In unu vìdeu chi est diveninde virale (est girende in is printzipales canales social Youtube, Wathsapp, Facebook e Instagram) is legales barbaritzinos espressant e motivant sa firma contrariedade issoro a sa lege chi difatis abrogat sa prescritzione de su reatu a pustis de sa pronùntzia de sa sentèntzia emìtida dae su giùighe de su primu gradu.

In su vìdeu de belle chimbe minutos, 12 penalistas nugoresos ispiegant cun pagos faeddos ma bene lisados pro ite est pretzisu chi s’istitutu de s’òbligu subravìvat pro non cundennare su tzitadinu a dibatimentos eternos, sine die.

Una batalla de tziviltade duncas chi pro s’ora no at tentu perunu ascurtu dae su prus de is partidos de Guvernu chi difatis finas a custu momentu no ant donadu crobba a sa recherta de is penalistas italianos de firmare sa norma noa a pitzu de sa prescritzione.

Is ùnicos partidos chi sunt donende coddu a sa batalla de is penalistas italianos sunt cussos de s’opositzione (Forza Italia, Lega e Fratelli d’Italia) e in sa magioràntzia su Pd.

Tando, bidas is cosas comente sunt, su provedimentu at a divenire lege dae su primu de ghennàrgiu de su 2020 cun cunsighèntzias graes pro is abogados penalistas italianos impinnados in una chèscia unitària a livellu territoriale (astensione dae is udièntzias) e in Roma (acanta est in cursu sa maratona oratòria) contra una riforma chi at a furriare su protzessu penale in unu protzessu sena fine.

Pro custu una delegatzione de sa Càmera Penale de Nùgoro ghiada dae su presidente Salvatore Murru, e dae is collegas Angelo Magliocchetti, Fabio Varone e Paola Marteddu at asseguradu pro sàbadu su 7 de mese de idas, sa partetzipatzione de su foru barbaritzinu a sa “Maratona oratòria pro sa beridade subra sa prescritzione” in Roma, in Pratza Cavour (cara a sa Corte de Cassatzione) incumentzada lunis su 2 de nadale e chi at a durare finas a sàbadu su 7 de nadale.

Un’atòbiu pro contare a s’opinione pùblica sa beridade a pitzu is càusas de sa durada sena sentidu de is dibatimentos e de comente amus a divenire totucantos presoneris a vida de s’Istadu cun s’abolitzione de sa prescritzione. Chentinas de abogados de totu Itàlia dae is 9 oras de mangianu a is 8 de merie ant a contare a is tzitadinos su chi càpitat a beru in is àulas de is tribunales ogna die.

Sete fèminas sardas sunt istadas premiadas custu mangianu dae Coldiretti Donna Impresa cun su prèmiu Fèminas 2019.

Su prèmiu benit intregadu cada annu a is fèminas sardas chi si distinghent in su traballu issoro, giughende artu su nùmene de sa Sardigna e donede peri isperu bonu pro su benente.

Is prèmios, assignados custu mangianu in sa sala cunvegnos de su Bancu de Sardigna de Casteddu, pertocant sete diversas categorias: sport, sièntzia, arte, ispetàculu, comunicatzione, massaria e istitutziones.

Pro sa categoria sport est istada premiada Marianna Lauro de Piaghe.

Pitzoca chi dae 20 annos est in cadira a rodeddas pro un’intzidente, ma chi at tentu su brè de non si betare a terra e de sighire a praticare su sport suo, su tennis, binchende 12 tìtulos italianos e partetzipende pro 3 bias a is paraolimpìades, e tra non meda peri a sa de bator bias.

Pro sa categoria Iscièntzia est istada premiada Elisabetta Pastorini de Casteddu, chi traballende nche dd’at fata a si laureare in odontoiatria e est resèssida, a pustis de s’èssere ispetzializada in estètica dentale, a otènnere, gràtzias a s’Acadèmia de modellatzione dentale, s’AFG, su reconnoschimentu dae su Senadu de sa Repùbblica de primore italianu in su mundu.

In su setore Arte su reconnoschimentu est andadu a Pina Monne de Irgoli, residente in Tinnura, s’artista de su muralismu chi trasformat is muros de is andaleddas mudas in libros colorados chi contant s’istòria millenària de su mundu de su sartu.

Pro s’Ispetàculu su prèmiu andat a Michela Giangrasso de Casteddu chi dae is passarellas est passada a fàghere sa regista de Miss Italia in Sardigna, e in prus donat boghe a is fèminas in unu programma televisivu.

Sa vicecaporedatora de su TgR Sardegna Flavia Corda est istada premiata in sa categoria Comunicatzione.

In prus de contare s’Ìsula at abertu is ghennas de su giornalismu a is fèminas: est istada tra is primas 10 fèminas a s’èssere iscrita in s’albu de is giornalistas professionistas in s’Ìsula e in su 1988 est istada sa prima fèmina tra 30 òmines a intrare a fàghere parte de sa redatzione de su Tgr Rai Sardegna.

Is sorres Valentina e Francesca Argiolas de Serdiana ant bintu su Prèmiu Fèminas in sa categoria Massaria. Totu e is duas paris sunt sighende a iscrìere s’istòria de sa Cantina Argiolas, leader de sa viticultura sarda.

Claudia Mura de Cadesedda, chi cun s’impinnu suo, in contratendèntzia a su disinteressu mannu de is giòvanos pro sa polìtica, binchet imbetzes su Prèmiu Fèminas in sa categoria Istitutziones.