Ite est custu Tik Tok chi est conchistende is giòvanos de su mundu? Su nòmene s’assimbìgiat a su sonu chi fachet su relògiu.

Est un’aplicatzione impreada meda in is ùltimus tempos, chi praghet a amachiadura a is giòvanos.

Tik Tok est erribadu dae sa Tzina in su 2016, naschidu comente ispàtziu de mùsica, ideadu dae Zhang Yiming.

Su sutzessu mannu est erribadu a pustis de aùstu 2018, cando Tik Tok s’est unidu a Musical.ly.

In s’ùltima iscuta de tempus Tick Tok est diventende virale, sa gente at cumentzadu a ddu impreare e a ddi piàghere prus de Twitter, Facebook e Instagram, is mèdios de comunicatzione de massa prus mannos e contados finas a immoe.

Sa gente famada puru est faghèndesi ingangulissare dae custa aplicatzione e dda impreant meda finas peri polìticos e personalidades de su sport. Fintzas s’iscuadra de su Castedu at incumentzadu a tènnere unu profilu in custu ispàtziu sotziale.

Tik Tok funtzionat comente istangram etotu, ma a diferèntzia de custu faghet a pònnere vìdeo curtzos de trinta segundos ebbia. Pro ite comente ant pensadu is imbentores suos, ogna momentu de sa vida est importante e est pretzisu a ddu bìvere.

Tik Tok est una genia de karaoke virtulae, in ue sa gente si ponet a cantare, baddare e a istròchere is iscenas de unu film.

Is vìdeos carrigados ddos podent castiare is cuntatos amigos ebbia, e podent respùndere cun àteros vìdeos.

Tik Tok tenet meda efetos vìdeu e trastos pro modificare is fotografias.

Est unu modu nou de presentare is cosas, e paritzos meres de siendas ant cumpresu ca gràtzias a Tik Tok podent tènnere medas ocasiones de traballu.

Tik Tok est una rete sotziale chi podet causare dipendèntzia, pro ite cullunat a chie ddu impreat a s’abbarrare faghende vìdeos a tot’ora.

Pro ddu impreare bastat a iscarrigare s’aplicatzione e a s’assentare iscriende su nùmeru de telèfonu o s’indirìtziu de posta eletrònica.

Una borta installadu amus a agatare una cara comente in instagram e in facebook.

Pro fàghere unu vìdeu at a bastare a carcare in mesu a cun s’iscrita + e sighire is inditos de s’aplicatzione.

Is primores agrualimentares de sa Sardigna bolant a Matera, capitale europea de sa Cultura 2019, pro sa tres dies de su “Villaggio contadino” promòvidu dae sa Coldiretti.

In su tzentru istòricu meravilliosu de sa “Tzitade de is pedras”, capitale europea de sa cultura 2019, sunt presentes, tra is primores italianos de su mercadu de “Campagna amica”, su casu de berbeghe de Òsile e su pane carasadu.

Duos produtos tìpicos chi dae eris e finas a domìniga su primu de nadale rapresentant sa Sardigna e donant gosu a is palados de is medas istràngios chi prenent a incarcu su tzentru istòricu de sa tzitade lucana, gràtzias a sa sienda agrìcula Sa Moddixia de Genuri e sienda Mandras Largas de Òsile.

Sa sienda de Genuri, comune minore de sa Marmidda, produet dae su trigu nòbile Capelli su pane carasadu e sa pasta, e in modu particulare frègula e loroghitas.

Mandras Largas, imbetzes, cun su late de is berbeghes suas faghet su  casu de bergheghe de Òsile, postu tra is sigillos de s’atlante de sa biodiversidade de Campagna Amica.

In sa tres dies sa Sardigna est presente fintzas in s’espositzione de is biodiversidades cun s’Abbamele, unu de is produtos gastronòmicos prus antigos de sa cultura rurale de Sardigna, e sa Pompìa, agrùmene ispetziale chi faghet in Sardigna ebbia, tra Thiniscole e Orosei.

«Gràtzias a is bidditzolos, iscusòrgiu de is biodiversidades e de s’agrualimentare “fatu in Itàlia” autènticu – at naradu su presidente de Coldiretti Sardegna Battista Cualbu – semus promovende sa regione nostra cun is primores agrualimentares nostros.

Ddu faghimus a costadu de is tzitadinos, chi s’ammuntonant in ogna tapa de su bidditzolu de Coldiretti chi dae duos annos est tenende si a fùrriu de s’Itàlia.

Una promotzione direta, sena intermediàrios, fata dae is massajos nostros chi contant a sa gente is produtos issoro donende valore a sa Sardigna prus bera, sa de su sartu, sa de is produtos traditzionales, gràtzias a is  cales si costoit e s’amparat su territòriu».