Oe in pratza Garibaldi in Casteddu, s’ant a obiare is chi sunt de acòrdiu cun s’ideale de is Sardinas.

Su movimentu est nàschidu dae bator istudiantes bolognesos e giai in Sardigna su 30 de onniasantu est istadu fatu un’atopu in sa Maddalena.

Custu movimentu non bolet fàghere polìtica, ma tenet a coro is ideales de solidariedade, ospitalidade e est contra sa violentzia.

A is 19 de oe in Casteddu s’ant donadu apuntamentu prus de 6000 personas.

Unu bella proa pro cumprèndere canta personas at a atopare e si ant a prènnere sa pratza de sa tzitade prus manna de sa Sardigna.

Francesco Piseddu e Lorenzo Caddeo, is amministradores de sa pàgina FB de is Sardinas, ant invitadu sa gente a batire cosa de papare chi non s’isperdet a lestu pro dda donare a is pòberos. Totu sa cosa atzocada s’at a pòdere lassare in mesas chi ant a èssere cuncordadas a s’acabbu de sa manifestatzione. S’idea est bènnida a conca a duos giòvanos paris cun sa Diòtzesi de Casteddu.

In is tzitades mannas italianas is Sardinas ant prenu is pratzas cun unu muntone de gente.

In Firentze, a sa fine de su mese de onniasantu si sunt contadas prus de 40.000 personas.

Oe in Casteddu seguru no ant a mancare cantos e ballos populares comente Bella Ciao e àteras cantzones de libertade.

Su movimentu mancari chi non bògiat fàghere polìtica, at semper decraradu de èssere contra a sa polìtica de sa Lega e de su presidente suo Salvini.

In Gaddura e in su tataresu sunt naschende àteros movimentos a favore de is Sardinas.

A pustis de Casteddu est in programma un’àtera manifestatzione in Tàtari.

Ite est custu Tik Tok chi est conchistende is giòvanos de su mundu? Su nòmene s’assimbìgiat a su sonu chi fachet su relògiu.

Est un’aplicatzione impreada meda in is ùltimus tempos, chi praghet a amachiadura a is giòvanos.

Tik Tok est erribadu dae sa Tzina in su 2016, naschidu comente ispàtziu de mùsica, ideadu dae Zhang Yiming.

Su sutzessu mannu est erribadu a pustis de aùstu 2018, cando Tik Tok s’est unidu a Musical.ly.

In s’ùltima iscuta de tempus Tick Tok est diventende virale, sa gente at cumentzadu a ddu impreare e a ddi piàghere prus de Twitter, Facebook e Instagram, is mèdios de comunicatzione de massa prus mannos e contados finas a immoe.

Sa gente famada puru est faghèndesi ingangulissare dae custa aplicatzione e dda impreant meda finas peri polìticos e personalidades de su sport. Fintzas s’iscuadra de su Castedu at incumentzadu a tènnere unu profilu in custu ispàtziu sotziale.

Tik Tok funtzionat comente istangram etotu, ma a diferèntzia de custu faghet a pònnere vìdeo curtzos de trinta segundos ebbia. Pro ite comente ant pensadu is imbentores suos, ogna momentu de sa vida est importante e est pretzisu a ddu bìvere.

Tik Tok est una genia de karaoke virtulae, in ue sa gente si ponet a cantare, baddare e a istròchere is iscenas de unu film.

Is vìdeos carrigados ddos podent castiare is cuntatos amigos ebbia, e podent respùndere cun àteros vìdeos.

Tik Tok tenet meda efetos vìdeu e trastos pro modificare is fotografias.

Est unu modu nou de presentare is cosas, e paritzos meres de siendas ant cumpresu ca gràtzias a Tik Tok podent tènnere medas ocasiones de traballu.

Tik Tok est una rete sotziale chi podet causare dipendèntzia, pro ite cullunat a chie ddu impreat a s’abbarrare faghende vìdeos a tot’ora.

Pro ddu impreare bastat a iscarrigare s’aplicatzione e a s’assentare iscriende su nùmeru de telèfonu o s’indirìtziu de posta eletrònica.

Una borta installadu amus a agatare una cara comente in instagram e in facebook.

Pro fàghere unu vìdeu at a bastare a carcare in mesu a cun s’iscrita + e sighire is inditos de s’aplicatzione.