Lopez, non nche ddis est essida dae s’àtera origra.

In un’intervista cuntzèdida a Vanity Fair sa diva americana at espressadu su disìgiu de si nche cambiare a bìvere a unu logu a largu dae sos Istados Unidos. Destinatzione: Bali o una biddighedda italiana.

Diat bòlere fàghere una vida prus trancuilla e prus simpre, faghende cosas normales comente andare in bitzicleta pro esèmpiu.

In deretura medas primos tzitadinos itàlicos si nche sunt intèndidos interessados, cuntentos e bregiosos de tènnere comente cuntzitadina a Jennifer Lopez, connota cun su nùmende de JLo.

Tra sos primos su sìndigu de Casteddu Paolo Truzzu, chi at cumbidadu sa cantante de orìgine portoricana a si tramudare in su cabulogu sardu. Truzzu in una lìtera at fatu ischire ca tzitade no est minore, ma addata a disìgiu de una vida a mesura de òmine espressadu dae s’artista.

Sighi sighi s’est fatu intèndere peri su vitze sìndigu de San Quirico di Orcia – in provìntzia de Siena – Marco Bartoli, chi at provadu a ingangulitzare s’artista bantende sa bidda sua comente logu de grandu bellesa ma peri riservadu.

Imbetzes su sìndigu de Berceto Luigi Lucchi, at propostu de regalare a JLo peri una domo, ma de restaurare.

Seguramente pro is sìndigos custa est istada una bella trassa publitzitària pro acostiare su nùmene sa bidda o tzitade issoro a cussu prus famadu de Jennifer Lopez.

Totu custu at iscasidadu sa reatzione bronta de is impitadores de is mèdia sotziales, chi ant prenu sa retze de memes incredìbiles e fotomontàgios ispassiosos de s’artista istadunidensa in is logos prus improbàbiles, opuru cun is colores de su gonfalone de is vàrios comunos chi si sunt propostos de dda ospitare.

Pro custos invitos non sunt mancadas fintzas is crìticas de is àteros primos tzitadinos italianos, medas imbetzes si l’ant pigada a rìere.

Sa beridade est ca chie bivet in una bidda pitica de sa Sardigna ischet ca su problema prus mannu est s’ispopulamentu. Chissai si una cuntzitadina comente a Jennifer Lopez diat pòdere firmare custu tristu fenòmenu. Tzertu, si non prus diat a èssere una bella presèntzia de bìere, ma serbit àteru.

Tres campiones de tres malàidos ricoverados sunt resurtados positivos a su virus.

S’influèntzia est lòmpida in Sardigna e sos primos campiones positivos a su virus de ocannu sunt istados agatados unas cantas die a oe dae su laboratòriu de Virologia Ispetziale de s’Aiensa Ospedaliera Universitària de Tàtari.

Su virus est istadu identificadu in duos malàidos ricoverados in sos repartos de s’Aou de Tàtari e unu in unu malàidu chi s’agatat in un’ispidale gadduresu.

Totus e tres sos campiones – faghet ischire su laboratòriu de Virologia Ispetziale – sunt resurtados positivos a su virus influente de tipu A sutatipu “H1N1 pdm09”. Pro s’ora non sunt istados identificados campiones positivos pro virus influente de tipu A sutatipu H3N2, e de tipu B giai signalados a livellu natzionale.

Su laboratòriu de Virologia Ispetziale, chi faghet parte de s’istrutura cumplessa de Microbiologia e Virologia dirìgida dae su professore Salvatore Rubino, est coordinadu dae sa professora Callina Serra.

«In Sardigna – at naradu Salvatore Rubino, diretore de sa Microbiologia e Virologia de s’Aou de Tàtari – s’istajone influente incumentzat pro su prus unu pagu a trigadiu cunfrontu a s’Itàlia. Finas a immoe, a livellu natzionale, s’istajone influente est istada caraterizada dae una tzirculatzione moderada de sos viros A/H3N2, A/H1N1 pdm09 e B, comente resurtat peri dae s’ùrtimu raportu Influnet pro sa vigilàntzia virològica. In Sardinga sa punta màssima l’amus a tènnere tra ghennàrgiu e metade de freàrgiu».

Sa regorta de sos campiones de analizare benit fata dae sos mèdicos “guardianos”, chi s’agatant in totu su territòriu de sa Sardigna. In prus s’agiunghent sos dotores de sos ispedales regionales.

Pro immoe su prus de sos campiones benit dae sos dotores de sos repartos de sos ispidales. Pretzisamente: Pediatria, Meighina e Terapia intensiva. Sos tres campiones positivos a su virus influente fiant de unu pipiu e de duos adultos.

«Sos campiones clìnicos impreados pro sa chirca de su virus influente o de sos cumponentes suos – ispiegat sa professora Callina Serra de su laboratòriu de Virologia Ispetziale – sunt istados testados cun metòdicas molecolares pro individuare tipu e sutatipu de su virus influente tzirculante. Sos datos otentos benint imbiados ogna chida, pro bia telemàtica, a su Tzentru de coordinamentu natzionale de s’Istitutu Superiore de Sanidade pro compudare s’eficatzidade de sa campagna vatzinale e s’essia de possìbiles mudaduras virales».

A livellu natzionale, sos primos duos campiones positivos a su virus influente sunt: unu de tipu A sutatipu “H1N1 pdm09” e unu de tipu B, lineàgiu Victoria, sunt istados signalados pro mèdiu de su portale InfluNet a s’acabbu de onnisantu.

In su perìudu a in antis de su cumintzu de sa vigilàntzia virològica (chida 46/2019), calicunu laboratòriu de riferimentu ant signaladu casos isolados de infetzione de virus influente in Itàlia. Mescamente, sunt istados cunfirmados tres casos de influèntzia: unu virus B/Victoria identificadu a s’acabbu de cabudanni (chida 39/2019) dae s’Azienda ospedaliera universitària de Parma in una pitzinna de 6 annos; unu virus A (H1N1) pdm09 identificadu a metade de mese de ladàmine (chida 42/2019) in su repartu de Maladias Infetivas de s’ispidale pediàtricu Giovanni XXIII de Bari in una pitzinna de 6 annos; unu virus B/Victoria identificadu a fine de mese de ladàmine (chida 43/2019) a s’IRCCS “Lazzaro Spallanzani” de Roma in unu sugetu de 24 annos contoniadu dae s’istràngiu.